Skip to content
BibleKenya

Rana Tharu Bible

उत्पत्ति 11

बेबीलोन को गढ़

पहले पूरी पृथ्वी के लोगन की एकै भासा रहै और बे एकै सब्द को इस्तमाल करत रहैं। बौ समय लोग अगार दिसा के घाँईं से घूमत-घामत, बे बेबीलोन के सिनार देस के एक मैदान मैं आएकै हूँनै बस गै। बे एक दुसरे से कहीं, “चलौ! अब ईंट बनामैं और इनकै आगी मैं अच्छे से पकामैं।” और फिर इमारत बनान ताहीं जे पत्थर की जघा मैं ईंट और चूना की जघा मैं कोलतार को इस्तमाल करन लगे। बे फिर कहीं, “आबौ हम एक ऐसो सहर बनाँगे, जोके गुम्मट की चुटिया स्वर्ग ले पहोंचत होए, ताकि हम अपनो नाओं कर सकैं और हम पूरी पृथ्वी मैं तितर-बितर न होमैं।”

लेकिन प्रभु बौ सहर और गुम्मट कै देखन ताहीं नीचे आओ, जो बे लोग बनात रहैं। और प्रभु कही, “देखौ, जे एकै जाति के लोग है। जे सबन की भासा भी एकै है। जौ तौ उनके आन बारे समय के कामन की सुरुवात है। जो काम बे अग्गु करनो चाहंगे, बौ उनके ताहीं नामुमकिन ना होगो! तौ आबौ आपन नीचे जाएकै उनकी भासा मैं ऐसी गड़बड़ी करैं कि बे एक दुसरेन कै नाय समझ पामैं।” ऐसिये करकै प्रभु उनकै पूरी पृथ्वी मैं तितर-बितर कर दई, और बे सहर बनानो छोड़ दईं। बौ सहर को नाओं बेबीलोन रखो गौ, काहैकि हूँना परमेस्वर सब लोगन की भासा मैं गड़बड़ी कर दई, और हूँनै से बौ उनकै पूरी पृथ्वी मैं तितर-बितर कर दई।

सेम की वंसावली

जे सेम के बंसज हैं। बाढ़ के दुई साल बाद, जब सेम सौ साल को भौ, तौ बाको एक लौड़ा अर्पछद को जनम भौ। और अर्पछद के जनम के बाद सेम पाँच सौ साल और जिंदो रहो और बाके और भी बालका पैदा भै।

जब अर्पछद पैंतीस साल को भौ, तौ बाको सेलह नाओं के एक लौड़ा को जनम भौ; और सेलह के जनम के बाद अर्पछद चार सौ तीन साल और जिंदो रहो और बाके और भी बालका भै। जब सेलह तीस साल को भौ, तौ बाके जरिया एबर नाओं के एक लौड़ा को जनम भौ; एबर के बाद, सेलह चार सौ तीन साल और जिंदो रहो और बाके और बालका पैदा भै।

जब एबर चौंतीस साल को भौ, तौ बौ जरिया पेलेग नाओं के लौड़ा को जनम भौ; पेलेग के बाद एबर चार सौ तीस साल और जिंदो रहो। बाके और भी बालका भै।

जब पेलेग तीस साल को भौ, तौ बाको एक लौड़ा रऊ पैदा भौ; रऊ बाद, पेलेग दुई सौ नौ साल और जी और बाके और बालका पैदा भै। जब रऊ बत्तीस साल को भौ, तौ बाको एक लौड़ा सरूग को जनम भौ; सरूग के बाद, रऊ दुई सौ सात साल और जिंदो रहो, बाके और भी बालका भै।

जब सरूग तीस साल को भौ, तौ बाको नाहोर नाओं को एक लौड़ा को जनम भौ; नाहोर के बाद, सरूग दुई सौ साल और जिंदो रहो। बाके और भी बालका भै।

जब नाहोर उन्नीस साल को भौ, तौ बाको एक लौड़ा, तेरह को जनम भौ; तेरह के बाद, नाहोर एक सौ उन्नीस साल और जिंदो रहो। बाके और भी बालका भै।

जब तेरह सत्तर साल को भौ, तौ बासे अब्राम, नाहोर और हारान को जनम भौ।

तेरह की वंसावली

जे तेरह के बंस के हैं, जो अब्राहम, नाहोर और हारान कै जन्माई रहै। और हारान लूत कै जन्माई रहै, हारान की मौत बाके दऊवा तेरह के जीवन काल मैं ही कसदी जाति के ऊर नाओं के नगर मैं भई, जो बाकी जनम जघा रहै। अब्राम और नाहोर दोनों बिहा करीं, अब्राम की बईय्यर को नाओं सारा रहै और नाहोर की बईय्यर को नाओं मिल्का रहै, मिल्का हारान कि लौड़िया रहै, और हारान मिल्का और यिस्का जे दोनों को दऊवा रहै। सारा निसंतान रहै काहैकि बौ गर्वधारड़ करन मैं असमर्थ रहै। तेरह अपने लौड़ा अब्राम, और नतिया लूत, जो हारान को लौड़ा रहै, और अपनी बहु सारा, जो अब्राम की बईय्यर रहै, जे सबन कै लैकै कनान देस मैं बेबीलोन के कसदी जाति के ऊर सहर मैं जान ताहीं निकर गै। बे हारान देस पौहोंचन के बाद हूँनै बस गै। तेरह की पूरी उमर दुई सौ पाँच साल की रहै। फिर बाकी मौत हारान देस मैं भई।

Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.