Tonga Translation Project
1 Joni 1
Ijwi lyaBuumi
Tuliikumulembela atala ajwi lyabuumi, eelyo lyakaliwo kuzwa kumatalikilo, nditwakamvwa, akubona ameso eesu, nditwakalanga mpawo twalijata amaboko eesu, buumi oobo bwakayubununwa, alimwi twakabubona, mpawo tulibakamboni kuli mbubo, akumwaambila buumi oobo butamani bwakali aTaata alimwi bwakayubununwa kulindiswe. Tuliikumwaambila eecho nchitwakabona akumvwa, kuchitila kuti mube abulidilano mbutuli laabo iswe aTaata aMwana wakwe Mulombe Jesu Kkirisitu. Tuliikumulembela eechi kuchitila kuti lukondo lwesu1 luzulile.
Leza nguMumuni
Aaya ngiimakani ngitwakamvwa kuzwa kuMwana wakwe Mulombe alimwi ngitumwaambila, kuti Leza mumuni alimwi mulinguwe tamukwe mudima pe abuniini. Naa twaamba kuti tuli abulidilano anguwe pesi katucheenda mumudima, tulabeja alimwi tatuponi mukasimpe pe, pesi naa tweendela mumumuni, mbuli lwakwe mbwali mumumuni, tuli abulyidilano umwi awumwi, alimwi bulowa bwaJesu, Mwana wakwe mulombe bulatusalazya kuzwa kuzibi choonse.
Naa twaamba kuti tatukwe chibi, twalyeena lwesu, alimwi kasimpe takali mulindiswe pe. Naa twalyaamba zibi zyesu kuliLeza, ulasyomeka alimwi uliluleme, mpawo uyoolekelela zibi zyesu akutusalazya kuzwa mukutalulama kwesu koonse. Naa twaamba kuti tatubisizye pe, tuliikumuchita mubeji, alimwi ijwi lyakwe talili mulindiswe pe.
Source notes (1)
- Footnote Aamwi magwalo achiindi aamba kuti lwabo
Tonga Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.