Rana Tharu Bible
उत्पत्ति 16
हाजिरा और इस्माएल
अब्राम की बईय्यर सारा की औलाद नाय रहै। लेकिन बाके झोने हाजिरा नाओं की एक मिस्री दासी रहै, सारा अब्राम से कही, “प्रभु मोकै कोई औलाद नाय दई है, जौ बजह से मैं तोसे बिनती करथौं कि तू मेरी दासी के झोने जा; और ऐसो करकै बाके जरिया मैं बालका बारी बन जामौं।” सारा की बात अब्राम मान लई। जब अब्राम कै कनान देस मैं रहत दस साल गुजर चुके। तौ बाकी बईय्यर सारा अपनी मिस्री दासी हाजिरा कै लैकै अपने लोगा अब्राम कै दै दई, कि बाकी बईय्यर बन सकै। अब्राम हाजिरा के झोने गौ और बौ गर्भवती भई; जब बाकै लगो कि मैं गर्भवती हौं तौ बौ अपनी मालकिन सारा कै अपनी नजर मै तुच्छ समझन लागी।
तौ सारा अब्राम से कहथै, “जो मेरे संग गलत भौ है बौ तेरे संग नाय होबै। मैं तौ अपनी दासी कै तेरी बईय्यर बनाए दौ; लेकिन जब बाकै पता चलो कि मैं गर्भवती हौं, तौ बौ मोकै तुच्छ समझन लगी, जौ बजह से प्रभु मेरे और तेरे बीच मैं फैसला करै!” अब्राम सारा से कही, “देख तेरी दासी तेरे काबू मैं है; जैसो तोए अच्छो लगै बैसिये बाके संग कर।” तौ सारा हाजिरा कै परेसान करन लगी और हाजिरा बाके झोने से भाज गई।
सूर की रस्ता मैं, बन मैं एक झरना के झोने प्रभु को स्वर्गदूत हाजिरा से बोली और कहथै, “हाजिरा, सारा की दासी, तैं कितै से आथै और कहाँ कै जाथै?” बौ जबाब दई, “मैं अपनी मालकिन की सेवा से भाजयाओ हौं।”
तौ स्वर्गदूत कही, “अपनी मालकिन के झोने लौट जा और बहे की आधीन मैं रहा।” और प्रभु को स्वर्गदूत बासे जहो कही, “मैं तेरे बंस कै भौत बढ़ांगो, हिंयाँ ले कि इनकी गिनती तक न हुई पागी।” फिर प्रभु को स्वर्गदूत हाजिरा से कही, “देख, तू पेट से होगी। तैं एक लौड़ा कै जनम देगी, और तैं बाको नाओं इस्माएल रखिये, काहैकि प्रभु तेरो दुख को हाल सुनी है। लेकिन बौ इंसान एक जंगली गधा के तराहनी होगो; बाको हात सबके खिलाप उठैगो, और बे सब बाके विरुध्द होमंगे बौ अपने करीबी भाई-बंधुवन के बीच मै दुस्मनन के हानी रहेगो।”
हाजिरा खुद से पूँछथै, “का मैं सच्ची मैं परमेस्वर कै देखो हौं, और जाके बारे मैं बतान ताहीं जिंदो हौं?” जौ बजह से बौ प्रभु कै, जो बासे बात करी रहै, देखन बारो परमेस्वर कही। जौ बजह से बौ कुआँ को नाओं “बएर-लहई-रोई” रखो गौ। जौ कुआँ कादेस और बेरेद के बीच मैं है। हाजिरा से अब्राम को एक लौड़ा पैदा भौ, और बौ बाको नाओं इस्माएल रखी। जब हाजिरा अब्राम के जरिये इस्माएल कै जन्माई रहै, बौ समय अब्राम छियासी साल को रहै।
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.