Rana Tharu Bible
उत्पत्ति 48
याकूब एप्रेम और मनस्से कै आसीस दई
कुछ समय बाद यूसुफ कै बताओ जाथै कि बाको दऊवा बिमार है। तभई बौ अपने दोनों लौड़ा मनस्से और एप्रेम कै संग लैकै याकूब से मिलन कै गौ। जब याकूब कै खबर दईं कि बाको लौड़ा यूसुफ बासे मिलन आओ है, तौ बौ हिम्मत जोरी और बिस्तर मै बैठ गौ। याकूब यूसुफ से कही, “सर्वसक्तिमान परमेस्वर कनान देस के लूज नगर मै मोए दर्सन दई और मोकै आसीस दई। बौ मोसे कही, मैं तोए भौत सन्तान दुंगो, और तेरे बंस से भौत सी जाति निकरंगी; मैं जौ जमीन तुमरे बंस कै सदा के ताहीं उनके अधिकार मै कर दुंगो।”
याकूब जासे अग्गु और कहथै, “यूसुफ, तेरे दोनों लौड़ा, जो मेरे हिंयाँ आन से पहले मिस्र मै तोसे पैदा भै हैं, बे मेरे हैं; एप्रेम और मनस्से, रूबेन और सिमौन के तराहनी ही मेरे लौड़ा हैं। अगर तेरे और भी लौड़ा होमैं, तौ बे मेरे परिवार के ना माने जामंगे; उन्हैं जो हिस्सा मिलैगो बौ एप्रेम और मनस्से के जरिया मिलैगो। मैं जौ तुमरी अईय्या राहेल के बजह से कर रहो हौं। मोकै भौत दुख भौ कि जब मैं पददान मेसोपोटामिया से लौटत रहौं, तभई एप्राता से कुछ दूर कनान देस मै बाकी मौत ही गई। मैं बाकै एप्राता की सड़क के किनारे दफनाए दौ।” एप्राता अब बैतलहम के नाओं से जानो जाथै।
जब इस्राएल अर्थात याकूब जब यूसुफ के लौड़न कै देखी, तौ पूँछी, “जे कौन के लौड़ा हैं?”
यूसुफ जबाब दई, “जे मेरे लौड़ा हैं, जिन्हैं परमेस्वर मोकै हिंयाँ मिस्र मै दई है।”
याकूब कही, “उन्हैं मेरे झोने ला कि मैं उन्हैं आसीर्वाद देमौं।” उमर की बजह से याकूब नजर कमजोर ही गई रहै और बौ सई से देख भी नाय पात रहै। यूसुफ लौड़ा कै झोने लाई, और बौ उनकै गले से लगाई, और चूमी। याकूब यूसुफ से कही, मैं कभी तोकै दुबारा देखन की आसा नाय करो रहौं, और अब परमेस्वर मोकै तेरे बालकन कै भी देखन की इजाजत दई है। फिर यूसुफ उन्हैं याकूब की गोदी से लै लई, और जमीन मैं घुटने के बल आए कै और मुड़िया झुकाए कै बाके सामने दंडवत करी।
बाके बाद युसुफ बे दोनो कै लैकै दऊवा के झोने आओ। तौ यूसुफ एप्रेम कै याकूब कै बाँए घाँईं और मनस्से कै दहने घाँईं रखी। लेकिन याकूब हात जोड़कै अपनो दहनो हात एप्रेम के मुड़िया ऊपर रखी, काहैकि बौ छोटो होथै, और अपनो बाँया हात मनस्से की मुड़िया ऊपर रखी, जो बड़ो रहै। तौ बौ यूसुफ कै आसीस दई और कही:
“परमेस्वर, जोकी मेरो दऊवा अब्राहम और इसहाक सेवा करी, जे लौड़न कै आसीस देबै!
परमेस्वर, जो मोकै हबै ले समारी है, उन्हैं आसीस देबै!
स्वर्गदूत, मोकै सब परेसानी से बचाई है, उन्हैं आसीस देबै!
मेरो नाओं और मेरो दऊवा अब्राहम और इसहाक को नाओं जे लौड़न के जरिया अटल रहबै!
उनके भौत से बालका होमैं, और जे पृथ्वी मैं अनगिनित ही जामैं और इनको बंस बड़ै!”
जब यूसुफ देखी, कि बाको दऊवा अपनो दहनो हात एप्रेम के मुड़िया ऊपर रखी है, तौ बाकै बुरो लगो; जौ बजह से बौ अपने दऊवा को हात पकड़कै एप्रेम की मुड़िया से उठाएकै मनस्से की मुड़िया ऊपर रख दई। यूसुफ फिर अपने दऊवा से कही, “दऊवा, ऐसो नाय है। जौ बड़ो लौड़ा है; अपनो दहने हात बाकी मुड़िया ऊपर रख।”
बाको दऊवा जौ कहत भै बाकै मना कर दई, “कि मोए मालुम है, मेरे लौड़ा, मोए मालुम है। मनस्से बंसज भी महान लोग बनंगे। लेकिन बाको छोटो भईय्या बासे भी महान होगो, और बाके बंसज महान रास्ट्र बनंगे।”
जौ बजह से बौ बहे दिन कै उनकै आसीस दई, और कही, इस्राएली आसीस देत समय तुमरे नाओं को इस्तमाल करंगे। बे कहमंगे, परमेस्वर तुम्हैं एप्रेम और मनस्से के तराहनी बनाबै। ऐसे करकै याकूब एप्रेम कै मनस्से से पहले रखी।
फिर याकूब यूसुफ से कही, जैसो तू देख रौ है, मैं मरन मै हौं, लेकिन परमेस्वर तेरे संग रहगो, और तोए तेरे पुरखन के देस मै लौटाए लै जागो। मैं तुमरे भईय्यन कै नाय, लेकिन तुम्हैं ढलुआ पहाड़ी छेत्र सेकेम दे रौ हौं, बौ उपजाऊ जघा जो मैं अपनी तलवार और धनुस से एमोरियन से छीन लौ रहौं।
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.