BaGalatiya

Lugwalo LwaPawulu Ku

BAGALATIYA

Manjililo

Ibbuku lyaBaGalatiya lyakalembwa amutumwa Pawulu (BaGalatiya 1: 1). Lwakali lugwalo Pawulu ndwaakalembela mbungano zyaku Galatiya akati kachiindi chilimbuli minyaka ilimakumi aane aminyaka ilimusanu ayitatu kuyoosika kuminyaka ilimakumi alimusanu aminyaka ilimusanu ayibili kaali Jesu wazyalwa. BaGalatiya kuyeeyelwa kuti bakali bantu bakali kukkala muGalatiya muchilikiti chaRoma. Basikufunkununa tabakwe kasimpe loko pe kuti Pawulu wakali kuli naakalemba lugwalo oolu, pesi chisi chaEfeso aKkorinte ngiimasena akonzya kuba ngawo.

Pawulu wakalembela banaKkirisitu, baJuda abateesi baJuda pe, mumbungano zili muGalatiya. Wakalemba kalangene kapati kuti akazyaniye anjiisyo yakubeja eeyo yamba kuti banaKkirisitu beelede kutobela milawu yamaJuda ili muChizuminano Chakale, kapati kupalulwa. Kwakali nkamu yabantu akati kabanaKkirisitu itegwa mbaJuda bakalikuyanda banaKkirisitu batali baJuda kuti bapalulwe. Alubo bakabuzisisya atala anguzu zyabutumwa bwaPawulu. Pawulu wakakwabilila butumwa bwakwe akubaambila lumwi lwalwano lwakwe (BaGalatiya 1:11—2:14) alimwi wakalwanina makani mabotu, akupandulula kuti lufutuko lujanwa luzutu mukwiinda mulusyomo muli Jesu Kkirisitu (BaGalatiya 2:16). Niimpindu yabuuya bwaLeza mbwatondeezya, peepe bantu nzibachita.

Bwiime

Pawulu utalika lugwalo lwakwe akujuzya imbungano zilimuGalatiya (BaGalatiya 1:1-5)

Eelyo Pawulu upandulula atala abuumi bwakwe mbwakapona kuti akwabilile cheelelo chakwe chakuyiisya akutondeezya kuti wakeezya kuponena mumulawu pesi teezyakabeleka pe (BaGalatiya 1:6—2:21)

Chitobela upandulula lubo atala amulimu wamulawu aluzyalo mulufutuko (BaGalatiya 3:1—4:31)

Eelyo upa aamwi malayilile akupona bunaKkirisitu bululeme (BaGalatiya 5:1—6:10)

Pawulu ujinsya lugwalo lwakwe akujuzya akubakombelezya kuti kuchitululwa kuba muntu mupya aLeza zilikabotu kapati kwiinda milawu yaanze, ilimbuli kupalulwa (BaGalatiya 6:11-18)