तिचुरोङ क्येला सारबा करारयि किताबतेबा
प्रेरित 28
पावल माल्टा छो छोम्मुवायि उइयि सा
ङे ल क्याइरे नेमुला लेप्छारते च्येला हति छो छोम्मुवायि उइयि सायि मिनला माल्टा हिना नाङान ङेला छ्या च्युङसोङ। हतिया त्योएङान मितेबे ङेला लेइराङ ङिङच्ये तान्सोङ। नाम क्यापते टाङमु च्युच्युङाति कारणयि हतिबे मे ताङसोङ, राङ ङे पोरोला स्वागत क्याइसोङ। पावलयि छ्याक्पा झि श्यिङ रुदु राङ सो ख्योरे मेला च्युसोङ। मेयि टोएति रुल झि थोन्दे लेप्सोङ। राङ ख्युइ लाक्पाला फेरक्यापते त्येसोङ।
हतिया त्योएङान मितेबे ख्युइ लाक्पाला रुल फेरक्यापते ताताता थोङदे खोरे नाङला नाला छेलसोङ, “धि पि पक्का मिपसोए किङान राङ ना। धि छो छोम्मुवाने सोन्दे त थोन्सोङ हिन्नाङ इनसाफने धि थार माङ्युइसोङ।” हिन्नाङ पावलयि हति रुलला मेला स्युसोङ, राङ खोला च्याङ नोए क्येल माङ्युइसोङ। हिन्नाङ ख्युइ स्हु स्याहाङान ना, अथवा खो हो:प्तामेला घेल्दे स्यिङान ना नाइरे हतिबा कुँरे तोताला छेलसोङ। हिन्नाङ लेइराङ भेला थु कुँरे ताते याङला खोला च्याङ नोए क्याक्याला माथोङाति हतिबे रेँ विचार च्येरे नाला छेलसोङ, “धिता ला हिना।”
हति छो छोम्मुवायि उइयि सायि पब्लियस मिन क्याक्याइबि मुखियायि सा स्यिङ हति सायि धुन धुनला राङ धु। ख्युइ ङेला स्वागत क्याइसोङ, राङ ङिन सुम थु ख्युइ खिमला ङेला ढोम्बो स्यामसोङ। पब्लियसयि आके छ्याबा राङ आउँयि नाझि नाप्पा च्युङदु। पावल हतिला तारु पुइसोङ, राङ ख्युइ चाला मोनलाम क्यापसोङ, राङ रेँ लाक्पा हति थोला पोरते खोला टाक्तु च्युसोङ। धि घटना च्युङ छारते च्येला, हति छो छोम्मुवायि उइयि सायि नाझा होएता मितेबा याङ लेप्सोङ, राङ टाक्तु च्युसोङ। हतिबे काङ च्याने ङेला सम्मान क्याइसोङ। जब ङे डुङगाला स्योन्दे, हतिबे ङेला कोइबा होए चोमयि सामान डुङगाला च्युसोङ।
मालटा छो छोम्मुवायि उइयि सा रोम थु
धा सुमयि च्येला, ङे अलेक्जेन्ड्रियायि डुङगाला स्योन्दे। हति डुङगा कुङगि तुइना धि छो छोम्मुवायि उइयि सा राङ धु। डुङगायि ताङमा भागला छेमा लायि कु कोए क्याक्याइबा धु। सुराकुसाइला क्योपते ङे हतिया ङिन सुम ताते। हतिने ङे नेमु नेमुने रेगियानला क्योपसोङ। ङिन झिकि च्येला च्याङयि हुरबो छोम्मुवा क्यापसोङ, राङ ङाइटोतेला पटिओलिला क्योपसोङ। हतिया ङि भाइबाला ठाते, राङ हतिबे ङेला ङिन तुन थु हतिबा ङ्याबो त्योएयापयि स्युवा क्यापसोङ। हति च्वरा क्याइरे ङे रोमला क्योपसोङ। हतिने ङे होङानयि लोन थोइरे भाइबा ङेला ठातु अप्पियसयि भजार राङ तिन पाटि नाङान साला लेप्छारसोङ। हतिबाला थोङदे पावलयि कजसुबाला कटिनक्याँ नाइसोङ, राङ हिम्मत खुँसोङ।
रोमला पावल
जब ङे रोमला स्युरे, तेहि पावलला सिपाहि झि तारु चिक्पा त्योएयापयि आङ खुसोङ।
ङिन सुमयि च्येला पावलयि यहुदि घोठिङानला क्ये ताङदे चाँसोङ। हतिबा झोम छारते ख्युइ हतिबाला नाइसोङ, “भाइबा, ङाहि ता रेँ देशयि मितेबाला, अथवा ताङबुइ आकेयि लुलामयि विरोधला च्याङ लाइ क्याक्याइबा मेता। हचु हिन्नाङ बन्दि च्युङदे यरुश्लेमने रोमिबे लाने ङाला टोटोता होतो। हतिबे छानबिन क्याइ छारते ङाला स्योएयापयि ङेबा च्याङ माखुबा राङ ङाला तोङसोम क्याइसोङ। हिन्नाङ यहुदिबे विरोध क्याक्याइबाति कैसरयि तेहा स्युवा क्याक्तु ङाला कर क्याइसोङ ङाहि मितेबे विरोधला च्याङ दोष लाइ कियाप ताम माच्युङसोङ।1 हतिचाला ङाहि खे ङ्याबो ठाते ताम नारु खेला क्ये ताताङा ना। चिचालानाना इस्राएलयि आशा सुना हति चाला धि च्यालताला ङा तातामा होतो।”
हतिबे खोला नाइसोङ, “ङेला ता ख्युइ भारेला यहुदियाने च्याङ चिठि खुखुबा मेता। भाइ रेन लेप्ते ख्युइ विरोधला च्याङ अल ताम स्यास्याता वा ताम नानाइबा मेता। हिन्नाङ ख्युइ विचार चि ना, सो ख्योएने ङ्यानसोम होए। चिचालानाना धि तुमयि भारेला ङेला झोम मात्रा छ्या होतो, कि काङ च्याला मितेबा धि भारेला मात्रा ताम नेन्दु।”
तेहि हतिबे ख्युइ चाला ङिन झि तोकि क्याइसोङ, राङ टाँगा लेइराङला मितेबा खो त्योएसा तेहा लेप्सोङ। ख्युइ हतिबाला नामेने कमु थु राङ भाषाण पिन्सोङ, राङ मोशायि ठिम राङ ङोन्सेखिलङानयि किताबने कजसुबायि राज्ययि साछि पिन्सोङ, तेहि येशुयि भारेला हतिबाला हिछे तेरयापयि स्यु क्याइसोङ। ख्युइ नानाइबि ताम चोम राङयि हिछे क्याइसोङ राङ, चोमयि राङ माक्याइसोङ। हतिबा रेँ नाङला मिढिकाला छेलसोङ, राङ क्योबितुइना पावलयि धि च्येस्युवा ताम नाइसोङ, “हतिबे ताङबुइ आकेला यशैया ङोन्सेखिलङानयि लाम्ला पवित्र आत्मायि नानाइबि वचन थारे राङ ना।” धि मितेबे तेहा पुते नोइ,2 “ङ्यान ज्याइ ता खे ङ्यानिन्दु, हिन्नाङ नामयाङ हा:मिकुवा, ताज्याइ ता तेन्दु, हिन्नाङ नाम याङ मिथोङा।” चिचालानाना धि मियि सम बैरागि च्युङदु, राङ हतिबे नामज्यो हो:न्दु, राङ हतिबे रेँ मि रुरुबा धु स्यान अर्थात हतिबे मिकि थोङान ना, नामज्योयि थोइङान ना, समयि हा:कोङान ना राङ लङान ना राङ ङाहि खेला टाक्तु झ्युङान ना।3
“हतिचाला खेला छ्या होतो कि, कि कजसुबायि धि मुक्ति यहुदि मान्ते मितेबे चाला चाँचाँबा होतो, राङ हतिबे थोइङान ना।” [तेहि ख्युइ धि वचन नाइ छारते च्येला, यहुदिबा रेँ नाङला लेइराङ नारे क्याइरे विदा च्युङसोङ।] 4
पावल पुरा लो ङि थु रेँ खर्चला रोमला त्येसोङ, राङ ख्युइ तेहा होङान पोरोला ख्युइ स्वागत क्याइसोङ। ख्युइ खुल्लामखुल्ला राङ घाङान सु मेता कजसुबायि राज्यि टाइक्ये किन, राङ प्रभु येशु ख्रिष्टयि भारेला छो तेरिन।
Source notes (4)
- Cross-reference प्रेरित २५:११
- Cross-reference यशैया ६:९-१०
- Cross-reference यशैया ६:९-१०
- Cross-reference भजनसंग्रह ६७:२; भजनसंग्रह ९०:३; यशैया ४०:५
तिचुरोङ क्येला सारबा करारयि किताबतेबा. Copyright © 2025 The Word for the World International and Tichurong Translation Project, Dolpa, Karnali. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.