इब्रानियों 3

ईसु मूसा से महान

1जहेमारे, हे पवित्र भईय्यौ और बहेनियौ, तुम जो स्वर्गिय बुलावा के भागीदार हौ, बौ प्रेरित और बड़े पुजारी ईसु के ऊपर ध्यान करौ। 2बौ अपने परमेस्वर के प्रति भरोसेमंद रहे, जो बाकै जौ काम करन के ताहीं चुनी रहै, ठीक बैसोई जैसो मूसा भी परमेस्वर के घर मैं अपने काम मैं भरोसेमंद रहै। 3काहैकि ईसु मूसा से इतनो बढ़कै महिमा के लायक समझो गौ है, जितनो की घर बनानबारो घर से बढ़कै आदर पाथै। 4काहैकि हर एक घर कै कोई न कोई बनानबारो होथै, लेकिन जो सब कछु बनाई बौ परमेस्वर है। 5मूसा तौ परमेस्वर के पूरे घर मैं सेवक के तरह भरोसेमंद रहो, कि जिन बातन को वर्ड़न आनबारे समय मैं हीन बारो रहै, उनकी गभाई दियै। 6लेकिन मसीह लौड़ा के जैसी परमेस्वर के घर को अधिकारी है, और बाको घर हम हैं, अगर हम हिम्मत मैं, और अपनी आसा के घमंड मैं आखरी तक मजबूती से बिस्वास मैं टिके रहे।

परमेस्वर के लोगन ताहीं आराम

7जहेमारे जैसो पवित्र आत्मा कहथै,

“अगर आज तुम बाकी अबाज सुनौ,

8तौ अपने मन कै कठोर मत करौ,

जैसो कि तुमरे बड़े-बूढ़े परमेस्वर से बलवा करन के समय करीं रहैं,

जैसी जब बौ दिन बे बन मैं रहैं, जब बे बाकी परिक्छा लईं।

9परमेस्वर कहथै जितै बे मोकै जाँची और परखीं

और चालीस साल ले मेरे काम देखीं।

10जहे के मारे मैं बे लोगन से गुस्सा रहौं,

और कहो, ‘इनके मन हमेसा भटकत रहथैं,

और जे मेरे रहा और मेरी आग्या कै नाय मानीं।’

11तौ मैं गुस्सा मैं आए कै कसम खाओ,

‘बे बौ जघा मैं कहु ना पौहौंच पांगे, जितै मैं उनकै आराम दौ।’”

12हे भईय्यौ, चहाचीते रहबौ, कि तुम मैं ऐसो बुरो और अविस्वासी मन न होबै, जो जिंदे परमेस्वर से दूर हुई जाबौ। 13बल्कि पवित्र सास्त्र मैं जो दिन आज को दिन कहो जाथै, हर दिन एक दूसरे के समझानो चाहिए, ऐसो नाय होबै, कि तुम मैं से कोई आदमी पाप के धोका मैं आए कै कठोर हुई जाबै। 14काहैकि हम मसीह के भागीदार भै हैं, अगर हम अपने पहले बिस्वास मैं आखरी ले मजबूती से टिके रहमैं।

15जैसो सास्त्र कहथै,

“अगर आज तुम परमेस्वर की अबाज सुनौ,

तौ अपने मन कै कठोर मत करौ, जैसो कि तुमरे पुरखा परमेस्वर से बलवा करन के समय करीं रहैं।”

16बे लोग कौन रहैं जो परमेस्वर की अबाज सुनीं और बाके विरुद्ध बलवा करीं? का बे सब नाय जो मूसा के जरिया मिस्र से निकरे रहैं। 17और बौ चालीस साल तक कौन लोगन से गुस्सा रहो? का उन्हईं से नाय, जो पाप करीं, और उनके सरीर बन मैं पड़े रहे? 18और बौ कौन से कसम खाई, कि तुम मेरे आराम मैं नाय घुस पागे: खाली उनसे जो-जो आग्या न मानी? 19जौ तरह हम देखथैं, कि बे अविस्वास के बजह से बौ देस मैं घुस नाय सकै।