Saame 81

1 Ko e enginaki ke fakamālō ki he ʻOtua. 4 ʻOku totonu ke fai ia ki he ʻOtua koeʻuhi ko ʻene ngaahi meʻaʻofa. 8 ʻOku enginakiʻi ʻe he ʻOtua kenau talangofua, ʻo ne fakahā ʻenau talangataʻa, ʻaia ʻoku nau kovi ai.

Ki he Takimuʻa ʻi he Kitita, ko e Saame ʻa ʻAsafi.

1Hiva kalanga ki he ʻOtua ko hotau mālohi,

kalanga fakafiefia ki he ʻOtua ʻo Sēkope.

2Toʻo mai ʻae saame, pea ʻomi ʻae kihiʻi lali,

mo e haʻape mālie mo e saliteli.

3Ifi mālohi ʻae meʻa lea ʻi he māhina foʻou,

ʻi he ʻaho kuo tuʻutuʻuni, ʻi hotau ʻaho kātoanga mamalu.

4He ko e fekau eni ki ʻIsileli,

mo e fono ʻae ʻOtua ʻo Sēkope.

5Naʻa ne tuʻutuʻuni eni ʻia Siosefa ko e fakamoʻoni,

ʻi heʻene ʻalu atu ʻi he fonua ko ʻIsipite:

ʻaia naʻaku fanongo ai ki he lea naʻe ʻikai te u ʻiloa.

6“Naʻaku hiki ʻae kavenga mei hono uma:

naʻe hao hono nima mei he ngaahi kato.

7Naʻa ke ui ʻi he mamahi, pea ne u fakamoʻui koe:

naʻaku talia koe ʻi he potu lilo ʻoe mana: ne u ʻahiʻahiʻi koe ʻi he vai ʻo Melipa. Sila.

8Fanongo, ʻE hoku kakai,

pea te u fakapapau kiate koe:

ʻE ʻIsileli, kapau te ke tokanga mai kiate au;

9‌ʻOua naʻa fokotuʻu ha ʻotua foʻou kiate koe:

pea ʻe ʻikai te ke hū ki ha ʻotua foʻou.

10Ko au Sihova ko ho ʻOtua,

naʻaku ʻomi koe mei he fonua ko ʻIsipite:

fakamanga ho ngutu ke lahi, pea te u fakafonu ia.

11“Ka naʻe ʻikai fie tokanga ʻa hoku kakai ki hoku leʻo;

pea naʻe ʻikai manako ʻa ʻIsileli kiate au.

12Ko ia ne u fakatukutukuʻi ai ʻakinautolu ki he holi kovi ʻa honau loto:

pea naʻa nau ʻaʻeva ʻi heʻenau ngaahi filioʻi.

13‌ʻAmusiaange ʻeau kuo tokanga ʻa hoku kakai kiate au,

pea ʻeveʻeva ʻa ʻIsileli ʻi hoku ngaahi hala!

14Pehē, kuo u fakavaivaiʻi leva honau ngaahi fili,

ʻo mafao atu hoku nima ki honau kau fakamamahi.

15Pea ko e kau fehiʻa kia Sihova kuo nau fakavaivai ʻakinautolu kiate ia:

ka ʻe tolonga ʻo taʻengata honau ngaahi ʻaho.

16Kuo ne fafanga foki ʻakinautolu ʻaki ʻae uite mātuʻaki lelei:

pea u fakamākona ʻaki ʻakinautolu ʻae hone mei he maka.”