ယာကုပ် 4:8

လောကန မိတ်သဟာယဖွဲ့ရှင်း

1နန်းနို့လေဟှာ ဖြားဖြစ်ကြောန့် ရန်ဖြစ်ရှင်းလေန ငြင်းပွားရှင်းလေဟှို ဖြစ်စေနူး။ နန်းနို့လေရဲ့ ကိုယ်ကာယရဲ့ လိုအပ်ဟှူ ဆန္ဒလေကြောန့် ဖြစ်ဇာ မှုဟှလော။ 2နန်းနို့လေဟှာ ကိုယ်လိုရှင်ဇာလေ ရဘဲ့ကြောန့် လူလေဟှို သတ်ဟှို့တွပ် ဆင်သင့်ရှိနေဂေ့ဟှယ်။ ရရာတိုင်း လိုရှင်ဇာလေဟှို ရနိုင်ဘဲ့ဟှူကြောန့် ဂြင်းနေဂေ့ဟှယ်။ ရန်လည်းဖြစ်ဂေ့ဟှယ်။ နန်းနို့လိုရှင်ဇာလေ ရဂေ့ဘဲ့ဇာဟှာ ဘုရားသခင်မာ တောန်းဂေ့ဘဲကြောန့် ဖြစ်ဟှယ်။ 3နန်းနို့ တောန်းရှော့‑က်ဇာဟှာ ရည်ရွယ်ချစ် လွှဲမှားဘီး ကိုယ့်ရဲ့ စည်းဇိမ်အောက်စာ ခံစားဟှို့တွပ်ဘဲ့ တောန်းရှော့‑က်ဂေ့ဟှူကြောန့် ဖြစ်ဟှယ်။ 4နန်းနို့ဟှာ သစ်စာမှေ့ဘဲန ဆိုးညစ်ဟှူလူလေ ဖြစ်ဂေ့ဟှယ်။ လောကန ခင်ရှင်ဟှူ လူလေဟှာ ဘုရားသခင်ဟှို ရန်ရှာဟှူလူ ဖြစ်ဟှယ် ဆိုဇာ နန်းနို့ သိဘီး နားလည်ဂေ့ဟှလော။ လောကန မိဆွေဖြစ်ရှင်ဟှူလူဟှာ ဘုရားသခင်ရဲ့ ရန်သူဖြစ်ဟှယ်။ 5ကျမ်းစာဟှ “နို့လေထဲဟှို ဘုရားသခင်ပေးဟှူ ဝိညာဉ်တော်ဟှာ သဝန်တိုဟှူဘောန တောန်းတတော်မူဟှယ်”1 ဆိုဘီး ကြောန်းမှေ့ဘဲန ဖော်ပြဟှားဟှယ် ဆိုဘီး နန်းနို့ ထန်နေဂေ့လော။ 6အယ်ဘေမဲ့ နို့လေဟှို ဘုရားသခင်ပေးဟှာဟှူ ကျေးဇူးတော်ဟှာ ပိုဘီး ဟှာ စွမ်းအားကီးဟှယ်။ “ဘုရားသခင်ဟှာ မာနကီးဟှူလူလေဟှို နှီခ္လဟှူ လူလေဟှို ကျေးဇူးတော်ဟှို ခ္လပေးဟှယ်” ဆိုဘီး ကျမ်းစာလာဟှူဇာန ညီဟှယ်။

7အယ်ကြောန့် ဘုရားသခင်ရဲ့ လိုတော်ဟှို လိုက်ဂေ့ပါ။ မာရ်နတ်ဟှို ဆီးတာဂေ့ပါ။ အယ်မျိုးလောက်မယ် ဆိုဟှာ သူဟှာ နန်းနို့နားဟှနေဘီးဟှာ ထွပ်ပ္လေးဟှားလေ့မယ်။ 8ဘုရားသခင်နားဟှို သွားဂေ့။ အယ်မျိုးဆိုဟှာ ကိုယ်တော်ဟှာ နန်းနို့နားဟှို ကြွလာလေ့မယ်။ ပြစ်ကျူးလွန်ဟှူလူလေ၊ နန်းနို့လတ်လေဟှို ဆေးဂေ့ပါ။ မာနကီးဟှူလူလေ၊ နန်းနို့လေရဲ့ စိနှလောင်းဟှို သန့်ရှင်းစင်ကြယ်အောန်လောက်ဂေ့ပါ။ 9ဝန်းနည်းကြေကွဲဂေ့ပါ။ ငိုဘီးဟှာ ညီးတွားဂေ့ပါ။ နန်းနို့ ရယ်ဇာလေဟှို ငိုဇာဖြစ်စေဂေ့ပါ။ နန်းနို့ ဝန်းသာဇာဟှို ဝန်းနည်းဇာ ဖြစ်စေဂေ့ပါ။ 10နန်းနို့ဟှာ ကိုယ့်ကိုယ်ကိုယ် ဘုရားသခင်ရှေ့မာ နှိခ္လဂေ့ပါ။ အယ်မျိုးဆိုဟှာ ကိုယ်တော်ဟှာ နန်းနို့ဟှို ချီးမြှော့‑က်လေ့မယ်။

စစ်ကြောစီရင်ဂေ့ဘဲဟှို့တွပ် ဒိပေးကြောန်း

11ညီကို မောန်နှမလေ၊ နန်းနို့ဟှာ ရှင်းရှင်း ယော့‑က်နယော့‑က် ပေါက်ခတ်ဘီး ဝေဖန်ရှင်းန စစ်ကြောစီရင်ရှင်းလေဟှာ ပညတ်တရားဟှို ပေါက်ခတ်ဘီး ပြောနေဇာနတူဟှယ်။ ပညတ်တရားဟှို စီရင်ဂေ့မယ် ဆိုဟှာ နန်းနို့ဟှာ အယ်မူတရားဟှို ကျင့်ဟှူလူမှုဘဲန စစ်ကြောစီရင်ဟှူ လူလေဘဲ့ ဖြစ်ဂေ့ဟှယ်။ 12ဘုရားသခင်တပါးဘဲ့ ပညတ်တရားဟှို ပေးဘီး စီရင်ပိုင်ဟှူ သခင်ဖြစ်ဟှယ်။ ကိုယ်တော် တပါးဒဲဘဲ့ ကယ်တန်နိုင်တွပ်ရော၊ ဖျစ်ဆီနိုင်ဟှို့တွပ် တတ်နိုင်ဟှယ်။ နန်ဟှ ဖယ်သူဖြစ်ကြောန့် အီဇနီးရှင်းဟှို စီရင်ရနူး။

ဝါကြွားဘဲဟှို့တွပ် ဒိပေးကြောန်း

13“အယ်နေ့မှုဘဲနေဟှာ နတ်ကီးတိုင်ဟှာ အယ်ဗြို့ဟှို နို့လေသွားဘီး တနှစ်လော့‑က်နေဂေ့ဇို့။ အယ်ဗြို့မာ ကူသယ်လောက်ဘီး ကပ်လေဘောင်ဂီးရှာဂေ့ဇို့” ဆိုဘီး နန်းနို့ထဲဟှ တချို့ပြောဂေ့ဟှယ်။ အယ်ဘေမဲ့ ငါပြောဇာဟှို နားထောန်ဂေ့။ 14နန်းနို့ဟှာ နတ်ကီးတိုင်ဟှာ ဖယ်မျိုးဖြစ်မယ် ဆိုဇာ သိနိုင်ဂေ့ဟှ။ နန်းနို့သတ်ဟှာ ရှစ်ဟှားပေါ်လာဘီးန ပျော့‑က်ဟှားတတ်ဟှူ မီးခိုးနတူဟှယ်။ 15“ဘုရားသခင် လိုတော်ရှိမယ် ဆိုဟှာ နို့လေဟှာ သတ်ရှင်ဘီး အယ်မှုလေဟှို အယ်မျိုးလောက်မယ်။ အယ်မျိုးလောက်ဂေ့ဇို့” ဆိုဘီး နန်းနို့ပြောဂေ့ဟှယ်။ 16ခုနန်းနို့ဟှာ မာန်မာနကီးဘီး ဝါကြွားတတ်ဂေ့ဟှယ်။ အယ်မျိုးဝါကြွားဇာဟှာ ပြစ်ဖြစ်ဟှယ်။

17အယ်ကြောန့် ကောန်းဟှူကျင့်ဟှို သိဘီးဟှာ လောက်ဘဲနေဟှူလူဟှာ ပြစ်ရှိဟှယ်။