Rana Tharu Bible
प्रकासितवाक्य 20
एक हजार साल
फिर मैं एक स्वर्गदूत कै स्वर्ग से उतरत देखो, जोके हाथ मैं अधोलोक की चाबी, और एक बड़ी जंजीर रहै। बौ अजगर, मतलब पुराने साँप कै, जो प्रेत आत्मा या सैतान है; और बाकै पकड़कै एक हजार साल तक जंजीरन मैं भाँदे रखाई। स्वर्गदूत बाकै अधोलोक मैं फेंक दई, और बामै तारो लगाए दई, फिर बामै मुहर लगाए दई, कि बौ हजार साल के बीतन तक देस के सब गैर यहूदियौ कै फिर से भरमाए न सकै। जाके बाद बाकै जरा देर के ताहीं ढीलो छोड़ देनो चाहिए।
फिर मैं सिंहासन देखो, और जो बामै बैठे रहैं, उन्हैं न्याय करन को हक दौ गौ। मैं बे लोगन की आत्मन कै भी देखो जोकी ईसु की गभाई और परमेस्वर के बचन देन की बजह से मार डारो गौ रहै। बे बौ जानवर या बाकी मूर्ति की आराधना मन से नाय करी रहैं, और न बे अपने माथे या अपने हात मैं बाकी छाप लईं रहैं। बे जिंदे भै और एक हजार साल ले मसीह के संग राजा के रूप मैं राज्य करी। जबले जे हजार साल पूरे ना भै तब तक बचे मरे भै जिंदे न होंगे। जौ तौ पहलो पुनरुत्थान है। धन्य और पवित्र बौ है, जो जौ पहले जी उठन को भागी है, ऐसेई मैं दुसरी मौत को कुछ भी अधिकार ना, पर बे परमेस्वर और मसीह के पुजारी होंगे, और बाके संग एक हजार साल तक राज्य करंगे।
सैतान की हार
हजार साल पूरे होन के बाद, सैतान कै बाके कैदखाना से छोड़ दौ जागो, और अब बौ सारी दुनिया के देस मैं बिखरी भइ जाति कै भरमान के ताहीं निकरैगो जो गोग और मागोग है। सैतान बे सबन कै लड़ाई के ताहीं इखट्टो करैगो, जित्ते समुंदर तट मैं रेता के कड़ हैं। बे पूरी पृथ्वी मैं फैल गै और परमेस्वर के पवित्र लोगन को डेरा और बौ सहर कै जोसे बौ प्रेम करथै घेर लई। और आगी स्वर्ग से उतरी और उन्हैं नास कर दई। फिर सैतान कै, जो उन्हैं धोका दई रहैं, आगी और गंधक की बौ झील मैं डार दौ गौ, जहाँ बौ जानवर और झूठे भविस्यवक्ता पहलिये से फेंको जाए चुको रहैं; और बे रात-दिन हमेसा1 तड़पत रहेंगे।
आखरी फैसला
फिर मैं एक बड़ो सफेद सिंहासन और बामै बैठन बारे कै देखो, पृथ्वी और स्वर्ग बाकी गैरहाजरी से भाज गै हैं और अब नाय देखे गै।2 और मैं छोटे-बड़े सब मरे भैन कै सिंहासन के सामने ठाड़े भै देखो। और किताब खोली गईं; और फिर एक और किताब खोली गई, मतलब जिंदगी की किताब। मरे भैन को न्याय बाके जरिया करे गै काम के अनुसार करो गौ, जैसो कि किताब मैं लिखो है। फिर समुंदर मरे भैन कै छोड़ दई, मौत और नरक भी अपने झोने रखे मरे भैन कै छोड़ दई। और जो कुछ बे करीं रहैं बाके हिसाब से सबको न्याय करो गौ। फिर मौत और नरक कै आगी की झील मैं डार दौ गौ, जौ आगी की झील तौ दुसरी मौत है। जिन लोगन को नाओं जिंदगी की किताब मैं नाय लिखो भौ मिलो, उन्हैं आगी की झील मैं डारो गौ।3
Source notes (3)
- Footnote हमेसा के ताहीं
- Cross-reference मत्ती 25:31; भजन संहिता 47:8
- Cross-reference दानिय्येल 12:1; मत्ती 25:41
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.