ဂလာတိ 6

ရှင်းရှင်း ဝန်ထောက်လေဟှို ကူညီပေးဂေ့ကြောန်း

1ယောင်ကြည်သူလေ၊ ယော့‑က်ယော့‑က်ဟှ ကောန်းဘဲဟှူ မှုတခုခု ကျူးလွန်နေဇာဟှို နန်းနို့တွိလိုက်ဟှယ် ဆိုဟှာ ဝိညာဉ်တော်အားဖြင့် သတ်ရှင်ဟှူ နန်းနို့ဟှာ နူးညံ့မှုန အယ်လူလေဟှို ပြုပြင်ပေးရမယ်။ အယ်ဘီးဟှာ နန်းနို့ကိုယ်တိုင်လည်း သွီးဆောန်ဇာနော့‑က်ဟှို ပါဘဲ့ဟှို့တွပ် ဒိထားဂေ့ပါ။ 2ရှင်းရှင်းရဲ့ ဝန်ထောက်လေဟှို ကူညီပေးဂေ့ပါ။ အယ်မျိုးလောက်ရှင်းဟှာ နန်းနို့ဟှာ ခရစ်တော်ရဲ့ ပညတ်တော်ဟှို ပ္လဲ့ဇောင်စေလေ့မယ်။1 3ယော့‑က်ယော့‑က်ဟှ ဖြားလည်းမှုဘဲန ကိုယ့်ကိုယ်ကိုယ် ရေးပါရာရော့‑က်ဟှယ် ဆိုဘီး ထန်မှတ်မယ် ဆိုဟှာ သူဟှာ ကိုယ့်ကိုယ်ကိုယ် လှည့်ဇားဟှူ လူဖြစ်ဟှယ်။ 4နန်းနို့လေယော့‑က်တိုင်းဟှာ ကိုယ့်ရဲ့ ပြုမူလေဟှို စစ်ဆေးရမယ်။ အယ်မျိုးဆိုဟှာ သူများဟှိုမှုဘဲ ကိုယ့်ရဲ့ ပြုမူဟှာ ကောန်းဟှယ် ဆိုဘီး နန်းနို့ဟှာ ဂေါင်ယူဝါကြွားနိုင်လေ့မယ်။ 5ဖြားဖြစ်ကြောန့်နူးဆိုဟှာ နန်းနို့ယော့‑က်တိုင်းဟှာ နန်းနို့ရဲ့ ဝန်ဟှို လောက်ဆောန်ရဟှို့ ဖြစ်ဟှယ်။

6နန်းနို့ဟှာ တရားတော်ဟှို သန်ယူဟှူ လူလေဖြစ်ဟှယ် ဆိုဟှာ သန်ပေးဟှူ ဆရာဟှို ကောန်းဟှူ ရာရှိမျှဟှို ဝီမျှရမယ်။

7လွဲယူဂေ့န။ ဘုရားသခင်ဟှာ ထီမဲ့မြင်ပြုဇာဟှို ခံတော်မူဟှ။ ဖြားဖြစ်ကြောန့်နူးဆိုဟှာ လူဟှာ မျိုးစေ့ကြဲဟှူတိုင်း သီးနှံဟှို ရိရလေ့မယ်။ 8နန်းနို့ဟှာ လူ့ဇာတိမ္လေမာ မျိုးစေ့ကြဲမယ် ဆိုဟှာ ပေါက်ပျစ်ဟှူ သီးနှံဟှို ရိသီးရဘီးဟှာ ဝိညာဉ်တော်မ္လေမာ မျိုးစေ့ကြဲမယ် ဆိုဟှာ ထာဝရသတ်ရှင်ဟှူ သီးနှံဟှို ရိသီးရလေ့မယ်။ 9အယ်မျိုးလောက်မယ် ဆိုဟှာ နို့လေဟှာ အားငယ်စိပျစ်ဘဲ ကောန်းဟှူ လောက်ဆောန်မှုဟှို လောက်ဆောန်မယ် ဆိုဟှာ နို့လေဟှာ သီးနှံရိဟှို့ခီရော့‑က်လာခီမာ သီးနှံဟှို ရိသီးရလေ့မယ်။ 10အယ်ဘီဟှာ နို့လေဟှာ ခွမ့်ရေးရတိုင်း လူတိုင်းရဲ့ကောန်းကျိုးဟှို လောက်ဆောန်ဘီး ထူးအားဖြင့် ယောင်ကြည်သူဖြစ်ဟှူ မိသားစုဝမ်လေရဲ့ ကောန်းကျိုးဟှို လောက်ဆောန်ရမယ်။

နော့‑က်ဆောင်းဒိပေးဇာန နှောက်ဆစ်ဇာ

11ခု ဖယ်မျှကီးဟှူ စာလောင်းလေန နန်းနို့နားဟှို ငါ့လတ်န ရေးလိုက်ဇာဟှို နန်းနို့ကေ့ဂေ့။ 12နန်းနို့ဟှို ရေဖျားလှီးဇာခံဟှို့ တင်းတိုက်တွန်းဟှူ လူလေဟှာ ပြင်ပလတ်ခဏာလေဟှို ဝါကြွားရှင်ကြောန့် ဖြစ်ဟှယ်။ သူးနို့လေ အယ်မျိုးလောက်ဇာဟှာ ခရစ်တော်ရဲ့ လတ်ဝါးကပ်တိုင် တရားတော်ကြောန့် ညှဉ်းဆဲနှိစစ်ဇာဟှို ခံရှင်ဘဲကြောန့်ဖြစ်ဟှယ်။ 13ရေဖျားလှီးဟှားဟှူ လူလေဟှာ ပညတ်တရားဟှို သူးနို့ကိုယ်တိုင်လည်း လိုက်ရှော့‑က်ဂေ့ဟှ။ ရေဖျားလှီးဟှားဟှူ လူလေဟှာ ပြင်ပလက်ခဏာလေဟှို ဝါကြွားရှင်ကြောန့် နန်းနို့ဟှို ရေဖျားလှီးခံစေရှင်ဇာဖြစ်ဟှယ်။ 14ငါဟှာ သခင်ယေရှုခရစ်တော်ရဲ့ လတ်ဝါးကပ်တိုင်တော်ကြောန်း တခုဘဲ့ ဝါကြွားရလေ့မယ်။ ဖြားဖြစ်ကြောန့်နူးဆိုဟှာ ကိုယ်တော်ရဲ့ လတ်ဝါးကပ်တိုင်တော်မာ အယ်လောကဟှာ ငါ့တွပ်သေဟှားဘီ ငါဟှာလည်း အယ်လောကတွပ် သေခံဘီ။ 15အယ်ကြောန့် ရေဖျားလှီးလည်း ဖြားကျိုးလည်း မှေ့ဟှ။ ရေဖျားလှီးဘဲဇာလည်း ဖြားကျိုးလည်း မှေ့ဟှ။ သတ္တဝါသစ် ဖြစ်ဇာဘဲ့ကျိုး ရှိဟှယ်။ 16အယ်နည်းတိုင်း လိုက်ရှော့‑က် သတ်ရှင်ဟှူ လူလေန ဘုရားသခင်ရဲ့ လူမျိုးထတ်ဟှို ငြီသတ်မှုန ကရုဏာတော်ဟှာ သက်ရောက်ပါစေ!

17နိဂေါင်းချောက်ရမယ် ဆိုဟှာ ငါ့ဟှို ဖယ်လူလည်း နော့‑က်ထပ် နှော့‑က်ယှစ်ဂေ့န။ ဖြားဖြစ်ကြောန့်နူးဆိုဟှာ ငါ့ကိုယ်မာရှိဟှူ ဒန်ရာလေဟှာ သခင်ယေရှုခရစ်တော်ရဲ့ ကျွန်ဖြစ်ဟှယ် ဆိုဇာဟှို ပြနေဇာဖြစ်ဟှယ်။

18ယောင်ကြည်သူလေ၊ နို့လေသခင် ယေရှုခရစ်တော်ရဲ့ ကျေးဇူးတော်ဟှာ နန်းနို့ ဝိညာဉ်နတူးဒူ ရှိပါစေ။ အာမင်။