Deukhuri Bible
२ यूहन्ना 1
मै यूहन्ना, मण्डलीक अगुवा, यी चिट्ठी उ महिला और ओकर लर्कनहे लिखतुँ, जिहिहे परमेश्वर चुन्ले बताँ, और जिहिहे मै सच्चा प्रेम करथुँ और मै किल नै होके, पर उ सक्कु जाने फेन प्रेम करथाँ जेने सच्चाइहे चिहिन्थाँ। हम्रे तुहुरिन्हे प्रेम कर्थी। काकरेकी सच्चा शिक्षा हमार मनमे पलिरहत, और सदादिन हमारमे पलिरही। परमेश्वर बाबा और ओकर छावा येशू ख्रीष्टके ओहोँरसे अनुग्रह, दया और शान्ति, यी सक्कु हमार लग हुइँत, जेने सच्चाइसे चल्थाँ, और एकदोसुर जहनहे प्रेम करथाँ।
ख्रीष्टके आज्ञा पालन करना
मै बहुत खुशी हुइनु जब मै सुन्नु कि तोहाँर कौनो-कौनो लरका उ सच्चाइसे जीवन जिअतताँ जसिके हमार परमेश्वर बाबा करे कहल बा। आब हे महिला, मै तुहिन्हे बिन्ती करतुँ कि हम्रे एकदोसुर जहनहे प्रेम करे परत। यी कौनो लावा आज्ञा नै हो, पर वहे आज्ञा हो, जिहिहे हम्रे वहे समयसे जन्थी, जब हम्रे ख्रीष्टके पाछे नेंग्ना सुरु कर्ले रही। परमेश्वरसे प्रेम करना सच्चा तरिका यी हो कि हम्रे ओस्तेहेँके जिई, जसिके परमेश्वर जिए कले बताँ।
ख्रीष्ट विरोधीक धोखासे हौश्यार
मै यी यहे कारणसे कहतुँ, काकरेकी बहुत्ते मनै जेने झूटा शिक्षा देके दोसुर जहनहे धोखा देथाँ। ओइने संसारके प्रत्येक ठाउँमे गैल बताँ। ओइने कथाँ कि येशू ख्रीष्ट एकथो मनैयक रुपमे यी संसारमे नै अइलाँ। यदि कौनो मनैया असिक कहत कलेसे, ऊ मनैया ख्रीष्टके विरोधी हो, जे जबफेन मनैनहे धोखा देहत। तबेकमारे तुहुरिन्हे हौश्यार रना चाही कि कहुँ यने तुहुरिन्हे धोखा ना दिँत। ताकि परमेश्वरके सेवक लग तुहुरिन्के करगिलक कोशिस बेकार ना होए। पर परमेश्वर तुहुरिन्हे तुहुरिन्के सेवा कर्लक पूरा ईनाम दिँत।
उ मनै जेने सच्चा शिक्षासे भटकजिथाँ, और ख्रीष्टके शिक्षक पालन नै करथाँ, ओइने परमेश्वरके संग एकतामे नै हुइँत। जे ख्रीष्टके शिक्षा पालन करत, ऊ हमार परमेश्वर बाबा और परमेश्वरके छावा येशू ख्रीष्टके संग एकतामे बा। यदि केऊ तुहुरिन्के थेन आके यहे शिक्षा नै देहत कलेसे उहिहे घरेम आई ना देऊ। और उहिहे नमस्कार करके उत्साहा फेन ना देऊ। काकरेकी जे फेन उहिहे उत्साहा देहत कलेसे ऊ फेन ओकर कर्ती रहल खराब काममे शामिल होजाइत।
अन्तिम नमस्कार
बहुत्ते बात बा, जोन मै तुहिन्हे बताई चहथुँ। पर उ बात मै असिके एकथो चिट्ठीमे लिखे नै चहथुँ; पर महिन्हे आशा बा, कि मै तुहुरिन्के थेन आऊँ, और एक्के थेन होके बात बत्वाऊँ: तब हम्रे एक्के संग गजब खुशी हुइबी। यहाँ तोहाँर बाबुक लरका, जेनहे परमेश्वर चुन्ले बताँ, ओइने तुहिन्हे नमस्कार करतताँ।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.