1 Timoti 3

Bazulidi Mumbungano

1Kwaamba ooku nkwachoonzyo: Kuti umwi wayanda mulimu wabuzulidi, wayanda mulimu mubotu. 2Lino muzulidi weelede kuba utakwe kampenda, mulumi wamwanakazi uumwi, ulaamoyo mubombe, ulizyotolola, uli achiwa chibotu, uyobolola beenzu, ukonzya kuyiisya, 3peepe ukolwa, peepe sinkondo pesi mubombe, peepe ukazyana, alimwi peepe simuyanda imali. 4Weelede kweendelezya ŋanda yakwe kabotu, uyiisya bana bakwe chakulibombya akulemeka munzila yoonse; 5nkaambo kuti muntu katakonzyi kubamba kabotu ŋanda yakwe, ngoliibamba biyeni mbungano yaLeza? 6Tayelede kuba mukombi mupya pe, ambweni ngoolalisumpula mpawo awide muchisubulo mbuli Sikuchenga; 7weelede alubo kuba ampuwo mbotu kuli bali kunze, ambweni nga ulawida mukuweelwa amukakole kaSikuchenga.1

Basikuwutawuka Mumbungano

8Basikuwutawuka kulikozyene beelede kuba balemekeka, basyomeka, alimwi peepe bakolwi, peepe batangazu kukujana; 9beelede kujatisya nsiinswa yalusyomo amoyo ululeme. 10Alimwi lutaanzi mweelede mubasunke lubo; eelyo naa bajanika kabatakwe kampenda lino ngababeleke mbuli basikuwutawuka. 11Alabo banakazi babo kulikozyene beelede kuba balemekeka, peepe basampawula, pesi balibatamika, basyomeka muzintu zyoonse. 12Basikuwutawuka beelede kuba amwanakazi uumwi, alimwi bakonzye kweendelezya kabotu bana babo antoomwe aŋanda yabo; 13nkaambo aabo babeleka kabotu mbuli basikuwutawuka, balalijanina impuwo mbotu alimwi alubo abusichaamba bupati mulusyomo luli muli Kkirisitu Jesu.

Insiinswa Mpati yaLusyomo Lwesu

14Ndilangilila kuza kuli ndinywe chakufwambana, pesi ndiliikumulembela malayilile aaya kuli ndinywe kuchitila kuti, 15naa ndachedwa kuza, muyooziba mbumweelede kulibamba muŋanda yaLeza, eeyo ilimbungano yaLeza upona, musemo alimwi intalisyo yakasimpe. 16Kakutakwe kudoneeka, tulalyaambilila, niinsinswa yabukombi bwesu:

Wakaliboniya mumubili,

wakalitondeezya muMuuya,

wakabonwa abaangelo,

wakakambawukwa akati kamanyika,

wakasyomwa munyika,

wakatolwa mubulemu.