Tonga Translation Project
BaKkolose 2
Nkaambo ndiyanda kuti muzibe kapati loko mundipengeleka nkaambo kanu, alimwi abaabo bali kuLayodisiya, abaabo boonse batanandibona, kuti myoyo yabo ikasungwazigwe mbuli mbubakaswanizigwa aamwi muluyando, kuti babe abuvubi boonse oobo buzwa kukumvwisisya kwachoonzyo aluzibo lwansiiswa yaLeza, lwaKkirisitu, 1mulinguwe mubusisidwe boonse buvubi bwabusongo aluzibo.
Ndaamba eechi, kuchitila kuti kutabi muntu naba uumwi umweena amajwi ataluleme pe. Nkaambo nikuba kuti nsiwo mumubili pe, anukuti ndilaamwi andinywe mumuuya, kandilikubotelwa kubona mabambe mabotu aanu amukujatisisya kwalusyomo lwanu muli Kkirisitu.
Buumi Buzwide Muli Kkirisitu
Nkikaako mbuli mbumwakamutambula Kkirisitu Jesu mbuli Mwami, aboobo amupone mulinguwe, kamuzyatide muyanda akuyakwa mulinguwe, akuyakwa mulusyomo, mbuli mbumwakayiisigwa, kamukkalilide mukupa kulumba.
Amuchenjelele kuti kutabi naba uumwi umuleyesya alweeno zyabuyo azeezyo ziyoomutola munzila italuleme, mukwiinda muziyanza zyabuntu, amukwiinda mumyuuya yanyika, alimwi itali mukwiinda muli Kkirisitu pe.
Nkaambo mulinguwe mumubili wakwe woonse mubuzwide bunaLeza, 2 alimwi mwakeetwa kubuumi buzwide mulinguwe, nguunguwe mutwe wanguzu zyoonse abweendelezi.
Mulinguwe lubo mwakapalulwa abupalulwe butali bwakachitwa amaanza pe, akugwisya nyama mumubili mukwiinda mubupalulwe bwakachitwa aKkirisitu; alimwi mwakavwikkwa aamwi anguwe mulubbapatizyo, oomo mumwakabusigwa aamwi anguwe lubo kwiinda mulusyomo lulimunguzu zyaLeza, ooyo wakamubusya kuzwa kubafu. Alimwi inywe, nimwakalifwide muzibi amukutapalulwa kwamibili yanu, Leza wakamubusya aamwi aKkirisitu, kali watulekelela milandu yesu yoonse, wakamweya eeyo milandu yakali kutwaanga kumulawu; eeyi wakibikka ambali, akuyigankamina achiingano. 3 Nakamana kumwayisya beendelezi anguzu akuchita chitondezyo chabo antanganana, kali kubazunda imwini mukwiinda muchiingano chakwe. 4
Nkikaako kutabi naba uumwi umubeteka atala achakulya nikuba kunywa nikuba kubamba ipobwe nikuba kukkala kwamweezi nikuba buzuba bwasabata. 5 Eezi mweenzule luzutu wacheecho chiyoobuza; pesi chachoonzyo nguKkirisitu lwakwe. Kutabi naba uumwi umubeteka, kutabi naba uumwi upawupa kukulifwinsya akukomba baangelo, akukakatila kuzilengano, bazwide kulikankayizya amizeezo yabuntu, 6alimwi kutali kujatilila kuMutwe, ooko nkunkuko mubili woonse, kukutawukilwa amukukamantana aamwi mukwiinda mukuswanizya amalambi Nikuli, zilakomena akukomezya kuzwa kuliLeza.
Kufwa aKubuka Aamwi aKkirisitu
Kuti aKkirisitu mwakafwa aamwi munguzu zyamyuuya yanyika, nkaamboonzi nimuchipona mbuli bakunyika? Nkaamboonzi nimulibombya kumilawu, “Mutajati,” “Mutalabili,” “Mutagumi”? 8 Zintu eezyo zyoonse zilooba mbuli mukubeleka kwazyo, mukwiinda mumalayilile anjiisyo zyamuntu? Zintu eezi zilimubwiime bwabusongo akusungwazya bukombi bwabo akulibombya kwabubeji akubelesya chabukali kumubili, pesi nzyabiyo mukulanga muli zyamubili.
Source notes (8)
- Cross-reference Ay 45:3.
- Cross-reference Ef 1:21-22.
- Cross-reference Ef 1:21.
- Cross-reference Rom 14:1-12.
- Cross-reference Ef 1:23.
- Cross-reference Ef 1:22; 4:16.
- Cross-reference Gal 4:3.
- Cross-reference Ay 29:13; Mkk 7:7.
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.