Saame 114

1–8 Ko e enginaki ke faʻifaʻitaki ki he ngaahi meʻa kuo ngaohi, pea manavahē ki he ʻOtua ʻi hono siasi.

1‌ʻI he ʻalu atu ʻa ʻIsileli mei ʻIsipite,

ko e fale ʻo Sēkope mei he kakai ʻoe lea kehe;

2Ko hono faletapu ʻa Siuta,

mo hono puleʻanga ʻa ʻIsileli.

3Naʻe mamata ki ai ʻae tahi, pea hola ai:

naʻe tekeʻi atu ʻo fakaholomui ʻa Sioatani.

4Naʻe hopohopo ʻae ngaahi moʻunga ʻo hangē ko e fanga sipitangata,

mo e ngaahi foʻi moʻunga ʻo hangē ko e fanga lami.

5Ko e hā naʻe hoko kiate koe, ʻa koe ko e tahi, koeʻuhi naʻa ke hola ai?

ʻA koe Sioatani, koeʻuhi ke tekeʻi atu ʻo fakaholomui koe?

6‌ʻAe ngaahi moʻunga, koeʻuhi naʻa mou hopohopo ai ʻo hangē ko e fanga sipitangata;

mo kimoutolu ʻae ngaahi foʻi moʻunga, ʻo hangē ko e fanga lami?

7‌ʻA koe ko māmani, ke ke tetetete ʻi he ʻao ʻoe ʻEiki,

ʻi he ʻao ʻoe ʻOtua ʻo Sēkope;

8‌ʻAia naʻa ne liliu ʻae maka ko e anovai,

mo e maka afi ko e matavai.