Tichurong New Testament
प्रेरित 9
शावल थारथोनयाप
शाउल प्रभुयि लोब्टुतेबे विरोधला तरह थरकाइ राङ सोएयापयि धुनला घोबा पुजारि तेहा पुइसोङ, राङ ख्युइ धि लामयि पिजा होङ वा पुमो, कुला खु नाङ हतिबाला किरे यरुश्लेमला ख्योङ ज्याइ खु नाइरे दमस्कसयि यहुदि झोमसि खिमतेबे मिनला पुर्जि लाँसोङ। जब शाउल ढुल कि राङ दमस्कसयि धुनला क्योपते, हो:प्तामेला तेङलाने होए झि ख्युइ फाला छुलोला होए भारसोङ। खो साला घेलसोङ, राङ ख्युइ जु नाङान क्ये थोइसोङ, “शाउल, शाउल, ख्योए ङाला चिला तुका तेरिन?” ख्युइ नाइसोङ, “प्रभु, ख्योए सु ना?” तेहि ख्युइ नाइसोङ, “ङा येशु ना, सुला ख्योए तरि तेरिनदु। हिन्नाङ लाँरे भजारला क्यु, राङ ख्युइ च्हि किच्याइ होङ सो खेला स्योएङान ना।”
खो ङ्याबो ढोङान मितेबे क्येते थोइसोङ, हिन्नाङ माथोङा राङ च्याङ नायाप मेता च्युङदे लुइसोङ। तेहि शाउल साने लाँसोङ राङ मि भेतुइना ख्युइ च्याङ माथोङसोङ, राङ हतिबे ख्युइ लाक्पा सुङदे ठिते खोला दमस्कसला खेरसोङ। तेहि ङिन सुम थु खो मिथोङान च्युङसोङ, राङ न त ङ्योपा साइसोङान छ्यु तुसोङ।
दमस्कसला हननिया मिन क्याक्याइबि लोब्टु झि धु। खोला प्रभुयि दर्शनला नाइसोङ, “ए हननिया।” ख्युइ नाइसोङ, “प्रभु, ङिहा होतो।” तेहि प्रभुयि खोला नाइसोङ, “ल्हँ, राङ ‘थारका’ मिन क्याक्याइबा होएता गल्लिला क्यु, राङ हतिया यहुदायि खिमला शाउल मिन क्याक्याइबि टार्ससला त्योएङान झिला फोए, चिचालानाना को मोनलाम क्याकिन राङ धु। ख्युइ मिलामला हननिया मिन क्याक्याइबि मिझि नाङला लेप्ते खो थोङ ङ्युइ नाइरे रेँ थोला ख्युइ लाक्पा पोपोरा थोथोङा धु।”
हिन्नाङ हननियायि नाइसोङ, “प्रभु, धि मितेबे यरुश्लेमला ख्युइ कजसुबायि मितेबाला चोम अल क्याक्याइबा होतो, सो ङाहि लेइराङने थोथोइबा होए। ङिहा याङ ख्युइ मिन खेरङान पोरोला तेमयापयि आङ घोबा पुजारितेबाने खोला खुँखुँबा होतो।” हिन्नाङ प्रभुयि हतिला नाइसोङ, “क्यु, चिचालानाना यहुदि मान्ते मितेबाला, क्यालबोतेबा राङ इस्राएलयि सन्तनतेबे धुनला ङाहि मिन टाइक्ये कियापला खो धाधामा ङाहि पत्र झि ना। चिचालानाना ङाहि मिनयि चाला ख्युइ चोम तुरि ङ्योङ कोइ हुन, सो ङा खोला तोनज्याइ।”
तेहि हननिया पुते हति खिमयि नाङला स्युसोङ, राङ हति थोला रेँ लाक्पा पोरते नाइसोङ, “भाइ शाउल, काङ प्रभु येशु हुन तातातायि लामला ख्युइ तेहा थोङदे, ख्युइ राङ ख्योए थोङान सह राङ पवित्र आत्मायि खाँखाँबा सह नाइरे ङाला चाँचाँबा होतो।” हतितुइनाराङ ख्युइ मिने पाप्रा च्वरा चिगा ङिलसोङ, राङ याङ खो थोङान च्युङसोङ। तेहि खो लाँसोङ राङ बप्तिस्मा खेरसोङ, तेहि ङ्योपा साइरे खोला तोप क्येसोङ। शाउल ङिन लेइराङ थु दमस्कसला होएता लोब्टुतेबा ङ्याबो त्येसोङ।
शावलयि दमस्कसला टाइक्ये क्याक्याइबा
तेहि हतितुइना राङ यहुदि झोमसि खिमतेबाला येशुयि घोषना धि च्वरा क्याइरे क्याइसोङ, “खो कजसुबायि पिजा हिना।”
तेहि ङ्यानङानतेबा पोरोयि हा:लाइरे नाइसोङ, “ङाहि मिन खेरङान पोरोला यरुश्लेमला मिप सोएयि काण्डला राङ ङिहा याङ हतिबाला ताम्दे घोबा पुजारितेबे चाना खेरयापला हा:कोरे होङान ङिहा राङ मानाइ?” हिन्नाङ शाउल तरह शक्तिशालि हुन राङ पुइसोङ, राङ येशु राङ ख्रिष्ट हिना नाङानयि साछि पिन्दे दमस्कसला त्योएङान यहुदिबाला च्यामाना सोइसोङ।
तेहि ङिन लेइराङ पुइ छारते यहुदिबे खोला सोएयापयि छल सोइसोङ।1 हिन्नाङ हतिबे छल शाउलला छ्या च्युङसोङ। हतिबा झोला स्योएयापयि चाला ङिन छान भजारतेबे खोला कहुरे तोकिनलो। हिन्नाङ ख्युइ लोब्टुतेबे खोला छाम्मु राङ फुगोला च्युक्ते प्येने पापसोङ।
शावल यरुश्लेमला
खो यरुश्लेमला लेप्छारते ख्युइ लोब्टुतेबा ङ्याबो ढियापयि कोशिश क्याइसोङ। हिन्नाङ हतिबाला खो लोब्टु हिना नाङान हिछे माच्युङाति पोरो खो ङ्याबो झिसोङ। हिन्नाङ बारनाबासयि खोला ङ्याबो खेरते लोब्टुतेबे तेहा खेरसोङ। तेहि शाउलयि प्रभुला लामला थोथोङा राङ प्रभु खो ङ्याबो ताम नानाइबा राङ ख्युइ दमस्कसला हा:मराङ किङगा येशुयि मिन टाइक्ये क्याक्याइबि ताम हतिबाला स्येसोङ। शाउल हतिबा ङ्याबो यरुश्लेमला मन स्याङ क्याइरे ढुवाला छेलसोङ, राङ हा:म किङगा राङ प्रभुयि मिनला टाइक्ये किताला छेलसोङ, तेहि खो ग्रिक यहुदितेबा ङ्याबो नारे क्याइसोङ, हिन्नाङ हतिबे खोला सोए च्युइ क्याइसोङ। हिन्नाङ धि हा:कोरे भाइतेबे खोला कैसरियाला ख्योसोङ राङ हतिने खोला टार्ससला चाँसोङ।
हति च्वरा क्याइरे यहुदिया पोरो, गालिल राङ सामरिया काङ चर्चला शान्ति च्युङसोङ राङ चर्च स्यु छेया च्युङसोङ। प्रभुयि झिटाला ढुन राङ पवित्र आत्मायि खाइकोए खुँरे चर्च यारके हुन राङ पुइसोङ।
पत्रुस लिड्डाया राङ जोप्पाला
पत्रुस फाला छुला सा पोरोला ढुल किन राङ लुड्डाला होएता कजसुबायि मितेबे तेहा याङ लेप्सोङ। ख्युइ हतिया एनियास मिन क्याक्याइबि मिझिला ठेसोङ, सुते लो क्येने स्हु च्याङ मिघुलङानयि नाझि मालसाला ङ्यालान च्युच्युङा धु। पत्रुसयि हतिला नाइसोङ, “ए एनियास, येशु ख्रिष्टयि ख्योएला टाक्तु झ्युङान ना। ल्हँ, राङ ख्युइ मालसा तुइ।” तेहि खो हतितुइना राङ लाँसोङ। लुड्डा राङ शारोनला त्योएङान पोरोयि हतिला थोङदे प्रभु यहला लसोङ।
योप्पा भजारला तबिता, अर्थात, डोरकासहरिणि नाङान लोब्टुमो झि धु। हति लाइ ल कितु राङ दान तेरयापयि लाइ किन्दु। हति ङिनला हति नाप्पा च्युङसोङ राङ हति स्यिसोङ, राङ मितेबे ठुइ क्यापते मोला थकि तलायि कोटाला पोरसोङ। लुड्डा योप्पायि धुनला च्युच्युङाति, लोब्टुतेबे पत्रुस हतिया धु नाङान थोइरे ख्युइ तेहा मिरको ङेला जु नाइरे स्युवा क्याकतु चाँसोङ, “ङि तेहा पुला मिकिता सअ।” तेहि पत्रुस लाँरे हति ङ्याबो पुइसोङ। हतिया क्योप छारते हतिबे खोला थकि कोटाला खेरसोङ। राढितेबा पोरो ख्युइ धुनला लाँरे ङुवाला छेलसोङ, राङ डोरकास हतिबा ङ्याबो होतितुइना सोसोइबि कोहिला राङ स्यान कोहिलातेबा तानसोङ। हिन्नाङ पत्रुसयि हतिबा पोरोला फिला चाँरे पुइमु चुसोङ राङ मोनलाम क्यापसोङ, राङ हति स्हु यहला लक्ते नाइसोङ, “तबिता, ल्ह!” तेहि मुइ मि पेसोङ, राङ पत्रुसला थोङदे लाँरे त्येसोङ। ख्युइ मोला रेँ लाक्पि सुङदे जुरुक्का लाँसोङ, तेहि कजसुबायि मितेबा राङ राढियातेबाला क्ये ताङदे हतिला सोम्बो तानसोङ। ता धि ताम योप्पा काङ राङ फैलि च्युङसोङ, राङ लेइराङयि प्रभुला हिछे क्याइसोङ। तेहि खो ङिन लेइराङ थु सिमोन नाङान झि पाबुइ लाइकिङान ङ्याबो योप्पाला त्येसोङ।
Source notes (1)
- Cross-reference २ कोरिन्थि ११:३२-३३
Tichurong New Testament. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.