Tonga Translation Project
2 Timoti 3
Mazuba Akumamanino
Pesi mvwisisisya eechi, kuti mumazuba akumamanino kuyooza zyiindi zikataazya. Nkaambo bantu bayooba basikuliyanda, abasimuyanda mali, abasikulisumpula, abalyuuma akaango, abasikutukila Leza, abatalemeki bazyali babo, abatalumbi, abataluleme, batakwe luyando, abatalekeleli, abasikubeja, abatalizyotololi, abasibukali, abasula bubotu, abasikwaaba bamwi, abatayeeyi, abayumumutwe, abasikuyanda bubi kwiinda kuyanda Leza, kabajisi chiimo chabukombi pesi kabakaka nguzu zyabo. Kubatantamuka bantu bali boobo. Nkaambo akati kabo kuli baabo bayinka mumaanda kukweeneena banakazi bakompeme, balemedwe azibi akuleesegwa azisusi zyamubili. Banakazi aaba balayiiya chiindi choonse pesi tabasiki kuluzibo lwakasimpe. 1 Mbuli Janesi aJamburesi bakakazya Mozesi, aboobo alabo bantu aaba bakazya kasimpe, mbantu balamizeezo ikompeme alimwi lusyomo lwabo talugwasyi pe; pesi tabakwe kuyoosika kule pe, nkaambo bufubafuba bwabo buyooba antanganana kuli boonse, mbuli kwakali bwabaalumi aabo babili.
Malayilile Akumamanino
Lino wakatobelezya kuyiisya kwangu akupona kwangu akudunamina kwangu mubuumi alusyomo lwangu amoyo mulamfu aluyando lwangu akukakatila kwangu, 2akupenzegwa kwangu amapenzi angu nzyakandiwida kuAntiyokki, akuIkkoniyamu akuLisitira, nkupenzegwa kuli biyeni nkundakakakatila; anukuti kuli nzyoonse Mwami wakandivuna. Nichoonzyo aabo boonse bayanda kupona buumi bwabuLeza muli Kkirisitu Jesu bayoopenzegwa, kakuli bantu babi abasikweena bayooyindilila, basikweena abasikweenwa. Pesi mbuli nduwe, inkilila kunembo muli nchuwakayiiya anchuwakasyoma kapati, kuzi kuli ooyo nkwakachiyiiya alimwi biyeni kuzwa kubuniini bwako ulaazi malembe asalala akonzya kukulayilila kulufutuko mukwiinda mulusyomo muliKkirisitu Jesu. Woonse malembe akayoyelwa aLeza alimwi3 alabeleka kukuyiisya akukukalalila akukululamika akukulayilila mubululami, kuchitila kuti muntu waLeza azulile, alibambile nkaambo kamulimu mubotu woonse.
Source notes (3)
- Cross-reference Kul 7:11.
- Cross-reference Inch 13:14-52; Inch 14:1-20; 16:1-5.
- Footnote Nikuba Woonse malembe akayoyelwa aLeza alimwi
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.