२ पत्रुस 1

1मै, सिमोन पत्रुस तुहुरिन्हे यी चिट्ठी लिखतुँ, मै येशू ख्रीष्टके सेबक और निउतरह्या हुइतुँ। मै तुहुरे सक्कुहुनहे लिखतुँ, जे-जे हमार सक्कुहुनके हस अनमोल विश्वास भेटैले बतो। यी विश्वास हमार परमेश्वर और मुक्तिदाता येशू ख्रीष्टके माध्यमसे हम्रिहिन्हे देगिल बा, जे हम्रिहिन्हे परमेश्वरके संग धर्मी बनैथाँ।

2मै प्राथना करतुँ कि परमेश्वर और हमार प्रभु येशूक ज्ञानमे तुहुरे बहर्ती जाईबेर परमेश्वर तुहुरिन्हे धेउरसे धेउर अनुग्रह और शान्ति दिँत।

ख्रीष्टके बोलावत और चुनाव

3हम्रे परमेश्वरहे चिहिन्लक कारण ऊ हम्रिहिन्हे अपन संग रलक उ शक्ति देले बताँ। तबेकमारे हमार थेन हुँकिन्हे खुशी बनैना जीवन जिअक लग चहना सक्कु चिज बताँ। यी सम्भव बा काकरेकी हम्रे परमेश्वरहे चिहिन्थी। और ऊ वहे हुइँत, जे हम्रिहिन्हे अपन महानता और नैतिक भलाईक माध्यमसे अपन मनै हुइक लग बलैले बताँ। 4और हुँकार महिमा और भलाइक कारण, ऊ हम्रिहिन्हे बहुत बरवार और बहुत्ते अनमोल वाचा देले बताँ। यी वरदाननहे प्रयोग करके हम्रे यी संसारके उ खराब इच्छासे बँचे सेक्थी, जोन इच्छा मनैनहे नाश करदेहत, और परमेश्वरके अपने स्वभावमे शामिल हुई सेक्थी। 5काकरेकी तुहुरे परमेश्वरके स्वभावमे शामिल हुइक लग बनगिल बतो। तुहुरे ख्रीष्टहे विश्वास किल नै करना हो, पर तुहुरे दोसुर जहनके लग नैतिक हिसाबसे हरदम मजा काम करना कोशिस फेन करे परत। तुहुरे नैतिक हिसाबसे मजा काम किल करना नै हो, पर तुहुरे बुद्धिमान तरिकासे व्यवहार करुइया मनै फेन बने परत। 6तुहुरिन्हे समझदारीसे कसिके व्यवहार करे परत कहिके किल नै जाने परत। बेन तुहुरे अपन्हे अप्निहीँ नियन्त्रण फेन करे परत। तुहुरे अपन्हे अप्निहीँ नियन्त्रण किल करे नै परत, पर समस्यामे फेन सँस्सा करे परत। तुहुरे समस्यामे सँस्सा किल करे नै परत, पर तुहुरे परमेश्वरहे खुशी बनैना जीवन फेन जिए परत। 7तुहुरे परमेश्वरहे खुशी बनैना मेरके किल जीवन ना बिताऊ। पर अपने परिवारके सदस्य हस तुहुरे एकदोसर जहनहे प्रेम फेन करे परत। 8यदि तुहुरे अस्तेहेँके धेउरसे धेउर अपन जीवन बितैबो कलेसे तुहुरे हमार प्रभु येशू ख्रीष्टहे काम लग्ना और फलदायी हुइना मेरसे जन्बो।

9पर यदि कौनो मनैया असिके जीवन नै बिताइत कलेसे ऊ एकथो मजासे हेरे नै सेक्ना अथवा आँधर मनैया हस हो। ऊ यी बात बिस्रागिल बा कि ख्रीष्टहे विश्वास करनासे पहिले ओकर कर्लक पाप परमेश्वर माफ कर सेकल बताँ।

10तबेकमारे हे मोरिक विश्वासी भैयो, अपनहे और दोसुर मनैनहे यी साबित करो कि परमेश्वर जात्तिकमे तुहुरिन्हे हुँकार अनुशरण करक लग बलाइल बताँ। और तुहुरिन्हे हुँकार मनै हुइक लग रोजल बताँ। यदि तुहुरे यी गुण स्वीकार कर्लो कलेसे तुहुरे ख्रीष्टहे भरोसा करना कबु नै छोर्बो।

11और ओक्रेहे संगसंगे परमेश्वर तुहुरिन्हे उ येशू ख्रीष्टके रहल राज्यमे भव्य स्वागत करहीँ, जे हमार प्रभु और मुक्तिदाता हुइँत। ऊ वहाँ सदामानके लग रज्वा होके राज करहीँ।

पवित्र शास्त्रक अगमवाणी

12यी बात तुहुरिन्हे पैलेहेँ पता होसेकल बा, और तुहुरे तुहुरिन्हे ख्रीष्टके बारेमे मनैनके सिखैलक सच्चा शिक्षामे बल्गर हुइल बतो। तभुन फेन मै उ बातके बारेमे तुहुरिन्हे लगातार याद कर्वैती रहम। 13महिन्हे पता बा कि मै जित्ती रहतसम तुहुरिन्से सेकतसम उ बातके बारेमे लगातार बोल्ती रना सही बा, ताकि तुहुरे उ बात बिस्राई ना सेको। 14काकरेकी मै जन्थुँ कि मै झत्तेहेँ मुजिम। काकरेकी हमार प्रभु येशू ख्रीष्ट महिन्हे फरछ्वारसे उ देखादेले बताँ। 15तबेकमारे मै तुहुरिन्हे यी बात अब्बे लिख्के कर्रा मेहनत करतुँ, ताकि मै मुके सेकम ते तुहुरे यी बात जबफेन याद करे सेको।

ख्रीष्टके महिमक दर्शन

16जब हम्रे निउतरह्यनके तुहुरिन्हे हमार प्रभु येशू ख्रीष्टके शक्ति और आगमनके बारेमे प्रचार कर्ले रही। तब चलाँख होके हम्रे तुहुरिन्हे बनैलक खिस्सा नै कहतिही। बेन हम्रे अप्निहीँ ख्रीष्टके बरवार महिमा देखल बती।

17-18जब येशू परमेश्वर बाबासे आदर और महान महिमा भेटैलाँ, तब हम्रे हुँकारे संग पवित्र पहाड़मे रही। तब्बेहेँ सर्वोच्च महिमा, परमेश्वरके थेनसे हुँकिन्हे असिक कती आवाज आइल, “यी मोरिक अपने दुलार छावा हो, जिहिसे मै एकदम खुशी बतुँ।” हम्रे अप्निहीँ फेन स्वर्गमेसे अइलक यी आवाजहे सुन्ली। 19तबेकमारे हम्रे परमेश्वरके अगमवक्तनके माध्यमसे लिख्लक पवित्र शास्त्रमे अभिन फेन भरोसा कर्थी। यदि तुहुरे यी सन्देशमे ध्यान देबो कलेसे तुहुरे मजा काम कर्बो। काकरेकी यी बेहान नै हुइतसम अंधारमे चम्कती रहल दिया हस हो। और बेहानीक ओजरार संसारमे ओजरार नानल हस ख्रीष्टके ओजरार तुहुरिन्के भित्री मनमे चम्की। 20पर यी बुझ्ना एकदम जरुरी बा कि पवित्र शास्त्रमे तुहुरिन्के पहरना अगमवक्तनके अपन विचार नै हुइतिन। 21काकरेकी कौनो फेन अगमवाणी मनैनसे नै आइल। पर पवित्र आत्मा अगमवक्तनके मनहे चलैलिन, और ओइने परमेश्वरके सन्देशहे मनैनहे बतैलाँ।