ইচোহা ইচোহিং য়ুজ্রু
ও ডুওয়া এবাই আসা হুম্রিবাই, য়দি লেরা দিংঙাহিংমি অপরাধ জোদিংনু দোসুনাহা, নাবি হাংসু পবিত্র লাংবেকো অধীনতা নিমমে, নাবি আপনিবিরাং নম্র জিংমসা আকুহিংয়া সুধার জোনেরোওয়া, আদো এপা জোনুওয়া আপনিরে হোশিয়ার জিং, মোকোনাহা নাবিরে পরিকছাতা পরেরোওয়া। ইচোহা ইচোকো ব্যাহিং তোরোইজ্রু, আসা এপারাং খ্রীষ্টকো লিংপাংহিং পুরা জো। হাংপাতানাহা হাংসু হাইরে দাম মাতাওয়া দিংঙা আপনিহিং কা টেবোগা তামসামি নোনাহা, আকুহা আপনিহিংনাং ধোকা পিচারোওয়া। তাংসারাং আপনিকো কামকো জাঁচ জোকো, আসো মেংচে আকুহা আপনিহিং দোসরাহিংপা তুলনা মোজোপা আপনিকো তোইতা গর্ব জোকো ছুরোওয়া। হাংপাতানাহা তাংসারাং আপনিকো ব্যাহা আপনিরাং পুনেরোওয়া।
য়্যইদি ঝিচামুংওয়াবিহা তাংসা আপনিকো এনতাওয়া নুওয়াংবিহা য়্যইদি ঝিপামবিহিংপা পিচাচোচানেরোওয়া। ধোকাতা মোপোরে। সেংজাহিংয়া হাংসুরে ঠট্টা জোকো মাছু, হাংপাতানাহা দিংঙাহা হাইকো অংটি মি, আকো ফলরাং মুংচামগা। হাংসু আপনিকো পাপ জিংওয়া লোংস্ত্যাইওয়াকো অংটি মি, আকুহা আপনিকো পাপ জিংওয়া লোংস্ত্যাইওয়াসোরাং নাশ জিংওয়াকো কটনি জোরোওয়া, আদো হাংসু পবিত্র লাংবেকো সোতা অংটি মি, আকুহা পবিত্র লাংবেসোরাং হাত্রংরে মিসিওয়া সাদিকো কটনি জোরোওয়া। ভলাই জোওয়া কামতা য়াংবিহা য়ামদিংরোওয়া, হাংপাতানাহা য়াংবিমি নিরাশ জিংমসামি ম্যাল্যানাহা ঠিক সময়তা য়াংবিহা কটনি জোরোওয়া। আকো সোতা মৌকা মুংতানি য়াংবিহা তাংসা দিংঙাহিং ভলাই জোসি, বিশেষ জোমসা আবিকো, হাংসু য়াংবিহিংপা দেংওয়াতা ইচো প্যাপ্যাম্যামা নিমমে।
চুবে সৃষ্টি
কাং, কাহা টেরবো টেরবো অক্ষরতা আপনিকো খুইসোরাং নাবিহিং লাদিংয়ো। খ্রীষ্টকো ক্রুসকো কারণসো সতাওয়াট মাজিংকো তামসা বাইরে তাংসা ঠিক তিংপাকো কেংওয়াবিরাং নাবিহিংয়া খতনা জোকো সুজারোওয়া।
হাংপাতানাহা খতনা জোওয়া আপনিবিরে লিংপাং পালন মোজোমগা, আদো নাবিকো জুপাতা পুংটা জোকো সোতা নাবিহা খতনা জোওয়া আবিহা ইচ্ছা জোমগা। আদো প্রভু ইশু খ্রীষ্টকো ক্রুসতা মেংচে পুংটা জোওয়া ল্যামসা কাহা দোসরা নুওয়াংতাহা পুংটা জোমক্যই, হাংপাতানাহা আকো ক্রুসকো সোতারাং কুং সোতাহা বাসিমতিহা ক্রুসতা থ্যইপুনতেমি নিও আসা বাসিমতিকো সোতাহা কাহা ক্রুসতা থ্যইচপুনতেমি নিও। খতনা জোপাদো, মোজোপাদো হাইরে মাজিংমগা, আদো চুবে সৃষ্টি জিংকোহা টেবো নুওয়াংগা। নেহা হাই হাসে ই লিংপাংতা তেইদিং, আবিকো তোইতা আসা সেংজাকো ইস্রাইল জ্যাকো তোইতা তিমেওয়া আসা কৃপা য়ুংকো। নেহা ইসো য়ুতাহা কাহিংয়া হাংসুরে দুঃখ মিচাকো, হাংপাতানাহা কাহা আপনিকো জুপাতাহা ইশুকো মেংটাবি পুউদিংয়ো। ও কুং জেজেংওয়া ডুওয়া এবাই আসা হুম্রিবাই, য়োংকো প্রভু ইশু খ্রীষ্টকো অনুগ্রহহা নাবিকো লাংবেহিংপা নিকো। আমেন।
Toto. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.