Rana Tharu Bible
उत्पत्ति 23
सारा की मौत
सारा एक सौ सत्ताईस साल तक जीथै। बौ कनान देस के किर्यतअर्बा मतलब हेब्रोन मैं मर गई, और अब्राहम सारा के ताहीं सोक मनान और विलाप करन के ताहीं आओ।
अब्राहम मरे भै सरीर के सामने से उठकै बौ देस के रहन बारे हित्तियन से कही, “मैं परदेसी हौं, हिंयाँ तुमरे बीच मैं रहथौं; मोकै कुछ जमीन बेंच देबौ, ताकि मैं अपनी बईय्यर कै दफनाए सकौं।”1 हित्ती अब्राहम कै जबाब दईं, “हे राजा, हमारी बात सुन। हम तोकै एक सर्वसक्तिमान परमेस्वर के रूप मैं देखथैं; तैं हमरी सबसे अच्छी कबर मैं अपनी बईय्यर कै दफनाए दे। हम मैं से हमरे झोने जो सबसे अच्छी कब्र है बामैं दफना। हम मैं से कोई भी तोकै कब्र दैकै खुस होगो, ताकि तू बाकै दफनाए सकै।”
अब्राहम हित्तियन के लोगन कै लोहोक्कै नमस्कार करी और बौ उनसे कही, “अगर तुम मोकै मेरी बईय्यर कै हीनै दफनान देनो चाहथौ, तौ मेरी बात सुनौ, तुम सोहर के लौड़ा एप्रोन से नौहरे करौ। ताकि बौ मकपेला की गुफा मोकै दै दियै। जो बाके खेत के किनारे मैं है। बौ तुम लोगन कि हाजरी मैं मोसे पूरी रुपईया लै लियै, और बाकै मोकै बेंच दियै, ताकि मैं अपने परिवार के ताहीं बाकै कब्रिस्तान बनाए सकौं।”
एप्रोन खुद हित्तियन के बीच बैठो रहै; बौ नगर-द्वार मैं आन बारे सब हित्तियन कै सुनत भई, अब्राहम कै जबाब देथै, “ना मेरे प्रभु, मेरी बात सुन। मैं तोकै ना खाली अपनी जमीन दुंगो, बल्किन कबर की गुफा भी, जो बामैं है। मैं अपने लोगन की हाजरी मैं अपनी जमीन तोकै देथौं। तैं अपनी मरी भई बईय्यर कै गुफा मैं दफनाए दिये।”
और अब्राहम देस के रहन बारे हित्तियन के सामने लोहोक्कै अभिवादन करी। और एप्रोन से कही, ताकि सब सुन सकैं, का मैं तोसे विनती कर सकथौं, कि सुन। मैं पूरो खेत रुपईयन से मोल ले लूँगो। मेरो भुगतान स्वीकार करौ, और मैं अपनी बईय्यर कै हूँनै दफनाए दुंगो।
एप्रोन अब्राहम कै जबाब देथै, “हे मेरे प्रभु, मेरी बात सुन। बौ जमीन के टुकड़ा की कीमत सिरफ चार सौ चाँदी के सिक्का है। पर बौ तेरे और मेरे बीच मैं का है? तैं अपनी बईय्यर कै जामैं दफनाए दे।” अब्राहम सहमत ही गौ, एप्रोन जितनो मूल्य हित्तियन कै सुनात भई बताई रहै, अब्राहम व्यापारीन के जरिया इस्तेमाल करी जानबारी मानक बजन के हिसाब से, एप्रोन कै चार सौ चाँदी के सिक्का तौलकै दई।
तौ ममरे के अगार की दिसा मैं मकपेला मैं जो संपत्ति एप्रोन की रहै, बौ अब्राहम की ही गई। जामैं खेत, मौजूद गुफा और संपत्ति के मैदान के सबै पेंड़ सामिल रहैं। नगर-द्वार मैं आन बारे सब हित्तियन की हाजरी मैं अब्राहम के अधिकार मैं कर दै गै।
बाके बाद, अब्राहम अपनी बईय्यर सारा कै मकपेला बारी जमीन की गुफा मैं दफनाए दई, जो कनान देस के ममरे मतलब हेब्रोन नगर है। और ऐसे करकै बौ खेत जो हित्तिन को रहै, और हूँना की गुफा जो कब्रिस्तान रहै अब्राहम की संपत्ति बन गई।
Source notes (1)
- Footnote हिब 13:9, प्रेरि 7:16
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.