२ थेसलोनिकी 3

प्राथनक लग निवेदन

1हे मोरिक विश्वासी भैयो, अन्त्यमे, हमार लग प्राथना करो, ताकि प्रभु येशूक बारेमे सन्देश झत्तेहेँ बहुत्ते ठाउँमे सुने मिले। और जोन मनै यिहिहे सुन्हीँ, ओइने यी सन्देशहे आदर करिँत, जसिके तुहुरे कर्ले बतो। 2और यी फेन प्राथना करहो कि दुष्ट और खराब मनैनके करना नोक्सानीसे परमेश्वर हम्रिहिन्हे बँचाई सेकिँत। काकरेकी खुशीक खबरहे सुनुइया बहुत्ते मनै यम्ने विश्वास नै करथाँ। 3पर तुहुरे परमेश्वरकेमे पूरा रुपमे भरोसा करे सेक्थो। ऊ तुहुरिन्हे आत्मिक रुपमे बल्गर बनैहीँ, और शैतानसे सुरक्षित धरहीँ। 4और हम्रे तुहुरिन्हे ज्या चिज करे कले बती, तुहुरे ओस्तेहेँके करतो, और कर्ती रबो कना प्रभुमे तुहुरिन्के उप्पर हम्रिहिन्हे पूरा भरोसा बा। 5हम्रे प्राथना कर्थी कि प्रभु येशू तुहुरिन्हे देखाइँत कि परमेश्वर तुहुरिन्हे कतरा माया करथाँ। और तुहुरे ओस्तेहेँके सहो, जसिके येशू ख्रीष्ट सहलाँ।

अल्छिहे चेतावनी

6हे मोरिक विश्वासी भैयो, हम्रे तुहुरिन्हे प्रभु येशू ख्रीष्टके नाउँमे आज्ञा देहती कि असिन कौनो फेन विश्वासी भैयनसे या बाबुनसे दूर रहो, जेने अल्छि करथाँ। और उ आदेशके पालन नै करथाँ, जोन आदेश हम्रे तुहुरिन्हे सिखैले बती। 7काकरेकी तुहुरे अप्निहीँ बहुत मजासे जन्थो कि तुहुरिन्हे ओस्तेहेँके जिए परत, जसिके हम्रे जिअतिही। काकरेकी जब हम्रे तुहुरिन्के संग रहतिही, तब हम्रे अल्छि नै रही पर हम्रे काम करी। 8अतरा किल नै हो, हम्रे केक्रो रोटी फोकत्यामे नै खैली। पर हम्रे रातदिन मेहनत कर्ली, और काम कर्ती रली, ताकि हम्रिहिन्हे अपन जरुरी पूरा करक लग तुहुरिन्मेसे केक्रोमे फेन निर्भर हुई ना परे। 9हम्रे कर्रा मेहनत यी कारणसे नै कर्ली कि हमार थेन तुहुरिन्से सहायता मंग्ना अधिकार नै रहे। पर हम्रे यी कारणसे मेहनत कर्ली, जिहिसे हम्रे तुहुरिन्के लग नमूना बने सेकी, ताकि तुहुरे हमार जसिन चाल चले सेको। 10जब हम्रे तुहुरिन्के संग रहतिही, तब हम्रे तुहुरिन्हे घनी-घनी कले रही, कि यदि केऊ कौनो फेन काम करना अस्वीकार करत कलेसे उहिहे कुछु फेन खाना खाई ना देहो। 11हम्रे सुन्ले बती कि तुहुरिन्मेसे कौनो-कौनो मनैनके जीवन अल्छिपनसे भरगिल बतिन, और ओइने कौनो फेन काम नै करथुँइत। पर ओइने हरदम दोसुर जहनके काममे बाधा देथाँ, और ओइन्हे काम करे नै देथाँ। 12असिन मनैनहे हम्रे प्रभु येशू ख्रीष्टके नाउँमे आज्ञा देहती, और ओइन्हे बिन्ती करती कि ओइने शान्तिसे काममे लागजाइँत, और ओइने अपने मेहनतके कमाहिँसे खाना खाइँत। 13हे मोरिक विश्वासी भैयो, काकरेकी तुहुरे निराश बतो। तबेकमारे उ काम करना बन्द ना करो, जोन काम सही बा। 14यदि केऊ हमार यी चिट्ठीक आदेशहे नै मानी कलेसे पक्का करलेहो कि उ के हो कहिके सक्कु जाने जानित। और तुहुरे उहिसे दूरे रहहो, ताकि ओकर लाज होजाइस। 15तभुन फेन उहिसे असिन व्यवहार ना करहो, जसिके कि ऊ तुहुरिन्के दुश्मन हो। पर एकथो विश्वासी भैयक रुपमे उ ज्या कर्ले बा, आबसे ओसिके ना करे कहिके उहिहे चेतावनी देऊ।

आखिरी अभिवादन

16आब मै प्राथना करतुँ कि प्रभु जे शान्तिक स्रोत हुइँत, ऊ हर प्रकारसे हरदम तुहुरिन्हे शान्ति देती रहिँत। और मै यी फेन प्राथना करतुँ कि प्रभु हरदम तुहुरे सक्कुहुनके संग रहिँत। 17मै पावल, अपन हाँथेलेके अभिवादन लिख्थुँ। मै अपन सक्कु चिट्ठिक अन्त्य अस्तेहेँके लिख्थुँ, ताकि सक्कु जाने जानलिँत कि यी चिट्ठी मोरिक ओहोँरसे हो। 18मै प्राथना करतुँ कि हमार प्रभु येशू ख्रीष्टके अनुग्रह तुहुरे सक्कुहुनकेमे हरदम पलिरहे।