मर्कूस

मर्कूसके लिखल खुशीक खबर

मर्कूस

लिखुइया

सक्कुहुनसे आघे जोन मण्डली रहे ओकर अगुवन एकमत होके मानल रहिँत कि यी किताब लिखुइया यूहन्ना मर्कूस रहे। लावा करारमे यूहन्ना मर्कूसके नाउँ दशचो आइल बतिस। (निउत. का. १२:१२,२५; १३:५,१३; १५:३७, ३९, कल. ४:१०; २ तिमो. ४:११; फिले. २४:१; १ पत्रु ५:१३) यी पदहुँक्रिहिनसे पता चलत कि यूहन्ना मर्कूस बारनाबासके भतिज्वा रहे (कल. ४:१०)। मर्कूसके दाईक नाउँ मरियम रहिस। ऊ यरुशलेम शहरमे एकथो धनी और सम्मानित जन्नीक रुपमे रहे। और ओकर घर सुरुमे विश्वास करुइया मनैनके लग प्राथना करना ठाउँ रहे। यूहन्ना मर्कूस पावल और बारनाबासके संग ओइन्के प्रचार यात्रामे गैल रहे (निउत. का. १२:२५; १३:५)। बाइबलमे यकर कैयोथो सबुत बा, और सुरुक मण्डलीक अगुवन फेन यी बात कथाँ कि मर्कूस और पत्रुसके गहिँर सम्बन्ध रहिन (१ पत्रु. ५:१३)। ऊ पत्रुसके अनुवाद करुइया फेन रहे, और हुई सेकत कि पत्रुसके प्रचार और प्रत्यक्ष गवाही मर्कूसके लग प्रभु येशूक खुशीक खबरके बारेम लिखक लग मुख्य माध्यम रहल हुई।

लिख्लक मिति और ठाउँ

लगभग ई. स. ५०-६०

मण्डलीक अगुवनके लिख्लक लेख (ईरेनियस, अलेक्जेन्द्रियक क्लेमेन्ट और आकुर लेख) यी बातहे साबित करथाँ कि मर्कूसके लिखल खुशीक खबर रोम देशमे लिखगिल रहे। सुरुक मण्डलीक स्रोतके कना बा कि यी खुशीक खबरके पूरा विवरण पत्रुस मुअल, तब् लिखगिल रहे।

भेटुइया

प्राचीन लेखसे मिलल सबुत हम्रिहिन्हे यी संकेत करत कि मर्कूस गैर-यहूदिक पह्रुइयनके लग ख्रीष्टके खुशीक खबरके विवरण लिखल जेम्ने विशेष करके रोमी मनै रहिँत। यहे कारण रहे कि ऊ येशू ख्रीष्टके खानदानहे नै दर्शाइल हो, काकरेकी संसारमे दोसुर जातिनके यकर कौनो महत्त्व नै हो।

उद्देश्य

मर्कूसके यी किताबहे पह्रुइया विशेष करके रोम देशमे रहुइया ख्रीष्टियन विश्वासी रहिँत, सन् ६७-६८ मे यने महा सतावटमे रहिँत। रोमी महाराजा नीरो जब राज करतेहे, वहे समयमे विश्वासीन बहुत दुःख पाके मुवाजाइँत। असिन परस्थितिमे मर्कूस ख्रीष्टके खुशीक खबरके विवरण लिखल, ताकि ख्रीष्टियन विश्वासीनहे सान्त्वना देजाए। काकरेकी ओइने असिन विनाशकारी परस्थितिमे रहिँत यहे कारण रहे कि ऊ येशूहे “दु:खीया नोकर” के रुपमे दर्शाइल बा (यशैया ५३ अध्याय)।

किताबके विभाजन

१. सेवाके कामके लग उजाड़-ठाउँमे येशूक तयारी

२. गालील और ओकर आँजरपाँजर येशूक सेवा

३. येशूक सहल दुःख और मुलक

४. यरुशलेम शहरमे येशूक सेवा,

५. येशूहे क्रूसमे टँगागिलक विवरण

६. येशूक मुके फेनदोस्रे जित्ती हुइलक और देखा पर्लक