ဧဖက် 3

လူမျိုးခြားလေတွပ် ပေါလု မှုတော်ဆောန်ကြောန်း

1အယ်ကြောန်းကြောန့် ခရစ်တော်ယေရှုရဲ့ ကျဉ်းသားဖြစ်ဟှူ ငါပေါလုဟှာ လူမျိုးခြားဖြစ်ဟှူ နန်းနို့တွပ် ဘုရားသခင်ဟှို ဆုတောန်းဟှယ်။ 2ဘုရားသခင်ဟှာ သူ့ရဲ့ ကျေးဇူးတော်ကြောန့် နန်းနို့ကျိုးတွပ် အယ်မှုဟှို လောက်ဟှို့တွပ် ငါ့ဟှို အပ်ပေးဟှူကြောန်းဟှို နန်းနို့ဟှာ တကယ်ဘဲ့ ကြားသိရဂေ့ဟှယ်။ 3ဘုရားသခင်ဟှာ သူ့ရဲ့နတ်နဲဟှူ ကြံစည်လေဟှို ငါ့ဟှို ဖော်ပြဟှယ်။ အယ်ကြောန်းရာလေန ပတ်သတ်ဘီးဟှာ နန်းနို့ဟှို ငါဟှာ ကျဉ်းချောင်း ဖော်ပြပေးပီးဘီ။ 41နန်းနို့ဟှာ အယ် ဖော်ပြချစ်လေဟှို ဖတ်ဘီးဟှာ ခရစ်တော်ရဲ့ နတ်နဲဟှူဇာလေဟှို နားလည်ကြောန်းဟှို သိနိုင်ဂေ့ဟှယ်။ 5ဘုရားသခင်ဟှာ အယ် နတ်နဲဟှူဇာဟှို ရင်းရင်ဒူးဟှ လူလေဟှို ဖွမ့်ပြဟှားဘေမဲ့ ခုခါမာ ကိုယ်တော်ရဲ့ သန့်ရှင်းဟှူ သူလေဖြစ်ဂေ့ဟှူ တမန်တော်န ပရောဖက်လေဟှို ဝိညာဉ်တော်အားဖြင့် ဖွမ့်ပြလိုက်ဘီ။ 6အယ်မျိုး နတ်နဲဟှူဇာဟှာ ဒန်းကောန်းအားဖြင့် လူမျိုးခြားလေဟှာ ယုဒလူမျိုးနတူးဒူ ဘုရားသခင်ရဲ့ ကောန်းဂျီးမင်္ဂလာဟှို ခံစားခွမ့်ရဂေ့ဟှယ်။ သူးနို့ဟှာ ကိုယ်ခန္ဓာတော်ရဲ့ အင်္ဂါလေဖြစ်ဘီးဟှာ ခရစ်တော်ယေရှုအားဖြင့် ဘုရားသခင်ပေးဟှားဟှူ ဂဒိတော်မာ ပါဝမ်ခံစားခွမ့် ရဂေ့ဟှယ်။

7တဂိုးအားဖြင့် လောက်ဆောန်ဟှူကြောန့် နို့လေဟှို အပ်ပေးဟှားဟှူ ဘုရားသခင်ရဲ့ ကျေးဇူးတော်နဆိုင်ဟှူ ကောန်းဂျီး လတ်ဆောန်နတူးဒူ ငါဟှာ အယ်မျိုး ကောန်းမြတ်ဟှူ ဒန်းနဆိုင်ဟှူ မှုဆောန်ဖြစ်လာဟှယ်။ 8ငါဟှာ ဘုရားသခင်ရဲ့ သန့်ရှင်းဟှူလူလေ ဂူလောင်းထဲမာ ငယ်ဆောင်းထတ် ပိုဘီးငယ်ဟှူ ငါ့ဟှို အယ်ကျေးဇူးတော်ဟှို အပ်ပေးလိုက်ဟှူဇာဟှာ ခန့်မှန်းဟှို့ရနိုင်ဘဲဟှူ ခရစ်တော်ရဲ့ ကြွယ်ဝဟှူဇာဟှို လူမျိုးခြားလေဟှို ဒန်းကောန်းဟောဟှို့တွပ်န၊ 9ရှိမျှဂူလောင်းဟှို ဖန်ဆင်းဟှားဟှူ ဘုရားသခင်မာ ရှေးရှေးကာလဒူးဟှစဘီး ဝှပ်ဟှားခံရဟှူ လျှို့ဝှပ်နတ်နဲဟှူ ဇာနဆိုင်ဟှူ စီမံခွဲခန့်ဟှားဟှူဇာဟှာ ဖယ်မျိုးဇာဖြစ်နူးဆိုဟှာ လူလေဟှို သိသိသာသာဟှား ထန်ရှားဟှို့တွပ် ဖြစ်ဟှယ်။ 10အယ်မျိုးလောက်ဟှူဇာဟှာ ကောန်းဂန်ဘောင်ဟှို အောက်စိုးဟှူသူလေန အာဏာပိုင်လေဟှာ ဘုရားသခင်ရဲ့ ထူးခြားဟှူ ဉာဏ်ပညာလေဟှို ခုခီမာ သင်းတော်အားဖြင့် သိလာဂေ့ဟှို့တွပ် ဖြစ်ဟှယ်။ 11ဘုရားသခင်ဟှာ သူ့ရဲ့ ထာဝရကြံစည်တိုင်းဘဲ့ နို့လေရဲ့ သခင်ခရစ်တော် ယေရှုအားဖြင့် အယ်မျိုးဘဲ့ ပ္လဲ့ဇောင်စေဟှယ်။ 12နို့လေဟှာ ခရစ်တော်န တလောင်းတဝဒဲဖြစ်ဇာန အယ်သခင်ဟှို ယောင်ကြည်ကြောန့် ဘုရားသခင်နားဟှို ရဲရဲရင့်ရင့်ဟှား ယောင်ကြည်စိခ္လဘီးဟှာ တိုးဝမ်ဟှူခွမ့် ရဂေ့ဟှယ်။ 13အယ်ကြောန့် နန်းနို့တွပ် ငါခံရဟှူ ဆင်းရဲဒေါက်ခကြောန့် နန်းနို့ဟှာ စိပျစ်ဂေ့န။ နန်းနို့ဟှို ချီးမြှော့‑က်တွပ်ဘဲ့ ငါခံရဟှူဇာဘဲ့ ဖြစ်ဟှယ်။

ခရစ်တော်ရဲ့ မြစ်တာကြောန်း

14-15အယ်ကြောန်းကြောန့် ငါဟှာ ကောန်းဂန်ဘောင်န ကမ္ဘာမ္လေဂီးထတ်ဟှ အီထောန်စုဂူလောင်းရဲ့ နာမယ်ရင်းမြစ်ဖြစ်ဟှူ ဖဘုရားသခင်ရှေ့မာ ဒူးထော့‑က်ဘီး ဆုတောန်းဟှယ်။ 16ဘုရားသခင်ဟှာ ဖောင်းသရေတော်န ကြွယ်ဝဟှူဇာမျိုး သူ့ရဲ့ ဝိညာဉ်တော်အားဖြင့် နန်းနို့ထဲဟှ ဝိညာဉ်လူဟှို တဂိုးနတူးဒူ ကြံ့ခိုင်သန်မာစေဘီး၊ 17ယောင်ကြည်ရှင်းအားဖြင့် နန်းနို့လေရဲ့ စိနှလောင်းထဲမာ ခရစ်တော်ဟှာ ကိန်းဝပ်ဟှူကြောန်းန နန်းနို့ဟှာ မြစ်တာတော်မာ အုပြစ်ခ္လဟှားဘီး၊ 18အယ်မြစ်တာတော်ရဲ့ လျား၊ နံ၊ ဗြစ်၊ နတ်လေဟှာ ဖယ်မျှလော့‑က် ရှိဟှယ် ဆိုဇာဟှို သန့်ရှင်းဟှူသူလေ ဂူလောင်းနတူးဒူ သဘောပေါ့‑က်နိုင်ဟှူစွမ်း ရှိဟှူကြောန့်၊ 19သိပညာထတ်ထူးခြားဟှူ ခရစ်တော်ရဲ့ ရှစ်ရှင်းမြစ်တာတော်ဟှို သိဘီး၊ နားလည်လာဂေ့ဘီး ဘုရားသခင်ဟှာ ပ္လဲ့ဇောင်မျိုးဘဲ့ ပ္လဲ့ဇောင်ဟှို့တွပ် ဆုတောန်းဟှယ်။

20နို့လေထဲမာ လောက်ဆောန်နေဟှူ တဂိုးအားဖြင့် နို့လေ တောန်းလျှော့‑က်ကြံစည်ဟှူ ဇာလေထတ် ပိုဘီး ပေးနိုင်ဟှူ ဘုရားသခင်ဟှာ 21သင်းတော်အားဖြင့်ရော၊ ခရစ်တော် ယေရှုအားဖြင့်ရော ကမ္ဘာဆစ်ဆစ် ဖောင်းကီးတော်မူပါစေ! အာမင်။