Rana Tharu Bible
एज्रा 9
गैर-यहूदियन के संग बिहा
जब जे काम ही चुके, तौ बड़ो अधिकारी झोने आएकै कहन लागो, न तौ इस्राएली लोग न पुजारी न लेवी जौ घाँईं के देस के लोगन से अलग भै; पर उनके जैसी मतलब कनानी, हित्ती, परिज्जी, यबूसी, अम्मोनी, मोआबी, मिस्री और एमोरि के तराहनी घिनौनो काम करथैं। काहैकि बे पुजारियन कि लौड़ियन मै से अपने लौड़न के ताहीं बईय्यर बनाए लईं हैं; और पवित्र वंस जौ घाँईं के देस के लोगन मै मिल गौ है। और हाकिम और सरदार जौ विस्वासघात मैं सबसे अग्गु हैं। जौ बात सुनकै मैं अपने लत्ता और चोंगा कै फाड़ो, और अपनी मुड़िया और दाढ़ी के बार नोचो, और चाहचीते ही कै बैठो रहो।1 तौ जित्ते लोग इस्राएल के परमेस्वर के बचन सुनकै गुलामी से आए भै, लोगन के विस्वासघात की बजह से कपकपात रहैं, बे सब मेरे झोने जुराने, और मैं संजा की भेंट के समय ले सहमौं भौ बैठो रहो।
पर संजा की भेंट के समय मैं फटे भै लत्ता और बागा फाड़े भै उपवास की दसा मैं उठो, फिर घूँटेन के बल लोहोको, और अपने हात अपने परमेस्वर प्रभु परमेस्वर के घाँईं फैलाएकै कहो। हे मेरे परमेस्वर! मोकै तेरे घाँईं अपनो मोहों उठता भई सरम आथै, और हे मेरे परमेस्वर! मेरो मोहों कारो है; काहैकि हम लोगन के अधर्म के काम हमरी मुड़िया ऊपर बढ़ गै हैं, और हमरो दोस बढ़ते आसमान ले पहोंच गौ है।2 अपने पुरखन के दिनन से लैकै आज के दिन ले हम बड़े दोसी हैं, और अपने अधर्म के कामन के बजह से हम अपने राजा और पुजारिन समेत देस के राजन के हात मैं करे गै तलवार, गुलामी, लूटे जान, और मोहों कारो हुई जान की विपत्तियन मैं पड़े, जैसे कि आज हमरी दसा है। पर अब थोड़ी दिन से हमरे प्रभु परमेस्वर को अनुग्रह हमरे ऊपर भौ है, कि हम मैं से कोई बच निकरै, और हमकै बाकी पवित्र जघा मैं एक खुटी मिलै, और हमरो परमेस्वर हमरी प्रार्थना से आँखिन मैं जोती आन दियै, और गुलामी मैं हमकै कुछ आराम दियै। हम दास तौ हँईंये, पर हमरे गुलामी मैं हमरो परमेस्वर हमकै ना छोड़ी, काहैकि फारस को राजा हमरे ऊपर ऐसी कृपा करी, कि हम नई जिंदगी पाएकै अपने परमेस्वर के भवन कै उठान, और जाके खंडरन कै सुधार पाए, और हमैं यहूदा और यरूसलेम मैं आड़ मिली।
अब हे हमरे परमेस्वर, जाके बाद मै हम का कहमैं, जहे कि हम तेरी बे आग्यन कै तोड़ दै हैं,3 जो तू जौ कह कै अपने दास भविस्यवक्तन के जरिया दईं , जो देस के अधिकारी बनन कै तुम जाए रै हौ, बौ तौ देस के लोगन की असुद्धता के बजह से और उनके घिनौने कामन के बजह से असुद्ध देस है, बे बाकै एक सीमा से दुसरी सीमा ले अपनी असुद्धता से भर दई हैं। बे हमैं बताईं कि अगर हम बौ जमीन को मजा लेनो चाहथैं, और बाकै अपने वंसजन कै हमेसा के ताहीं सौंपनो चाहथैं, तौ हमैं बे लोगन के संग कहू बिहा ना करनो चाहिए, और ना उनकी समृद्धि या सफलता मैं कहू मदत करनो चाहिए। “बौ सब के बाद जो हमरे बुरे कामन और बड़े दोस के बजह से हमरे ऊपर बीतो है, जबकि हे हमरे परमेस्वर, तैं हमरे अधर्म के बराबर हमकै दंड ना दौ, लेकिन हम मैं से कितनेन कै बचाए रखाओ है। तौ का हम तेरी आग्यन को फिर से उल्लंघन करकै जे घिनौने काम करनबारे लोगन से समधियानो बारो रिस्ता करैं? का तैं हमरे ऊपर हिंयाँ ले कोप ना करैगो जो से हम मिट जामैं और ना तौ कोई बचै और ना कोई रह जाबै? हे इस्राएल के परमेस्वर प्रभु परमेस्वर! तैं धर्मी है, हम बचकै आजाद भै हैं जैसे कि आज हबै हैं। देख, हम तेरे सामने दोसी हैं, जौ बजह से कोई तेरे सामने खड़ो ना रह सकथैं।”
Source notes (3)
- Footnote मत्ती 26:65; अय्यूब 1:20
- Footnote दानिय्येल 9:7,8
- Footnote दानिय्येल 9:5,10,11
Rana Tharu Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.