दानिय्येल 1

बेबीलोन को दानिय्येल और बाके दोस्त की कहानी

1यहूदा को राजा यहोयाकीम के देस के तीसरे साल मैं बेबीलोन के राजा नबूकदनेस्सर ने यरूसलेम मैं लड़ाई करी और गाओं कै घेर लईं। 2तभई प्रभु यहूदा के राजा यहोयाकीम जो बाके ऊपर विजय दई, मंदिर को खजानन बाके हाथ मैं दै दई। बौ कुछ आदमिन कै अपने संग बेबीलोन के सिनार देस मैं अपने देवतन के मंदिर मैं लैगौ, और पकड़े गै खजाना कै परमेस्वर के मंदिर के भंडार घर मैं रख दई। 3तभई राजा अपने ईमानदार अधिकारी असपनज कै आदेस दई कि बौ इस्राएलियन मैं से साही परिवार और नामी खास परिवारन कै कुछ आदमिन कै बंधुवाई मैं से चुनै। 4बे अच्छे, बुध्दिमान, अच्छी तराह से समझदार और ग्यान सीखन मैं तेज और सरीर से ताकतवर और अच्छे होने चाहिए, और उनकै कसदी जाति को साहित्य और भासा सिखा ताकी बे राजा के साही परिवार के घर मैं सेवा करन के ताहीं काबिल हुई सकैं। असपनज उनकै बेबीलोनियन भासा पढ़नो और लिखनो सिखाथै। 5राजा जौ भी आदेस दई कि हर दिन बे अच्छे घर के लोगन के अग्गु खानू और दाखमधु दौ जाबै। ऐसे करकै उनको तीन साल ले पालन-पोसँड़ होत रहेगो और बाके बाद बे राजा के अग्गु हाजिर करे जांगे। 6चुने गै लोगन कै दानिय्येल, हनन्याह, मीसाएल और अजर्याह रहैं जो सब यहूदा के वंस से रहैं। 7खास अधिकारी उनकै नया नाओं दई:

दानिय्येल को बेलतसस्सर, और हनन्याह को सद्रक, मीसाएल को मेसक और अजर्याह को अबेदनगो ऐसो नाओं रखी। 8दानिय्येल अपने मन मैं तै करी कि बौ राजदरबार को खानू खाएकै और दाखमधु पीकै अपने आपकै असुद्ध नाय करैगो,

तौ बे असपनज से बाकी मदद करन कै कही। 9और परमेस्वर असपनज राजा कै दानिय्येल के ताहीं अनुग्रह और सहानुभूति से बाकै भर दई। 10जैसे असपनज राजा से डराथैं, तौ बे दानिय्येल से कहीं “राजा तौ से कह दई है कि तुमकै का खाने और पीने है, और अगर तुम दूसरे आदमिन के जैसी अच्छे ना दिखाने, तौ बौ मोकै मार सकथै।”

11बाके बाद असपनज, दानिय्येल, हनन्याह, मीसाएल और अजर्याह जे सब अधिपतियन की देखरेख करन के ताहीं चुनो गौ रहै, दानिय्येल बासे कहथै। 12“मैं नौहरे करथौं कि दस दिन ले हमरी निगरानी करौ।” बे कहीं “हमैं खान के ताहीं साग-सब्जी और पीन के ताहीं पानी दौ जाबै। 13फिर हमरी तुलना बे नये जुआन से करीं जो राजदरबार को खानू खाथैं, और हम कैसे दिखाथैं बाके बाद फैसला करैं।”

14बौ उनकी जौ विनती मान लई, और दस दिन ले उनकै जाँचत रहो। 15जब दिन खतम भौ, तौ बे सब लोगन की तुलना मैं जो राजदरबार को खानू खात रहैं उनसे हट्टे-कट्टे और मजबूत दिखात रहैं। 16तौ बौ अधिकारी उनको खानू और पीन के ताहीं ठहराओ भौ पानी, दाखमधु की जघा मैं साग-पात देन लगे।

17प्रभु के चारौ आदमिन को समूह और दर्सन मैं ग्यान और बुध्दि दई। जाके अलावा, बौ दानिय्येल कै दर्सन और सपनो की ब्याख्या करन मैं ग्यान दई।

18राजा के निर्धारित तीन साल के बाद, असपनज बे सब अधिकारी लोगन कै नबूकदनेस्सर के झोने लैगौ। 19राजा उन सब से बात करी और दानिय्येल, हनन्याह, मीसाएल और अजर्याह के जे सब दूसरे सब की तुलना मैं जे भौत प्रभावित करीं। फिर बे राजा के दरबार के सदस्य बन गै। 20राजा कोई भी सबाल पूँछी होबै या कोई भी नुकसान उठाई होबै, जे चारौ बाके सब देस मैं कोई भी ज्योतिसी या जादूगर से बुध्दि मैं दस गुना जाधे जानथैं। 21दानिय्येल राजसाही दरबार मैं तब तक रहौ जब तक फारस के सम्राट कुस्रू और बेबीलोन मैं जीत नाय प्राप्त कर पाई।