တမန်တော် 13

1အန္တိအုတ်ဗြို့ဟှ သင်းတော်မာ ပရောဖက်လေန ဆရာလေရှိဟှယ်။ အယ်လူလေဟှာ ဗာနဗ၊ နိဂါ ဆိုဘီး ခေါ်ဟှူ ရှုမောင်၊ ကုရေနေနယ်သား လုကိ၊ စော်ဘွားဟေရုဒ်1ရဲ့ ငယ်ဂျင်းဖြစ်ဖူးဟှူ မာနင်န ရှောလုဟှားလေ ဖြစ်ဂေ့ဟှယ်။ 2အယ်လူလေဟှာ သခင်ဘုရားရဲ့ မှုတော်ဟှို လောက်ဆောန်ဘီး စာရှောန်နေဂေ့ဒူးမာ သန့်ရှင်းဟှူဝိညာဉ်တော်ဟှ သူးနို့ဟှို “ရှောလုန ဗာနဗလေဟှို ငါ့မှုဟှို ဆောန်ဟှို့တွပ် သီးသန့် ဝီးကော့‑က်ဟှားဂေ့” ဆိုဘီး ပြောဟှယ်။

3သူးနို့ဟှာ စာရှောန်ဆုတောန်းဘီးန ဗာနဗန ရှောလုလေရဲ့ ခေါန်းထတ်မာ သူးနို့လတ်ဟှို တန်ဂေ့ဟှယ်။ အယ်ဘီးန သူးနို့ဟှို မှုတော်ဆောန်ဟှို့တွပ် လွှတ်လိုက်ဂေ့ဟှယ်။

ကုပရုကျွန်းမာ မှုတော်ဆောန်ဟှူကြောန်း

4ဗာနဗန ရှောလုလေဟှာ သန့်ရှင်းဟှူဝိညာဉ်တော် လွှတ်လိုက်တိုင်းဘဲ့ သေလုကိဗြို့ဟှနေ ကုပရုကျွန်းဟှို သန်းဖောန သွားဂေ့ဟှယ်။ 5သူးနို့ဟှာ ရှာလမိဗြို့ဟှို ရော့‑က်ဟှူ ခီမာ ယုဒလူမျိုးလေရဲ့ ဝါလယ်ဇရပ်လေမာ ဘုရားသခင်ရဲ့ စကားတော်ဟှို ဟောပြောဂေ့ဟှယ်။ မာကု ဆိုဘီး ခေါ်ဟှူ ယောဟန်ဟှာ သူးနို့လေရဲ့ လတ်ထော့‑က်နေန ကူညီပေးဟှို့တွပ် ခေါ်ဟှားဂေ့ဟှယ်။

6သူးနို့ဟှာ အယ်ကျွန်းဟှို ဖြတ်ဟှားဘီးဟှာ ပါဖုဗြို့ထိ သွားဂေ့ဟှယ်။ အယ်ဗြို့မာ ယုဒလူမျိုး ပရောဖက်တုယောန်ဖြစ်ဟှူ နတ်ဝိဇ္ဇာတယော့‑က်ဟှို တွိဂေ့ဟှယ်။ သူ့နာမယ်ဟှ ဗာယေရှု ဖြစ်ဟှယ်။ 7သူဟှာ ဗြို့ဝန်မန်း သေရဂိပေါလုရဲ့ မိဆွေဖြစ်ဟှယ်။ အယ်ဗြို့ဝန်မန်းဟှာ ဒိပညာရှိဟှူ လူတယော့‑က်ဖြစ်ဟှယ်။ သူဟှာ ဘုရားသခင်ရဲ့ စကားတော်ဟှို ကြားရှင်ဟှူကြောန့် ဗာနဗန ရှောလုဟှို ဖိခေါ်လိုက်ဟှယ်။ 8အယ်ဘေမဲ့ ဟေလသဘာသာန ဧလုမနာမယ်ရှိဟှူ နတ်ဝိဇ္ဇာတယော့‑က်ဟှာ ဗြို့ဝန်မန်းဟှို ယောင်ကြည်ရှင်းဟှနေ လွဲစေဟှို့တွပ် ဗာနဗန ရှောလုလေဟှို တားလေဟှယ်။ 9အယ်ခီမာ ပေါလု ဆိုဘီး ခေါ်ဟှူ ရှောလုဟှာ သန့်ရှင်းဟှူဝိညာဉ်တော်န ပ္လဲ့ဝဘီး နတ်ဝိဇ္ဇာသမားဟှို စိုက်ကေ့ဘီးန၊ 10“နန်ဟှာ မာရ်နတ်ရဲ့သား! လှည့်ဇားလီညာသူ၊ မှန်တရားရဲ့ ရန်သူ၊ နန်ဟှာ ဘုရားသခင်ရဲ့ ဖြောန့်မတ်ဟှူလမ်းဟှို ဖျစ်ဆီးဘဲန နေနိုင်ဟှလော။ 11ခုဘဲ့ ဘုရားသခင်ရဲ့ လတ်တော်ဟှာ နန့်ထတ်မာ က္လလာဘီးဟှာ မျစ်စိကန်းလေ့မယ်။ နန်ဟှာ နေဟှို ကြာဂီးဗြင်ရဟှို့ မှုဟှ” ဆိုဘီး ပြောဟှယ်။

ရှစ်ရှင်းဘဲ့ ဧလုမဟှာ မျစ်စိကန်းဟှားဘီးဟှာ လောင်းဝ မှောန်မိုက် ဖြစ်ဟှားကြောန့် သူ့လတ်ဟှို ဆွဲဘီး လမ်းပြပေးဟှူလူဟှို စမ်းတဝါးဝါး ရှာနေရဟှယ်။ 12ဗြို့ဝန်မန်းဟှာ အယ်ဖြစ်ပျစ်ဇာဟှို ဗြင်ဟှူ ခီမာ ယောင်ကြည်လာဟှယ်။ သူဟှာ သခင်ဘုရားရဲ့ တရားတော်ဟှို ကြားရခီမာလည်း အံ့ဩနေဟှယ်။

ပိသိဒိပြည် အန္တိအုတ်ဗြို့မာ မှုတော်ဆောန်ဟှူကြောန်း

13ပေါလုန သူ့ပေါန်းဖော်လေဟှာ ပါဖုဗြို့ဟှနေ သန်းဖောနသွားဘီးန ပံဖုလိပြည် ပေရဂေဗြို့ဟှို ရော့‑က်ဟှားဂေ့ဟှယ်။ အယ်နေရာမာ မာကု ဆိုဘီး ခေါ်ဟှူ ယောဟန်ဟှာ သူးနို့န လမ်းခွဲဘီးဟှာ ယေရုရှလင်ဗြို့ဟှို ပ္လန်ဟှားဟှယ်။ 14သူးနို့ဟှာ ပေရဂေဗြို့ဟှ ထွပ်ဟှားဘီးဟှာ ပိသိဒိပြည် အန္တိအုတ်ဗြို့ဟှို ရော့‑က်ဟှားဘီး ဒန်းနေ့မာ ဝါလယ်ဇရပ်ဟှို ဝမ်ဘီး ထိုင်နေဂေ့ဟှယ်။ 15ပညတ်ကျမ်းန ပရောဖက်ကျမ်းလေဟှို ဖတ်ဟှူ ခီမာ ဝါလယ်ဇရပ် တာဝန်ခံလေဟှာ သူးနို့ဟှို “ညီကိုလေ၊ အယ်လူလေဟှို တိုက်တွန်းအားပေးဟှူစကား ပြောမယ် ဆိုဟှာ ပြောဂေ့ပါ” ဆိုဘီး ကြောန်းကြားဂေ့ဟှယ်။ 16ပေါလုဟှာ ထဘီးဟှာ လတ်နပြလိုက်ဘီးန

“ဣသရေလလူမျိုးလေန ဘုရားသခင်ဟှို ကိုးကွယ်ဟှူ လူမျိုးခြားလေ ငါ့စကားဟှို နားထောန်ဂေ့ပါ။ 17ဣသရေလလူမျိုးလေရဲ့ ဘုရားသခင်ဟှာ နို့လေရဲ့ ဘိုးဘေးလေဟှာ အဲဂုတ္တုပြည်မာ ဧည့်သည်ဖြစ်န နေဟှူ ခီမာ သူးနို့ဟှို ဝီးကော့‑က်ဘီးဟှာ လူမျိုးဂီး ဖြစ်စေဟှယ်။ အားကီးဟှူ တဂိုးတော်န အယ်ပြည်ဟှနေ ထုဆောန်ဟှားဟှူ ခီမာ 18တောကန္တာရမာ နှစ်လေးဆယ်လောင်းလောင်း သူဟှာ သီးခံဟှယ်။2 19အယ်ဘီးန ခါနာန်ပြည်မာနေဟှူ လူမျိုးခွန်နစ်မျိုးဟှို ဖျစ်ဆီးဘီးဟှာ အယ်ပြည်ဟှို သူ့လူမျိုးလေဟှို ပိုင်ပေးလိုက်ဟှယ်။ 20အယ်မူဇာလေဟှာ နှစ်ပေါန်းလေးရာငါးဆယ် နီးပါးကြာဟှားဟှယ်။”

“အယ်ဘီးန3 ပရောဖက်ရှမွေလခီထိ တရားသူဂီးလေဟှို ပေါ်လာစေဟှယ်။ 21သူးနို့ဟှာ မန်းဂီးတပါးဟှို တောန်းဂေ့ဟှူကြောန့် ဘုရားသခင်ဟှာ ကိရှရဲ့သား ဗင်္ယာမိန်မျိုးနွယ်ဖြစ်ဟှူ ရှောလုဟှို နှစ်လေးဆယ်လောင်းလောင်း အောက်ချောက်ဟှို့တွပ် သူးနို့ဟှို ပေးလိုက်ဟှယ်။ 22အယ်ဘီးန ဘုရားသခင်ဟှာ ရှောလုဟှို ဖယ်ဘီးဟှာ ဒါဝိဒ်ဟှို ဣသရေလရဲ့ မန်းဂီးဖြစ်န ချီးမြှော့‑က်လိုက်ဟှယ်။ ဘုရားသခင်ဟှ ‘ငါ လောက်ခိုင်းဟှားဇာလေဟှို လောက်ဟှို့တွပ် ငါ့ရဲ့ စိတော်နတွိဟှူ ယေရှဲရဲ့သား ဒါဝိဒ်ဟှို ငါတွိဟှားဘီ’ ဆိုဘီး ဒါဝိဒ်န ပတ်သတ်ဇာလေဟှို သတ်သေခံလိုက်ဟှယ်။ 23ဘုရားသခင်ဟှာ သူ့ရဲ့ ဂဒိတော်တိုင်း ဣသရေလလူမျိုးလေတွပ် ကယ်တန်ရှင်ယေရှုဟှို အယ်ဒါဝိဒ်ရဲ့ သားမ္လေးလေထဲမာ ပေါ်လာစေဟှယ်။ 244ယေရှုဟှာ မှုတော်မြတ်ဟှို လောက်ခန်မာ ယောဟန်ဟှာ ဣသရေလလူမျိုးလေဟှို နောန်ဒရဘီး ဗတ္တိဇံခံဂေ့ပါ ဆိုဘီး ဟောဟှယ်။ 255သူလောက်ရဟှူ မှုတော်မြတ် ပီးဆောင်းခါနီးမာ ယောဟန်ဟှာ ‘နန်းနို့ဟှ ငါ့ဟှို ဖယ်လူ ဆိုဘီး ထန်ဂေ့နူး။ ငါဟှာ နန်းနို့ စောန့်နေဟှူသခင် မှုဟှ။ အယ်သခင်ဟှာ ငါ့နော့‑က်မာ ပေါ်လာလေ့မယ်။ ငါဟှာ အယ်သခင်ရဲ့ ခေနပ်ကြိုးဟှို ဖြေဟှို့ဟှိုမှ ထိုက်ဟှ’ ဆိုဘီး ပြောဟှယ်။”

26“အာဗြဟံရဲ့ သားမ္လေးလေဖြစ်ဟှူ ငါ့ညီကိုလေန ဘုရားသခင်ဟှို ကိုးကွယ်ဟှူ လူမျိုးခြားလေ၊ ကယ်တန်ရှင်းဆိုင်ဟှူ အယ်မူတရားတော်ဟှို နို့လေနားဟှို ပေးပို့လိုက်ဟှယ်။ 27ယေရုရှလင်ဗြို့သားလေန သူးနို့ခေါန်းဆောန်လေဟှ အယ်သခင်ဟှာ ကယ်တန်ရှင် ဖြစ်ဟှယ် ဆိုဇာဟှို နားလည်ဂေ့ဟှ။ ဒန်းနေ့တိုင်း သူးနို့ဖတ်ဂေ့ဟှူ ပရောဖက်လေရဲ့ စကားလေဟှိုလည်း နားလည်ဂေ့ဟှ။ အယ်ဘေမဲ့ သူးနို့လေဟှာ ပရောဖက်လေရဲ့ စကားတိုင်း ပ္လဲ့ဇောင်ဟှို့တွပ် အယ်သခင်ဟှို ပြစ်ဒန်စီရင်ဂေ့ဟှယ်။ 286အယ်မျိုး သေဒန်စီရင်ဟှို့ ပြစ်တခုလည်း သူးနို့လေ တွိဘေမဲ့လည်း ကိုယ်တော့်ဟှို သေဒန်ပေးဟှို့တွပ် ပိလတ်မန်းဟှို တောန်းဆိုဂေ့ဟှယ်။ 297သူးနို့ဟှာ အယ်သခင်န ပတ်သတ်ဘီး ကျမ်းစာထဲမာ ပြောဟှားဇာလေဟှို လောက်ဂေ့ဘီးန အယ်သခင်ရဲ့ တဗဲ့တော်လေဟှာ လတ်ဝါးကပ်တိုင်ဟှနေ ခ္လဘီး သန်းခ္လိုင်းဂူမာ သင်္ဂြိုဟ်ဂေ့ဟှယ်။ 30အယ်ဘေမဲ့ ဘုရားသခင်ဟှာ အယ်သခင်ဟှို သေရာဟှနေ ထမြော့‑က်စေဟှယ်။ 318အယ်ဘီးန အယ်သခင်ဟှာ ရင်းရင်ဒူးဟှ သူ့နတူးဒူ ဂါလိလဲပြည်ဟှနေ ယေရုရှလင်ဗြို့ဟှို လိုက်ပါလာဂေ့ဟှူ လူလေဟှို ရစ်ပေါန်းကြာဂီး ကိုယ်ထန်ရှားပြဟှယ်။ သူးနို့ဟှ ခုခီမာ ဣသရေလလူမျိုးလေဟှို ကိုယ်တော်ကြောန်းဟှို သတ်သေခံနေဂေ့ဟှယ်။ 32နို့လေလည်း ဘိုးဘေးလေဟှို ပေးဟှားဟှူ၊ ဂဒိတော်နဆိုင်ဟှူ၊ ကောန်းမြတ်ဟှူ ဒန်းကောန်းဟှို နန်းနို့လေဟှို ဟောပြောဂေ့ဟှယ်။ 33ဘုရားသခင်ဟှာ ယေရှုဟှို ထမြော့‑က်စေဘီး ဘိုးဘေးလေရဲ့ သားမီးလေဖြစ်ဂေ့ဟှူ နို့လေတွပ် အယ်ဂဒိတော်လေဟှို ပ္လဲ့ဇောင်စေတော်မူဘီ။ ဆာလံကျမ်း ဒုတိယခန်းမာ၊”

“ ‘နန်ဟှာ ငါ့သားဖြစ်ဟှယ်။

အယ်နေ့ဘဲ့ နန့်ဟှို သားရာဟှို ငါပေးဘီ’ ဆိုဘီး ရေးဟှားတိုင်းဘဲ့ ဖြစ်ဟှယ်။”

34“သန်းခ္လိုင်းထဲမာ ပေါက်ပျစ်ဘဲန သေရာဟှနေ ထမြော့‑က်ဟှူကြောန်းဟှို ဘုရားသခင်ဟှ၊”

“‘ဒါဝိဒ်ဟှိုလည်း ကောန်းဂျီးပေးဟှို့တွပ် ဂဒိပြုဟှားတိုင်းဘဲ့

နန်းနို့ဟှိုလည်း သန့်ရှင်းမြင့်မြတ်ဘီး သေချာဟှူကောန်းဂျီးဟှို ပေးမယ်’ ဆိုဘီး ပြောဟှယ်။”

35“တခြားကျမ်းပိုဒ်မာ၊

‘ကိုယ်တော်ဟှာ သန့်ရှင်းဟှူ စေခံဟှို

သန်းခ္လိုင်းထဲမာ ပေါက်ပျစ်စေဟှို့ မှုဟှ’ ဆိုဘီး ပြောဟှားဟှယ်။”

36“ဒါဝိဒ်ဟှာ သူသတ်ရှင်နေဒူးဟှ ဘုရားသခင်ရဲ့ ကြံစည်ရှိဟှူတိုင်း လိုက်ရှော့‑က်ဘီးန သေဟှားဘီးဟှာ ဘိုးဘေးလေရဲ့ သန်းခ္လိုင်းထဲမာ သင်္ဂြိုဟ်ခံရဟှယ်။ သူ့ရဲ့ခန္ဓာဟှာ သန်းခ္လိုင်းထဲမာ ပေါက်ပျစ်ဟှားဟှယ်။ 37အယ်ဘေမဲ့ ဘုရားသခင် ထမြော့‑က်စေလိုက်ဟှူ သခင်ရဲ့ခန္ဓာဟှာ ပေါက်ပျစ်ဟှ။ 38အယ်ကြောန့် ညီကိုလေ၊ အယ်သခင်အားဖြင့် ပြစ်လေ ခွမ့်လွှတ်ရှင်းကြောန်းဟှို နန်းနို့လေဟှို ဟောပြောနေဇာဟှိုရော၊ ယောင်ကြည်ဟှူ လူတိုင်းဟှာ ကိုယ်တော်အားဖြင့် မောရှေရဲ့ ပညတ်တရားအားဖြင့် ဖြောန့်မတ်ဟှယ် ဆိုဘီး သိမှတ်ပြုရှင်း ခံရနိုင်ဘဲဟှူရာလေ ဂူလောင်းဟှနေ လွတ်ဘီး၊ 39အယ်သခင်အားဖြင့် ဖြောန့်မတ်ဟှယ် ဆိုဘီး သိမှတ်ပြုရှင်း ခံရဇာဟှိုရော နန်းနို့ သိမှတ်ဂေ့။ 40ပရောဖက်ကျမ်းလေမာ ငါ မိန့်တော်မူဟှားဇာဟှို ထီမဲ့မြင်ဟှူသူလေ9 နားထောန်ဂေ့။”

41“ ‘ ထီလေးဇားမားလေ၊ ကေ့ရှုဂေ့! အံ့ဩဟှားဘီး သေပါလေစေ!

အယ်နေ့ ငါလောက်နေဟှူဇာလေဟှို ယော့‑က်ယော့‑က်ဟှ ရှင်းပြဘေမဲ့လည်း

နန်းနို့ဟှာ ယောင်ကြည်ဟှို့ မှုဟှ’

ဆိုဘီး ဖော်ပြဟှားဟှယ်။ အယ်မျိုး ဖော်ပြဟှားတိုင်း ဖြစ်ဟှို့တွပ် ဒိထားဂေ့ပါ၊”

ဆိုဘီး ဟောလေဟှယ်။

42ဝါလယ်ဇရပ်ဟှနေ ပေါလုန ဗာနဗလေဟှာ ထွပ်လာဟှူ ခီမာ လူလေဟှ သူးနို့ဟှို နော့‑က်ပတ်ဒန်းနေ့မာ အယ်ကြောန်းလေဟှို နော့‑က်တခါ ဟောပြောဟှို့တွပ် တောန်းဗန်ဂေ့ဟှယ်။ 43ဝါလယ်ဇရပ်မာ လူစုကွဲဟှားဟှူ ခီမာ ယုဒလူမျိုးလေန ဘုရားသခင်ဟှို ကိုးကွယ်ဘီး ယုဒဘာသာဝမ်ဖြစ်လာဟှူ လူလေဟှာ ပေါလုန ဗာနဗလေရဲ့ နော့‑က်ဟှိုလိုက်ဟှားဂေ့ဟှယ်။ တမန်တော်လေဟှ အယ်လူလေဟှို ဘုရားသခင်ရဲ့ ကျေးဇူးတော်န ဆစ်ဘီးဟှာ သတ်ရှင်ဟှို့တွပ် စည်းရောင်းဂေ့ဟှယ်။

44နော့‑က်ပတ်ဒန်းနေ့မာ သခင်ဘုရားရဲ့ စကားတော်ဟှို ကြားရဟှို့တွပ် တဗြို့လောင်းနီးပါး ရော့‑က်လာဂေ့ဟှယ်။ 45ယုဒလူမျိုးလေဟှာ လူအောက်ဂီးဟှို ဗြင်ဟှူ ခီမာ နာလိုဘဲကြောန့် ပေါလုဟောပြောဟှူ စကားလေဟှို ကဲ့ရဲ့ဘီးဟှာ ပြောဂေ့ဟှယ်။ 46အယ်ဘေမဲ့ ပေါလုန ဗာနဗလေဟှ “နို့လေဟှ ဘုရားသခင်ရဲ့ စကားတော်ဟှို နန်းနို့ဟှို ပထမဆောင်း ဟောရဟှယ်။ အယ်ဘေမဲ့ နန်းနို့ဟှာ အယ်မူတရားတော်ဟှို ပယ်ဘီးဟှာ ကိုယ့်ကိုယ်ကိုယ် ထာဝရသတ်န ထိုက်တန်ဟှ ဆိုဘီး စီရင်ဂေ့ဟှူကြောန့် နို့လေဟှာ နန်းနို့နားဟှနေ ထွပ်ဟှားဘီးဟှာ လူမျိုးခြားလေနားဟှို သွားမယ်။ 47ဘုရားသခင်ဟှ”

“‘ကယ်တန်ရှင်းကျေးဇူးဟှို တကမ္ဘာလောင်းဟှို ရော့‑က်စေဟှို့တွပ်န နန်းနို့လေဟှို

လူမျိုးခြားလေတွပ် လန်းရောန်ဖြစ်စေဟှို့ ငါခန့်ဟှားဟှယ်၊’

ဆိုဘီး နို့လေဟှို မိန့်မှာဟှားဟှယ်” ဆိုဘီး ပိုဘီး ရဲရဲရင့်ရင့်ဟှား ဟောပြောလေဟှယ်။

48လူမျိုးခြားလေဟှာ အယ်မျိုး ကြားရဟှူ ခီမာ ဝန်းသာဘီးဟှာ သခင်ဘုရားရဲ့ စကားတော်ဟှို ချီးမွမ်းဂေ့ဟှယ်။ ထာဝရသတ်တွပ် ဝီးကော့‑က်ခံရဟှူ လူလေဟှာ ယောင်ကြည်သူလေ ဖြစ်လာဂေ့ဟှယ်။

49သခင်ဘုရားရဲ့ တရားတော်ဟှာ တနယ်လောင်းဟှို ပ္လံ့နှံ့ဟှားလေဟှယ်။ 50အယ်ဘေမဲ့ ယုဒလူမျိုးလေဟှာ ဘုရားသခင်ဟှို ကိုးကွယ်ဟှူ ထတ်တန်းလွှာမီးမလေန ဗြို့ရဲ့ မျစ်နှာဖောင်းလေဟှို တိုက်တွန်းဘီးဟှာ ပေါလုန ဗာနဗလေဟှို ညှဉ်းဆဲဟှို့တွပ် စဘီးနှိုးဆော်လေဟှယ်။ သူးနို့ဟှာ အယ်လူနှေ့ယော့‑က်ဟှို သူးနို့ နယ်ဟှနေ နှန်ထုလိုက်ဂေ့ဟှယ်။ 5110 အယ်ခီမာ ပေါလုန ဗာနဗလေဟှာ သူးနို့ဟှို ဒိပေးဟှို့တွပ် ခေဖွားဟှ မ္လေမုဟှို ခါခ္လဘီးဟှာ ဣကောနိဗြို့ဟှို ထွပ်ဟှားဂေ့ဟှယ်။ 52အန္တိအုတ်ဗြို့ဟှ တဗဲ့တော်လေဟှာ ဝန်းသာဘီးဟှာ သန့်ရှင်းဟှူဝိညာဉ်တော်န ပ္လဲ့ဝနေဂေ့ဟှယ်။