Deukhuri Bible
१ थेसलोनिकी 3
तबेकमारे हम्रे तुहुरिन्हे बिना देख्ले रहे नै सेक्ली। तब् हम्रे एथेन्स शहरमे रुकल पलिरना ठिक सम्झली। और तिमोथी जे ख्रीष्टके खुशीक खबरमे हमार भैया हो, और परमेश्वरके सेबक हो। हम्रे उहिहे तुहुरिन्के थेन यी कारणसे पठैली कि ऊ तुहुरिन्हे बल्गर बनाए। और तुहुरिन्के विश्वासके बारेमे तुहुरिन्हे उत्साहा देहे। ताकि केऊ यी दुःखके कारण डगमगा नाजाए। काकरेकी तुहुरे अप्निहीँ जानतोहो कि हम्रिहिन्हे दुःख उठाई परी। काकरेकी पहिले फेन जब हम्रे तुहुरिन्के थेन रही। तब् हम्रे तुहुरिन्हे कहि कि हम्रिहिन्हे दुःख उठाई परी। और ओस्तेहेँ हुइल बा। और उ तुहुरिन्हे पतै बा। तबेकमारे जब तुहुरे कसिन बतो कना बिना जन्ले मै रहे नै सेक्नु। तब परीक्षा करुइया शैतान तुहुरिन्के परीक्षा ते ना करल बा। और असिन हुई कलेसे हमार मेहनत बेकार होजाई कना मोरिक मनमे डर रहे। और असिन ना होए कहिके मै तिमोथीहे तुहुरिन्के विश्वासके हाल जानक लग तुहुरिन्के थेन पठैनु।
तिमोथीक नानल खबर
पर अब्बे तिमोथी तुहुरिन्के थेनसे हमार थेन आके तुहुरिन्के विश्वास और प्रेमके खुशीक खबर हम्रिहिन्हे सुनाइल। ऊ हम्रिहिन्हे यी फेन बताइल कि तुहुरे हम्रिहिन्हे जबफेन प्रेमसे याद करथो। और जसिके हम्रे तुहुरिन्हे भेँटा करे चहथी, ओस्तेके तुहुरे फेन हम्रिहिन्से भेँटा करे चहथो। हे मोरिक विश्वासी भैयो, तबेकमारे हम्रे अपन कष्ट और दुःखमे फेन तुहुरिन्के बारेमे तिमोथीक थेनसे यी सुनके हौसल बती कि तुहुरे अपन विश्वासमे बल्गर बतो। तुहुरे प्रभुमे बल्गर बतो कहिके पता पैना हमार लग लावा जीवन भेटाइल हस हो। तुहुरिनेके कारण हम्रे हमार परमेश्वरके आघे आनन्द मनैथी। यकर बद्लामे हम्रे परमेश्वरहे जतरा फेन धन्यवाद देलेसे फेन उ कम रहत। हम्रे हरदम प्राथना कर्ती रथी कि हम्रे फेनदोस्रे तुहुरिन्से भेँटा करे आई सेकी। ताकि प्रभु येशू ख्रीष्टमे आकुर बल्गरसे विश्वास करनामे तुहुरिन्के सहायता करे सेकी।
मण्डलीक लग प्राथना
हम्रे प्राथना कर्थी कि हमार बाबा परमेश्वर और प्रभु येशू तुहुरिन्से भेँटा करे तुहुरिन्के थेन आइक लग हमार डगर बनादिँत। और हम्रे प्राथना कर्थी कि जसिके हम्रे तुहुरिन्हे प्रेम कर्थी, ओस्तेके एकदोसुर जहनहे प्रेम करक लग प्रभु येशू तुहुरिन्हे सहायता करिँत। और दोसुर जहनमे फेन तुहुरिन्के प्रेम बह्रे। और प्रभु तुहुरिन्के प्रेमहे बह्राइँत। और तुहुरिन्केमे हमार प्रेमहे फेन बह्राइँत। हम्रे प्राथना कर्थी कि हमार प्रभु येशू तुहुरिन्के मनहे असिन बल्गर बनाइँत, कि जब हमार प्रभु येशू अपन पवित्र मनैनके संग फेनदोस्रे फिर्ता अइहीँ। तब ऊ परमेश्वर बाबक आघे तुहुरिन्हे पवित्र और निर्दोष ठहराई सेकिँत।
Deukhuri Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.