প্রেরিত 11

পত্রসহা য়রুশালেমকো মন্ডলিতা আপনিকো কামকো তোইতা জাংওয়া

1নেহা দোসরা জ্যাকো দিংঙাবিরে সেংজাকো য়্যইদিতা দেংয়ো তাওয়া নুওয়াংহা দোসরা জেংওয়া পোইংবি আসা য়হুদিয়া হুরাপা য়ুংওয়া প্রভুকোতা দেংওয়াবিরে হিংয়ে। 2হাত্রং পত্রস য়রুশালেমতা লে, আত্রংহা খতনা জোনেরোওয়া তাওয়া দেংওয়াবিহা আকুহিংয়া এপা জাংমসা দোষ তিংপায়ে, 3“নাতিহা খতনা মোজোওয়া দিংঙাবিকোতা হোমসা হাংপা চা-আংমগা?”

4আত্রং পত্রসহা আকো তোইতা হাং-হাং জিংমে আকু তাংসা নুওয়াং আবিহিং ল্যায়ে। 5“কা জোপ্পা শহরতা পাচাইদিংমি। আত্রংহা কা দর্শনতা তিংমি। লোডিংবাসোহা ডিদ্যা সিংদিসো জিংওয়া চাদ্রি হুইপাদাংওয়া কা তিংয়ো। আকুহা কুং আবেইতা দেরেয়ে। 6কা এনতাপা ন্যইনুওয়া আউতাহা সাতা তুইওয়া চাতুওয়া সেংচেং আসা চামতুওয়া বাদাংমসা বাংওয়া চুংচাকো সেংচেংবি আসা ডিংবাকো জিয়া-জিপেইবি তিংয়ে। 7আকো নোইতাহা কাহা এপা জাংওয়া শব্দ হিংয়ে, ‘পত্রস লো, ইবিহিং স্যামসা চা’। 8আদো কাহা জাংয়ে, ‘মোকোমি প্রভু! এপাজিংওয়া হেপা চাকোগা, এপা চামতুওয়া মেংতাওয়াহা কাহা হাত্রংরে মাচায়াংনা।’ 9আদো ন্যাসারাং লোডিংবাসো লেওয়া শব্দহা কাহিংয়া জাংয়ে, ‘সেংজাহা হানিহিং চাতুমি তামসা জাংমিনি! আকুহিংয়া নাতিহা হাংপা চামতুওয়া নোমগা।’ 10সুংকোই চোইপা এপারাং জিংপুয়ে, আসা আকুহা ন্যাসারাং তাংসা লোডিংবাতা পুচায়ে। 11আত্রংতারাং কইসোরিয়াসো কাহিং মোউপোংকো নিংপুওয়া সুংচো দিংঙাবিহা কুং য়ুংওয়া সাতা দেয়োংয়ে। 12পবিত্র লাংবেহা কাহিং মাহ্যারো মাতাপা আবিহিংপা চিত্তা হোকো জাংয়ে। ই তুচো এবিরে কাহিংপারাং ওয়াংয়ে, আসা কাবিহা কোর্নোলিয়োসকো সাতা হোয়ে। 13কোর্নোলিয়োসহা ইচো লোডিংবাকো পোইং আকো সাতা জামসা এপা জাংওয়া কাবিহিং ল্যায়ে। আকু লোডিংবাকো পোইংহা আকুহিংয়া এপা জাংমি নিমি, ‘জোপ্পা শহরতা য়ুংওয়া পত্রস মিং নিওয়া সিমনহিং মোউপাতু। 14আকুহা নাতিহিংয়া সেংজাকো য়্যইদি হিংপারোওয়া, আকু য়্যইদিসোহা নাতিসো নাকো তাংসা প্যাপ্যাম্যাম্যাবি উদ্ধার মুংচারোওয়া।’

15“হাত্রং কা দিংঙাবিহিং জাংদাং, আত্রংহা নাগাই কাবিকো তোইতা পবিত্র লাংবে হুইমবেপারাং, আবিকোতারে পবিত্র লাংবে হুইয়ে। 16আত্রংহা প্রভুকো জাংওয়া কা নোয়ে, ‘য়হুন্নাহা তিসো বাপ্তিস্মা পিচামি নিমগা, আদো নাবিকোহা পবিত্র লাংবেসো বাপ্তিস্মা জিংরোওয়া।’ 17কাবিহা প্রভু ইশু খ্রীষ্টতা দেংয়ো আসা সেংজাহা কাবিহিংয়া পবিত্র লাংবে পিচায়ে। এপা জোমসারাং আকু দোসরা জ্যাকো দিংঙাবিরে সেংজাকো তোইতা দেংমসা আকোসো পবিত্র লাংবে মুংচায়ে। এপারাং সেংজা আপনিরাং পবিত্র লাংবে পিচানাহা কাহা আকুহিংয়া হেপা য়োইকোগা?”

18ই নুওয়াং হিংনুওয়া প্রভুহিং দেংওয়া য়হুদিবিহা পত্রসহিংয়া মাতুপা মাজাংতো, আসা “পাপহিং হুইতেমসা লায়োংকো আসা হাত্রংরে মিসিওয়া সাদি মুংচাকো মৌকা দোসরা জ্যাকো দিংঙাবিহিংনে পিচায়ে তামসা আবিহা সেংজাহিং তাচায়ে।”

এন্টিঅখিয়া শহরকো মন্ডলি

19স্তিফনস সিপুনতেনুকো নোইতা প্রভুকোতা দেংবিহিংয়া ঘিইপুওয়াকো সোতা উইসে দিংঙাবি ক্যাপে, লেরাহা ফৌনিকে জায়গাবিতা দেকায়ে, লেরাহা সাইপ্রস বোইদাতা দেকায়ে আসা লেরাহা এন্টিঅখিয়া শহর চোইপা দেকায়ে। নাগাইহা আবিহা য়হুদিবিহিং মেংচে এনতাওয়া দেরেং হিংপায়ে। 20আদো আবিহা সাইপ্রস বোইদা আসা কুরিনি লোইসো ওয়াংওয়া ইচো নিহসো প্রভুকো য়োংতোংবিহা এন্টিঅখিয়াতা হোমসা দোসরা জ্যাকো দিংঙাবিহিংনে প্রভু ইশুকো এনতাওয়া দেরেং হিংপায়ে। 21প্রভুকো সে আবিহিংপা নিমকো সোতা উইসে দিংঙাবিহা দেংয়ে আসা প্রভুকোতা লায়োংয়ে।

22হাত্রং ই দেরেং য়রুশালেমতা নিওয়া মন্ডলিবিকো নানুংতা দেকা, আত্রংহা মন্ডলিকো ওয়ারাংপাবিহা বার্নাবাসহিংয়া এন্টিঅখিয়াতা নিংপিয়ে। 23আকুহা এন্টিঅখিয়াতা দেয়োংনুওয়া সেংজাহা আকু মন্ডলিকো দিংঙাবিহিং লামতুপা জোওয়া আসা আশিষ পিচাওয়া তিংমসা বার্নাবাসহা গাগ্রুপে। আকুহা তাংসাহিং তুংসিং নাপোসোরাং সেংজাকো তোইতা দেংওয়াহা এপারাং হাত্রংদো নিকো তামসা জাংতেয়ে। 24বার্নাবাসহা ইচো পবিত্র লাংবে আসা দেংওয়াতা মেইওয়া চোসোওয়া দিংঙা নিমি, আকো সোতারাং দিংঙাবিকো উইসে পারা সেংজাকোতা লায়োংয়ে।

25আত্রংহা বার্নাবাসহা শাউলহিং মোকাকো তার্সোস শহরতা হোয়ে। 26আসা হাত্রং বার্নাবাসহা আকুহিং দোসু, আত্রংহা আকুহিংয়া এন্টিঅখিয়াতা পারায়ে। আসা আবি নিহসোসা লো ইনিং চোইপা এন্টিঅখিয়াতারাং মন্ডলিকো দিংঙাবিহিংপা সেওয়া জোমসা উইসে দিংঙাহিং ঝিপায়ে। আসা এন্টিঅখিয়াতারাং হাংসুরোমা নাগাইহা প্রভুহিং দেংবিহিংয়া খ্রীষ্টিয়ান তামগা।

27আত্রংহা লেরা অগমবক্তাবিহা য়রুশালেমসোহা এন্টিঅখিয়াতা ওয়াংয়ে। 28আবিকো প্যাকোতাহা অগাবাস মিং নিওয়া ইচো দিংঙা জামসা তাংসা বাসিমতিতা টেবো অনিকাল জিংদাংয়ে তামসা পবিত্র লাংবেসো অগমবানি য়্যইয়ে। (আকু অনিকালহা টেবো জাইপু লোদিয়াসকো সময়তা জিংপুয়ে।) 29আকু অগাবাসকো জাংওয়া নুওয়াং হিংমসা য়োংতোংবিহা আপনি আপনিকো ছুওয়া সেই য়হুদিয়াতা য়ুংওয়া প্রভুতা দেংওয়াবিহিং য়ুজ্রুকো সোতা ভেটি কাইপুকো নোয়ে। 30আবিহা এপারাং জোয়ে, বার্নাবাস আসা শাউলকো খুইসো আবিকো ভেতিহা য়রুশালেম মন্ডলিকো মাটা ওয়ারাংপাবিকোতা কাইপুয়ে।