য়হুন্না 14

ন্যাতা, আজিপ্পা আসা সাদি

1ইশুহা য়োংতোংবিহিংয়া জাংয়ে, “নাবিহা সিংদুমগ্যই। নাবিহা আপনিকো দেংওয়াহা সেংজাকো তোইতা আসা কুং তোইতারে একো জো। 2কুং আপাকো য়ুংওয়া লোডিংবাতাহা উইসে য়ুংদু জায়গাবি নিও, এপামি মাতানাহা কা নাবিহিং এপা জিংওয়া নুওয়াংবিহা মাজাংকোগা। কা নাবিকো সোতা আউতা য়ুংদু বানাইয়াকো হোদাংয়ো, 3আসা নাবিকো সোতা য়ুংদু বানাইপুনতেনুকো নোইতাহা কা ন্যাসারাং লারেমসা লেরোওয়া, আসা নাবিহিংয়া কুং য়ুংওয়াতা পুরারোওয়া, আসা কা হাংতানি, আউতারাং নাবিরে কাহিংপারাং য়ুংরোওয়া। 4কুং হোদাংওয়া ন্যাতাহা নাবিহা গেমরাং নিও।”

5থোমাহা আকুহিংয়া জাংয়ে, “প্রভু, নাতিহা হাংতা হোকোগা? আকুহা কাবিহা মেগেতো আসা নাকো হাদাংওয়া ন্যাতাহা কাবিহা হেপা গেকো চুকোগাসা?”

6ইশুহা জাংয়ে, “কা ল্যামসা হাংসু দিংঙারে আপাকোতা হোমক্যই, হাংপাতানাহা আজিপ্পা, ন্যাতা আসা সাদিহা কারাংগা। 7নাবিহা আজিপ্পারাং কাহিং নাইনাহা কুং আপাহিংনে নাইকোগা। ইসো য়ুতা নাবিহা কুং আপাহিংয়া নাইরোওয়া, হাংপাতানাহা নাবিহা আকুহিংয়া তিংতেমি নিও।”

8ফিলিপহা ইশুহিং জাংয়ে, “প্রভু, কাবিহিং আপা তিংপাপি, এসে নিনারাং কাবিহিংয়া তেংরোওয়া।”

9ইশুহা জাংয়ে, “ফিলিপ! এসে দিন চোইপা কা নাতিহিংপারাং নিও, আদো নাতিহা কাহিংনাং মানাইতো? হাংসু কাহিং তিংমিনি, আকুহা আপাহিংনে তিংমি নিও। নাতিহা হেপা জাংকো চুকোগা ‘কাবিহিং আপা তিংপাপি’ তামসা? 10‘কা আপাকোতা নিও আসা আপাহা কাহিংপা নিও’ তাওয়া নুওয়াংহা নাতিহা মাদেংমগা? নাবিহিং জাংওয়া নুওয়াংহা কাহা আপনিকো ইচ্ছাসো জাংওয়া মোকো। কাহিংপা নিওয়া আপারাং আপনিকো কামহা কুংসোরাং জোদিংয়ো। 11কাহা আপাকোতা আসা আপাহা কুংতা নিও, তাওয়া নুওয়াং দেংকো জো। মোকোনাহা কুং জোওয়া আআংপেপেচপুওয়া কাম কাংমসা কুংতা দেংকো জো। 12আজিপ্পারাং কা নাবিহিং জাংরোওয়া, কুংতা দেংওয়াহা কুং জোওয়া ত্যাবাপা কামবি জোরোওয়া আসা আকুরোমা টেবো কামবিরে জোরোওয়া, হাংপাতানাহা কা আপাকোতা হোদাংয়ে। 13নাবিহা কুং মিংতা হাই য়াচাবা চেংওয়াসো আপাকো মহিমা জিংকো তামসা কা জোপিরোওয়া। 14নাবিহা হাইক্রি নুওয়াংবি কুং মিংতা য়ানাহা কা আকুহা জোপিরোওয়া।”

ইশুহা পবিত্র লাংবেহিং নিংপুরো তাওয়া

15ইশুহা জাংয়ে, “নাবিহা কাহিং জেজেংপা জোনাহা কুং আজ্ঞা জোওয়া নুওয়াংবি তাংসা জোরোওয়া। 16কা আপাহিংপা জাংপিরোওয়া আসা আকুহা নাবিহিংয়া কুং জায়গাতা ইচো সহায়তা জোওয়া নিংপুরোওয়া। আকুহা নাবিহিংপা হাত্রংদো য়ুংরোওয়া। 17আকুহা পবিত্র লাংবেগা, আসা আকুহা নাবিহিংয়া আজিপ্পাতা তেপোইরোওয়া। আদো বাসিমতিকো দিংঙাবিহা আকুহিংয়া লেই তামক্যইরোওয়া, হাংপাতানাহা বাসিমতিহা আকুহিংয়া মাতিংরোওয়া আসা মানাইরোওয়া, আদো নাবিহা আকুহিংয়া নাইরোওয়া, হাংপাতানাহা আকুহা নাবিহিংপারাং চিত্তা য়ুংরোওয়া আসা আকুহা নাবিকো জুপাতারাং য়ুংরোওয়া। 18কা নাবিহিংয়া তোগ্যই ত্যাবাপা মাহুইতে, কা ন্যাসারাং নাবিকোতা লেরোওয়া। 19আম্যই নোইতাহা বাসিমতিকো দিংঙাবিহা কাহিংয়া মাতিংরোওয়া, আদো নাবিহা কাহিংয়া তিংরোওয়া। কা মিসিওয়াকো সোতা, নাবিরে মিসিপা য়ুংরোওয়া। 20আত্রংকো দিনহা কা আপাহিংপা নিও আসা নাবিহা কাহিংপা, আসা কাহা নাবিহিংপা নিও তাওয়া নুওয়াং নাবিহা কোইরোওয়া। 21কুং আজ্ঞাহিং হিংমসা জোওয়ারাং কাহিং জেজেংপা জোওয়া দিংঙাগা। কাহিং জেজেংপা জোওয়াহিংয়া আপারে জেজেংপা জোরোওয়া, আসা কারে আকুহিংয়া জেজেংপা জোরোওয়া, আসা আকোতা তিংয়ারোওয়া।”

22আসা য়হুদাহা (য়হুদা ইস্করিয়োতহা মোকো, আদো দোসরা য়হুদা তাওয়া য়োংতোংহা) ইশুহিং জাংয়ে, “প্রভু, হাংপা নাতিহা কাবিকোতা মেংচে আপনিহিং তিংরেকোগা, আদো বাসিমতিতাহা মাতিংরেকোগা?”

23ইশুহা জাংয়ে, “কাহিং জেজেংপা জোওয়াবিহা কুং জাংওয়া নুওয়াংবি জোরোওয়া। কুং আপাহা আবিহিংয়া জেজেংপা জোরোওয়া আসা আপাসো কাহা আকোতা লেমসা আকুহিংপারাং য়ুংরোওয়া। 24আদো কাহিং জেজেংপা মোজোওয়াহা কুং জাংওয়া নুওয়াংবিহা মাহিংরোওয়া আসা মোজোরোওয়া। নাবিকো হিংওয়া ই য়্যইদিবিহা কুং কাটুসো লেওয়া মোকো, আদো কাহিং নিংপুওয়া আপাকো কাটুসোরাং লেমগা।

25“নাবিহিংপা নিনুরাং কাহা ই তাংসা নুওয়াং জাংমি নিও। 26আপাহা কুং মিংতা সহায়তা জোকো নিংপুদাংওয়া পবিত্র লাংবেহা নাবিহিং তাংসা নুওয়াংবি ঝিপারোওয়া, আসা কুং জাংওয়া তাংসা নুওয়াংবি নাবিহিং প্যারা তাংপারোওয়া। 27কা নাবিকোতা তিমেওয়া হুইতেমসা হোরোওয়া। কুং আপনিকো তিমেওয়াহা কা নাবিহিং পিচারোওয়া, ই তিমেওয়াহা বাসিমতিকো পিচাওয়া তিমেওয়া1 ত্যাবাপা মোকো। নাবিহা হরেস মাজিংগে আসা মাচছুংগে। 28‘কা ইসো হোদাংয়ে আসা ন্যাসারাং নাবিকোতারাং লারেমসা লেরোওয়া’ তাওয়া কুং জাংওয়া নুওয়াংহা নাবিহা হিংতেও। নাবিহা কাহিংয়া আজিপ্পা জেজেংপা জোনাহা কা আপাকোতা হোদাংনুওয়া নাবিহা গাগ্রুকোগা, হাংপাতানাহা কারোমাহা আপারাং দিয়োমগা। 29ই তাংসা নুওয়াং জিংনুরোমা নাগাইরাং কা নাবিহিংয়া জাংপুনতেও, হাত্রং ই নুওয়াং তাংসা জিং, আত্রংহা নাবিহা দেংরোওয়া। 30নেহা কা নাবিহিংপা উইসে মোয়্যইরোওয়া, হাংপাতানাহা জেসাংসো অধিকার জোওয়া বাসিমতিকো মাটা দেপাদাংতেও। আকোহা কুং তোইতা হাইরে সে মোতো, 31আদো তাংসা দিংঙাবিহা কা আপাহিং জেজেংপা জোদিংয়ো তাওয়া গেকো তামসারাং কা আপাকো আজ্ঞা জোওয়া নুওয়াংবি জোদিংয়ো। লো, নেহা য়াংবিহা ইসো হোপুকো।”