Tichurong New Testament
युहान्ना 19
तेहि पिलातसयि येशुला खेरते च्यायि छेरिमिन च्यालता क्याक्तु च्युसोङ। तेहि सिपाहितेबे ख्युइ घोबोला छेरमि टोपो कापसोङ, राङ खोला बैजनी छोइयि कोहिला कापसोङ, राङ ख्युइ धुनला लेप्ते नाइसोङ, “खामसाँ, यहुदिबे क्यालबो!” तेहि हतिबे खोला थालच्या क्यापसोङ।
याङ फिला थोन्दे पिलातसयि हतिबाला नाइसोङ, “तोइ, ङाहि खोला खि तेहा ख्युहि होए, राङ खेला हा:कोरु झ्युकच्याइ, ङाहि खोला च्याङ दोष मिथुवा।” तेहि छेरमि टोपो राङ बैजनी छोइयि कोहिला कोकोना येशु फिला लेप्सोङ, राङ पिलातसयि हतिबाला नाइसोङ, “तोइ, धि मिला!”
जब घोबा पुजारि राङ कोराबातेबे खोला थोङसोङ, हतिबे जु नेन राङ क्ये तोन्सोङ, “हतिला क्रुसला थ्ह, हतिला क्रुसला थ्ह!” पिलातसयि नाइसोङ, “खे राङ धिला क्रुसला पुते थ्ह, चिचालानाना ङाहि धि ला च्याङ दोष मिखुबा!” यहुदिबे खोला नाइसोङ, “ङि ठिम झि होतो, राङ हति ठिम च्वरा हिन्ना धि सि कोहिराङ हुन, चिचालानाना खो खोराङ कजसुबे पिजा हिना नेन्दु।”
धि ताम थोइरे पिलातस झन ख्यारसोङ।1 खो याङ खिम छोम्मुवायि नाङला स्युरे येशुला टिसोङ, “ख्योए काने ना?” हिन्नाङ येशुयि खोला च्याङ मानाइसोङ। हतिचाला पिलातसयि खोला नाइसोङ, “च्हि ख्योए ङा ङ्याबो ताम मिनाइ? ख्योएला तोङयापयि आङ ङाला होतो, राङ ख्योएला क्रुसला धपापयि आङ याङ ङाला होतो नाङान ख्योएला छ्या मेताइ?”
येशुयि जवाक पिन्सोङ, “ख्योएला कजसुबे मापिना नाना ङाहि थोला च्याङ आङ मिहा। हति चाला ङाला ख्युइ लाला तेरङानते झन तिक्पि दोषि हुन।” हतिच्येला पिलातसयि खोला तोङयापयि लेइराङ कोशिश क्याइसोङ। हिन्नाङ यहुदिबे जु नेन राङ क्ये तोन्सोङ, “तेम्बारे ख्युइ धि मिला ताङना ख्योए कैसरयि रबो माना। रेँ राङला क्यालबो हिना नाङान पोरो कैसरयि विरोधला लाँयिन।”
पिलातसयि धि ताम थोइरे येशुला फिला ख्योसोङ, राङ खो? “टोउयि” छ्या नाङानयि साला काङतेला हिब्रुला गब्बथा नेन ल अल भेयापयि ठिला त्येसोङ। हति भेलाते निस्तार कालापसोलयि तयारि ङिन हिना, ङिम्मुइ हा:लाम च्युनङि बजेना माला हिना। पिलातसयि यहुदिबाला नाइसोङ, “तोइ खि क्यालबो!” हिन्नाङ हतिबे जु नेन राङ क्ये तोन्सोङ, “धिला सोए, सोए, धिला क्रुसला थ्ह!” घोबा पुजारिबे जवाक पिन्सोङ, पिलातसयि हतिबाला टिसोङ, “च्हि ङा खि क्यालबोला क्रुसला ध्हच्ये?” “कैसर अर्थात ङि स्यान सुङ क्यालबो मेता।” तेहि ख्युइ येशुला क्रुसला धतु हतिबे लाला सातेलो। हति चाला सिपाहितेबे जिम्माला खेरसोङ।
येशु क्रुसला ताताबा
मत्ति २७:३२-४४; मर्कुस १५:२१-३२; लुका २३:२६-४३
खो खुरि क्रुस खुरते खप्पेर नाङान साला पुइसोङ, काङला हिब्रुला गलगथा नेनलो। हतिया खोला क्रुसला तारेलो राङ खो ङ्याबो स्यान ङि लाङ तारेलो, च्हिला यि च्हिला राङ स्यानतेला स्यान यहला तारेलो, राङ उइला येशुला। पिलातसयि दोष पाना झि याङ टिसोङ, तेहि क्रुसला च्यारसोङ। हतिला धि टि धुलो, “नासरतयि येशु, यहुदिबे क्यालबो।” तेहि यहुदि लेइराङयि हति दोष पानाते टसोङ, चिचालानाना येशु क्रुसला ताताबि सा भजारयि धुनला धुलो। हति हिब्रु, लाटिन राङ ग्रिक क्येला टिदुलो। यहुदिबे घोबा पुजारियिति पिलातसला नाइसोङ, “‘यहुदिबे क्यालबो’ नायाप माना, हिन्नाङ हति यहुदिबे क्यालबो हिना नाइसोङ नाइरे ढोयाप ना।” पिलातसयि जवाक पिन्सोङ, “ङाहि च्हि टिरे, टिरे।”
जब सिपाहियि येशुला क्रुसला तारेलो, हतितुइना ख्युइ कोहिला खेरते ओरला च्यिच्यि थोपयापयि हिसाबला भाग च्हि सोइसोङ। ख्युइ फि कोहिला याङ खेरसोङ, हति कोहिला ते चेचेमा माना तोएने राङ म्हे थु लालाइबा किरबो हिना। हतिचाला हतिबे ख्होरे नाङला नारे क्याइसोङ, “धि मारोल हिन्नाङ धि सुइ होङयाप हिना नाइरे क्यान स्यिङ क्याका।” पवित्रशास्त्रा पुरा होङ नाइरे राङ धि च्युङ शास्त्रा “हतिबे ङाहि कोहिला राराला साला कोइसोङ, फि कोहिलाते क्यानसिङ क्यापसोङ।”2
हति चाला सिपाहितेबे धि लाइ क्याइरे लो। तेहि येशुयि क्रुसयि धुनला ख्युइ आमा, ख्युइ आमायि भैनि, क्लोपासयि भैनि मरियम राङ मरियम मग्दलिनि लाँरे तेतु। जब येशुयि खुरि आमा राङ ख्युइ करि किङान लोब्टु टुला लालाबा थोङसोङ, हतितुइना ख्युइ खुरि आमाला नाइसोङ, “पोमु तेहि, ख्युइ पिजा!” तेहि हति लोब्टुतेलाङ नाइसोङ, “तेहि ख्युइ आमा!” हति भेला ने हति लोब्टुति मोला खुरि खिमला खेरसोङ।
येशु स्यिस्यियायि
मत्ति २६:४५-५६; मर्कुस १५:३३-४१; लुका २३:४४-४९
तहि च्येलाता येशुयि ताम पोरो सिन्सोङ नाइरे हा:कोरे पवित्रशास्त्रा पुरा होङ नाइरे नाइसोङ, “ङा खा कोम्सोङ।”3 खाडे खुवायि खाँखाँबि सअबुझि धुलो। खुवायि खाखा बे कपास होसपयि ढालाला पोरते हति ख्युइ खाला क्यालसोङ।4 तेहि येशुयि खाडे खुवातेबा तुँसोङ, तेहि ख्युइ नाइसोङ, “ता सिन्सोङ,”तेहि ख्युइ घोबो थुल्ला क्याइरे रेँ उ च्येसोङ।5
येशुयि टाङ तोतोला
हति ङिन छेलयापयि ङिनलो। हति चाला यहुदि आङकिङानबे ङालसुइ ङिन स्यिस्यियायि स्हु क्रुसला माभोर नाइरे पिलातसला स्युवा क्याप्सोङ, राङ हतिबे काङ च्याक्ते हतिबा ला खेर नाइरे माग क्याइसोङ तेहि सिपाहि तेबा लेप्ते खो ङ्याबो क्रुसला ताताबातेबे काङबा च्यासोङ, ताङला चिकि राङ च्हिला स्यान त्हि। तेहि हतिबा येशुयि तेहा लेप्सोङ हतिबे थोङसोङ, कि येशु तेकि राङ स्यिदु नाइरे, राङ ख्युइ काङबा माच्याँका लो। हिन्नाङ सिपाहतिबे नाङने च्यियि ख्युइ चिमाला च्यायि पोरकि चासोङ, तेहि युप्पु झिला ठा राङ छ्यु थोन्सोङ। खे याङ हिछे कि नाइरे थोङान तेबे साछि पिपिना ना। राङ ख्युइ साछि तेम्बा ना, राङ तेम्बा नेन नाइरे हा:कोरेलो। “ख्युइ रेँ रुइको च्हि याङ च्यकोइ मिदु” नाङान यि पवित्रशास्त्रयि धि वचन पुरा होङ नाइरे धि ताम च्युङसोङ।6 याङ स्यान साला पवित्रशास्त्रा नेनदु, “काङला खि सुरतु हतिबे खोला ताङान माना ना।”7
येशुयि रो तोयाप
मत्ति २७:५७-६१; मर्कुस १५:४२-४७; लुका २३:५०-५६
हतिच्येला अरिमाथियायि योसेफ, काङते यहुदिबाला झिरे फा:ला मात्रा येशुयि लोब्टु हिना, हति पिलातसला येशुयि रो खेरच्याइ नाइरे स्युवा क्यापसोङ। पिलातसयि आङ पिन्सोङ। तेहि खो लेप्ते स्यिस्यिये स्हु खेरसोङ। तेहि तकि छाम्मु होङान निकोदेमस याङ हा:लाम ङिस्यु राङ च्यु किलो मुर्र राङ एलवा स्येस्येबा ल टिमायि मोरकु ख्योहोरे लेप्सोङ।8 हति च्वरा क्याइरे येशुयि स्यु यहुदिबे रो तहयापयि लुलाम च्वरा क्याइरे टिमा स्यिबो मलम राङ ङ्याबो कोहिलायि तुम्सोङ। खोला क्रुसला ताताबि साला हतिया पाङ झि धु। हति पाङला च्याङ मापोरि तुर झि धु। चिचालानाना यहुदिबे तयारियि ङिन हिना, तेहि हति तुर याङ धुनला धु, राङ तेहि हतिबे येशुयि स्हु हति तुरला राङ पोरसोङ।
Source notes (8)
- Cross-reference लेवि २४:१६
- Cross-reference भजनसंग्रह २२:१८
- Cross-reference भजनसंग्रह २२:१५; ६९:२१
- Cross-reference भजनसंग्रह ६९:२१
- Cross-reference लुका २३:४६; मर्कुस १५:३७
- Cross-reference प्रस्थान १२:४६; गन्ति ९:१२; भजनसंग्रह ३४:२०
- Cross-reference जकरिया १२:१०; प्रकास १:७
- Cross-reference युहान्ना ३:१
Tichurong New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.