प्रकाश 21

लावा यरुशलेम

1तब् मै लावा स्वर्ग और लावा पृथ्वी देख्नु। काकरेकी पुरान स्वर्ग और पृथ्वी आब नै रहिँत। और आब समुन्दर फेन नै रहे। 2तब् मै पवित्र शहरहे फेन देख्नु, जोन लावा यरुशलेम हो। जोन शहर परमेश्वरके थेनसे स्वर्गमेसे तरे ओहोँर आइतेहे। उ शहरहे एकथो दुल्हन्याँ हस तयार करगिल रहिस, जिहिहे लुग्गा घलागिल रहिस, और शृंगार करगिल रहिस और जे दुल्हासे भोज करक लग तयार बा। 3तब मै एकथो आवाज सुन्नु जोन परमेश्वरके सिंहासनमेसे जोरसे बोलल, “हेरो, आबसे पक्कै फेन परमेश्वर मनैनके संग बैठिहीँ। और ओइने हुँकार अपन मनै रहिहीँ। ऊ अप्निहीँ ओइन्हे अपन मनैनके रुपमे स्वीकार करहीँ। और ऊ ओइन्के संग रहिहीँ। और ओइने फेन हुँकिन्हे अपन परमेश्वरके रुपमे स्वीकार करहीँ। 4और परमेश्वर ओइन्के आँखीमेसे सक्कु आँश पोँछदिहीन। और ओइन्मेसे केऊ फेन कब्बु नै मुहीँ। और कौनो मनै कबु फेन दुःखके महसुस नै करहीँ, या कबु फेन नै रुइहीँ और ना दुखाइक अनुभव करहीँ। काकरेकी पुरान संसार आब अस्तित्त्वमे नै हो। पुरान संसारके सारा चिज गायब होगिल बताँ।” 5सिंहासनमे बैठुइया महिन्हे कलाँ, “हेरो, मै सक्कु चिज लावा बनादेथुँ।” ऊ असिक फेन कलाँ, “यी लिखो, मोरिक कहल बातमे तुँ विश्वास करे सेक्थो। यी बात पक्कै हुइहीँ।” 6ऊ महिन्हे कलाँ, “मै सक्कु चिज पूरा करदेले बतुँ। ना डराऊ, सक्कु चिजके सुरुवात करुइया महिँ हुइतुँ, और मै वहे हुइतुँ, जे सक्कु चिजके अन्त्य कराई। जिही-जिहिहे प्यास लागल बा, उहिहे मै पानीक उ मुहानमेसे फोकत्यामे पानी पिअक लग देहम, जोन पानी कबु नै मुना जीवन देहत। 7जोन मनै जीत हाँसिल करहीँ, ओइने महिन्से यी सक्कु आशिष भेटैहीँ; मै ओइन्के परमेश्वर हुइम, और ओइने मोरिक छाईछावा हुइहीँ। 8पर जेने महिन्हे विश्वास नै करथाँ, ओइने गन्धकलेके एकदम मनके दम्कती रना उ समुन्दरके झीलमे शामिल कराजिहीँ, जोन दोसर मृत्यु हो। और यहे हालत ओइन्के फेन हुइहिन, जेने मनैनके आघे महिन्हे स्वीकार करनासे डरैथाँ। और जेने खराब काम करथाँ। और जेने मनैनके हत्या करथाँ। और जेने छिनार काम करथाँ। और जेने जादू-टोना करथाँ। और जेने मूर्तिक पुजा करथाँ या झूँट बोल्थाँ।”

पठ्वक दुल्हन्याँ

9ओकर पाछे सातथो अन्तिम विपत रहल सातथो खोरिया पक्रुइया सातथो स्वर्गदूतनमेसे एकथो स्वर्गदूत मोरिक थेन आके कहल, “यहोँर आऊ, मै तुहिन्हे एकथो दुल्हन्याँ देखैम, जेकर भोज झत्तेहेँ पठ्वक संग होजिहिस।”

लावा यरुशलेम

10तब मै पवित्र आत्मक शक्तिक माध्यमसे स्वर्गदूतके अगुवाइमे एकथो बहुत ढेंग पहाड़मे लैजागिनु। और पवित्र शहर यरुशलेमहे परमेश्वरके थेनसे स्वर्गमेसे तरे ओहोँर आइत देखाइल। 11उ शहर परमेश्वरके थेनसे मिल्ना तेज ओजरारसे चम्कतेहे। और यशब नाउँक बहुमूल्य पठरा हस चम्कतेहे, और उ सिसा हस सफा रहे। 12उ शहरके चारु ओहोँर एकथो महा ढेंग देवाल रहे। और उ शहरके भित्तर जैना बाह्रथो दवार रहिँत। और ओइन्मेसे हरेक दवारमे स्वर्गदूतनके अख्वारी करतिहिँत। और उ दवारीनमे इजरायलके बाह्रथो कुलके नाउँ लिखल रहिन। 13उ शहरके चारु ओहोँर तीन-तीनथो दवार रहिँत: पूरुव, पश्छिउँ, उत्तर और दक्खिन। 14ओइने शहरके देवाल बाह्रथो बर-बर पठरक उप्पर बनाइल रहिँत। प्रत्येक पठरामे पठ्वक बाह्रथो निउतरह्यनमेसे एक-एक जहनके नाउँ लिखल रहिन। 15महिन्से बात करुइया उ स्वर्गदूतके थेन शहर और ओकर दवार और ओकर देवालहे नापक लग एकथो सोनक लट्ठी रहिस। 16उ शहरके चारथो कोन्वा रहिस, और चारु कोन्वा एक्केनास रहिँत। उ स्वर्गदूत अपन नप्ना लट्ठीलेके शहरहे नापल: ओकर लम्बाई दुई हजार चार सौ किलोमिटर रहिस। यकर चौड़ाई और उँचाई यकर लम्बाईक बराबर रहिँत। 17ओकर पाछे स्वर्गदूत देवालके उँचाई नापल। ऊ यिहिहे ओस्तेँहेके नापल, जसिके मनै दोसुर चिज नप्थाँ। देवाल छ्यासँट्ठी मिटर ढेंग रहे। 18उ शहर निख्रल सोनेलेके बनल रहे, जोन सिसा हस चम्कतेहे। और यकर देवाल यशब नाउँक पठरालेके बनल रहे। 19देवालके जग मेरमेरके बहुमूल्य रत्नहुँक्रिहिनसे जोँटाइल रहे। सुरुक जग बिल्लौरके, दोसुर नीलमके, तेसर हरित रत्नक, चौथा पन्नक, 20पचौँ आनिक्स, छैठाँ लाल बहुमूल्य पठरा, सतौँ पितमणि, अठौँ बेरुज, नवौँ पुष्पराज, दशौँ लसुने, एघारौँ नीलमणि और बाह्रौँ कटेलक रहे। 21भित्तर जैना बाह्रथो दवार फेन एक-एकथो मोतीलेके बनल रहिँत। और शहरके डगर निख्रल सोनेलेके बनल रहे, जोन डगर सफा सिसा हस चम्कतेहे।

लावा यरुशलेमके महिमा

22मै ओम्ने कौनो मन्दिर नै देख्नु काकरेकी सर्वशक्तिमान प्रभु परमेश्वर और पठ्वा उ शहरमे बताँ। तबेकमारे वहाँ मन्दिरके कौनो जरुरी नै हो। 23उ शहरहे ओजरार करक लग सूर्य या जोन्ह्यँक कौनो जरुरी नै हो। काकरेकी परमेश्वरके महिमा उ शहरमे चम्कथिन। और पठ्वा फेन बताँ, जे उहिहे ओजरार बनैथाँ। 24उ शहरके चमक संसारमे रहुइया सक्कु जातिक मनैनहे ओजरार देहत, और पृथ्वीक सक्कु रज्वन अपन-अपन सम्पतिहे उ शहरमे नन्हीँ। 25उ शहरके दवार दिनभर खुलल रथाँ। ओइने कबु नै बन्द हुइथाँ, काकरेकी वहाँ कबु रात नै हुई। 26संसारके जाति-जातिनके मनै संसारके सक्कु खोब सुग्घुर-सुग्घुर चिजहे और अपन सम्पतिहे उ शहरमे नन्हीँ। 27पर कुछु फेन अशुद्ध चिज उ शहरमे नै पैँठी। अश्लील काम करुइया या झूँट बोलुइया केऊ फेन वहाँ नै पैठिहीँ। वहाँ ओइने किल पैँठे सेक्थाँ, जेनके नाउँ पठ्वक जीवनके किताबमे लिखल बतिन। यी उ किताब हो, जेम्ने उ मनैनके नाउँ लिखल बतिन, जेनके थेन सदाकालके जीवन बतिन।