গালাতি 1

1কা পাউল খ্রীষ্টকো জেংওয়া পোইং1 জিংকোহা দিংঙাবিকোসো অথবা দিংঙাকো অধিকারসো জেংওয়া মোকো, আদো ইশু খ্রীষ্ট আসা আকুহিং সিপুওয়াসো ঙারোপাওয়া সেংজা আপারাং জেংমগা। 2কা আসা কাহিংপা নিওয়া তাংসা দেংওয়া আপু এবি আসা হুম্ব্রিবিকো কাটুসো গালাতি জায়গাকো মন্ডলিহিং ই চিঠি লাদাংয়ো।

3সেংজা আপা আসা কাবিকো প্রভু ইশু খ্রীষ্টহা নাবিহিং অনুগ্রহ আসা তিমেওয়া পিচাকো। 4আকুরাং ই দুষ্ট সময়সো য়াংবি বাচেকো সোতা য়োংকো সেংজা আপাকো ইচ্ছা অনুসার ইশুহা য়াংবিকো পাপকো সোতা আপনিকো বলি পিচায়ে। 5হাত্রংদো সেংজাকো মহিমা জিংকো। আমেন।

ইচো এনতাওয়া দেরেং

6কা আআংপেপেচপুমি নিও, এসেকো সেন্নেপা খ্রীষ্টকো অনুগ্রহতা মোউওয়াহিং হুইতেমসা নাবিহা দোসরা এনতাওয়া দেরেংতা হুইদিংয়ো। 7আজিপ্পারাং দোসরা হানিরে এনতাওয়া দেরেং মোতো, আদো লেরাহা এপাজিংওয়াবিপারাং নিও, হাংসু খ্রীষ্টকো এনতাওয়া দেরেংহিংয়া বিগারেকো কেংদিংমে। 8কাবিকো হিংপাওয়া এনতাওয়া দেরেং ল্যামসা, দোসরা ইচো দেরেংমি হিংপানাহা আকুহা লোডিংবাকো পোইং জিংদো, কিতা কাবিরাং জিংদো, আকুহা শ্রাপিত জিংকো। 9কাবিহা ই নুওয়াংহা নাগাইসোরাং জাংমগা আসা নেরে জাংরোওয়া, নাবি হানি এনতাওয়া দেরেংহিং গ্রহন জো, আকু ল্যামসা হাংসু নাবিহিং হিংপাবা আকুহা শ্রাপিত জিংকো।

10কা দিংঙাবিহিং য়াংতাপাকো মোকো, আদো কাহা সেংজাহিং য়াংতাপাকো কেংমগা। নেরে কাহা দিংঙাবিকো ইচ্ছা পুরা মেংচে জোকো কেংনাহা কাহা খ্রীষ্টকো ডেইয়া মোকো।

পাউলহিং মোউওয়া

11ও ডুওয়া এবাই আসা হুম্রিবাই, কা নাবিহিংয়া ই নুওয়াং গেকো তাওয়া ইচ্ছা জোরোওয়া, কুং হিংপাওয়া এনতাওয়া দেরেংহা দিংঙাকো নোচেংসো নোপাওয়া মোকো। 12কাহা ইহা হানি দিংঙাকোসোরে মুংচাওয়া মোকো, আসা হাংসুরে কাহিংয়া ঝিপাওয়ারে মোকো, আদো ইহা ইশু খ্রীষ্ট2 আপনিরাং কাহিং তিংপাওয়াকো সোতা কা মুংয়ে। 13কা নাগাই য়হুদি তাংজিকো য়োংতোং নিনুহা কুং তেই-য়ুংওয়াবিহা নাবিরাং গেমি নিও। আত্রংহা কাহা লামতুওয়া মাতাপা সেংজাকো মন্ডলিবিহিং সতায়য়ে আসা ছুওয়া সেই ইহিংয়া দাংপাকো কেংয়ে। 14কা আত্রংহা য়হুদি তাংজিহিং মানেওয়া কুং ফিতোবিতাহা কা সিওপারাং নাগাই গ্যইওয়া নিমগা। কুং আজা-আটাবিকো ল্যইচ্যইপ্যইচ্যইহিংয়া কাহা সিওপারাং মানেওয়া নিমগা।

15আদো সেংজাহা কাহিংয়া আয়ুকো ফেমাতা নিনুসোরাং লারাংসা জোয়ে, আসা আপনিকো অনুগ্রহসো মোউয়ে। 16আকুরাং কুংসো দোসরা জ্যাবিকোতা এনতাওয়া দেরেং চোইপাকো তামসা আপনিকো চেংওয়াহিং কুংতা তিংপাকো য়াংতায়ে। আত্রংহা কাহা হানি দিংঙাহিংপারে সল্লাহ মালাংতো। 17না কারোমা নাগাইকো জেংওয়া পোইংবিকোতা কা সল্লাহ য়াকাকো হোনা না য়রুশালেম শহরতা হোনা, আদো কা সেন্নেপা অরব দেশতা হোয়ে আসা আকো নোইতা দমস্কস শহরতা লায়োংয়ে,

18আসা লো সুংনিং নোইতা মেংচে কা পত্রসহিং দোসপাকো য়রুশালেমতা হোয়ে আসা আউতা আকুহিংপা চিত্তা পোন্দ্র দিন চোইপা য়ুংয়ে। 19আদো কা আউতা প্রভুকো এ য়াকুবহিং ল্যামসা দোসরা জেংওয়া পোইংবিহিংয়া মোদোসুতো। 20সেংজাকো নাগাইতা কা নাবিহিং দেংপাকো কেংরোওয়া, কি কা হাং জাংদিংমমে, আকুহা প্যায়োং মোকো। 21আকো নোইতা কা সিরিয়াতা আসা কিলিকিয়াকো জায়গাবিতা হোয়ে। 22আত্রং চোইপা য়হুদিয়াতা নিওয়া খ্রীষ্টকো মন্ডলিবিহা কাহিংয়া মানাইয়াংমগা। 23আবিহা কুং বিষয়তা এপা মেংচে হিংমি নিমগা, “য়াংবিহিং সতায়ওয়া দিংঙাহা, হানি দেংওয়াহিং দাংপাকো কেংদিংমমে, নেহা আকুহা আকু দেংওয়াহিংনাং হিংপোইদিংত্যাহা।” 24এপারাং আবিহা কুং কারণ সেংজাহিং মহিমা জোয়ে।