Tonga Translation Project
2 Joni 1
Kuzwa kuMwaalu.
Kumwanakazi wakasalwa abana bakwe, aabo mbindiyandisya, alimwi peepe lwangu luzutu pesi aboonse bazi kasimpe, ankaambo kakasimpe aako kakkalilide mulindiswe alimwi kayooba andiswe kwalyoonse.
Luzyalo, luse aluumuno luyooba andiswe, kuzwa kuli Leza Taata alimwi akuli Jesu Kkirisitu Mwana Mulombe waWisi, mukasimpe aluyando.
Kasimpe Aluyando
Ndakabotelwa kapati kujana bamwi babana bako kabapona mukasimpe, mbuli mbutwakalayililwa aTaata. Alimwi lino ndakukumbila, yoomwanakazi, kutali kuti ndiliikukulembela mulawu mupya pe, pesi ooyo ngutwakalaawo kuzwa kumatalikilo, kuti tuyandane. Alimwi oolu nduluyando, kuti tutobele milawu yakwe, ooyu nguumulawu, mbuli mbumwakamvwa kuzwa kumatilikilo, kuti tupone muluyando.
Nkaambo basikuchenga bazula kale munyika, bantu batakwe kuyoozumina kuboola kwaJesu Kkirisitu mumubili, ooyo uli boobo ngusikuchenga alimwi ukazya Kkirisitu. Ngamulilingule, kuti mutasweekelwi nzimwakabelekela,1 pesi kuti mukajane mpindu izulide.
Kufumbwa uyinka anembo alimwi katakkalilili munjiisyo yaKkirisitu takwe Leza pe, ooyo ukkalilila munjiisyo ulaabo boonse Taata aMwana Mulombe. Kuti umwi waza kulindinywe alimwi katayeti eeyi njiisyo, mutamutambuli muŋanda nikuba kumujuzya, nkaambo ooyo umujuzya, waabana mulimu wakwe mubi.
Majwi Akumamanino
Nikuba kuti ndijisi zyiingi zyakumulembela, tandikwe kubelesya mulende apepa pe, pesi ndili abulangilizi bwakuza kuti ndizoomubone alimwi ndizoowambuule andinywe katulangene, kuchitila kuti lukondo lwesu lukazulile.
Bana bamwananyokwe musale balakujuzya.
Source notes (1)
- Footnote amwi malembe aamba kuti nzitwakabelekela
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.