ဓမ္မသစ်ကျမ်း ထားဝယ်ဘာသာစကား
၁ တိမောသေ 3
သင်းထော့‑က်လေကြောန်း
သင်းအောက်ရာဟှို မျှော်လင့်ဟှူသူဟှာ ကောန်းဟှူမှုရာဟှို လိုလားတောန်းတဟှူသူ ဖြစ်ဟှယ် ဆိုဟှူစကားဟှာ မှန်ဟှူသစ်စာစကား ဖြစ်ဟှယ်။ 1အယ်ကြောန့် သင်းအောက်ဟှာ ပြစ်တန်ခွမ့်န လွတ်ကင်းရမယ်။ သူဟှာ မယားတယော့‑က်ဘဲ့ ရှိရမယ်။2 သမ္မာဒိရှိသူ၊ ဣန္ဒြေစောန့်သူ၊ လျောက်ပတ်အောန် နေထိုင်ကျင့်ကြံသူ၊ ဧည့်ဝတ်ကျေသူ၊ ဆောင်းမဩဝါဒပေးနိုင်သူ ဖြစ်ရမယ်။ သော့‑က်တတ်စားတတ်ဟှူသူ၊ သူများဟှို ကိုယ်ထိလတ်ရော့‑က် စော်ကားဟှူသူ၊ စင်ကြယ်ဘဲဟှူ စီးပွားဟှို တတ်မတ်ဟှူသူမှုဘဲ၊ နူးညံ့သိမ်မွေ့ဘီး ရန်လိုဘဲန ကပ်ဟှို တတ်မတ်ရှင်း မှေ့ဘဲဟှူသူ၊ ကိုယ့်ရဲ့အီထောန် မိသားစုဟှို ကောန်းကောန်းမွန်မွန် အောက်ချောက်ဘီး သမ္မာဒိရှိရှိန ကိုယ့်သားမီးလေဟှို ဆောင်းမနိုင်ဟှူသူ ဖြစ်ရမယ်။ ကိုယ့်ရဲ့ အီထောန်ဟှို ကောန်းကောန်းမွန်မွန် အောက်ချောက်နိုင်ဘဲသူဟှာ ဘုရားသခင်ရဲ့ သင်းတော်ဟှို ဖယ်မျိုး ပြုစုဘီး အောက်ချောက်နိုင်မယ်နူး။ သူဟှာ ယောင်ကြည်ခါစ လူသစ်ဖြစ်ရဟှ။ အယ်မျိုးမှုဘဲနေဟှာ ကိုယ့်ကိုယ်ကိုယ် ဘဝင်မြင့်ဘီး မာရ်နတ်နတူးဒူ ပြစ်ဒန်စီရင်မှုထဲဟှို က္လခံရဟှို့တွပ် စိုးရိမ်ဇာရှိဟှယ်။ ကဲ့ရဲ့ပြစ်တန်ခံရဘီး မာရ်နတ်ရဲ့ ထောန်ချော့‑က်ထဲဟှို က္လရော့‑က်ဘဲနေဟှို့တွပ် သင်းတော်ပ္လန်ရဲ့ သိုင်းဝိုင်းမာလည်း အသရေရှိဟှူ သူဖြစ်န သိမှတ်ပြုခံရဟှူ သူဖြစ်ရမယ်။
သင်းထော့‑က်လူဂီးလေကြောန်း
အယ်မျိုးဘဲ့ သင်းထော့‑က်လေလည်း တည်းတည်ကြည်းကြည်န နေဟှူသူဖြစ်ရမယ်။ လျှာနှေ့ခွရှိဟှူသူ၊ သော့‑က်စား မောယစ်တတ်ဟှူသူ၊ ကပ်မတ်မားလေမှုဘဲန ကိုယ့်ကိုယ်ကိုယ် သိဟှူစိ ကြည်လင်ဘီးဟှာ ယောင်ကြည်ရှင်းရဲ့ လျှို့ဝှပ်နတ်နဲဟှူ ရာလေဟှို စိစွဲလမ်းဟှူသူ ဖြစ်ရမယ်။ သူးနို့လေဟှာ ရင်ဦးဆောင်း စစ်ဆေးခံဘီးမှ ပြစ်တန်ခွမ့်နလွတ်ဟှာ သင်းထော့‑က်မှုဟှို လောက်ဆောန်ပါစေ။ သူးနို့လေရဲ့ မယားလေဟှာ3 တည်းတည်ကြည်းကြည် နေဟှူသူ ဖြစ်ရမယ်။ ဂူးတိုက်ဟှူသူ၊ သူများချင်းပြောဟှူသူ ဖြစ်ဘဲန ရှိမျှဂူလောင်းမာ သစ်စာရှိဟှူသူ ဖြစ်ရမယ်။ သင်းထော့‑က်လူဂီးလေဟှာ မယား တယော့‑က်ဘဲ့ ရှိရမယ်။4 ကိုယ့်သားမီးလေန အီထောန်ဟှို ကောန်းကောန်း စီမံအောက်ချောက်နိုင်ဟှူသူ ဖြစ်ရမယ်။ ဖြားဖြစ်ကြောန့်နူးဆိုဟှာ သင်းထော့‑က်လောက်ဟှို ကောန်းကောန်း လောက်ဆောန်ဟှူသူဟှာ ကိုယ့်တွပ် ကောန်းဟှူ ဂေါင်သရေဟှို ရဘီးဟှာ ယေရှုခရစ်တော်ဟှို ယောင်ကြည်ဟှူ ရာမာလည်း ရဲရင့်ရှင်းဟှို ရလေဟှယ်။
နတ်နဲဟှူဇာလေကြောန်း
ငါ အယ်စာဟှို ရေးရဟှူဇာဟှ နန့်နားဟှို ဗြန်းဗြန်လာဟှို့တွပ် မျှော်လင့်ဟှူလည်းဘဲ့ နော့‑က်က္လနေမယ် ဆိုဟှာ နန်ဟှာ ဘုရားသခင်ရဲ့ အီတော်မာ ဖယ်မျိုး ကျင့်ကြံ လောက်ဆောန်ရမယ် ဆိုဇာဟှို သိရဟှို့တွပ် အယ်စာဟှို ငါရေးဘီး ပေးလိုက်ဟှူဇာဖြစ်ဟှယ်။ အယ်အီတော်ဟှ သတ်ရှင်တော်မူဟှူ ဘုရားသခင်ရဲ့ သင်းတော်ဖြစ်ပါဟှယ်။ အယ်သင်းတော်ဟှ သမ္မာတရားရဲ့ မှီတကဲဖြစ်ဟှူမျိုး သမ္မာတရားရဲ့ မဏ္ဍိုင်လည်း ဖြစ်ပါဟှယ်။ မှန်ဟှူကိုးကွယ်မှုရဲ့ နတ်နဲဟှူရာဟှာ ရရာတိုင်း ကီးမြတ်ဟှယ် ဆိုဇာဟှို ဂြင်းခူလောက်ဇာကြောန်း မှေ့ဟှ။
ကိုယ်တော်ဟှာ လူကိုယ်ခန္ဓာအားဖြင့် ထန်ရှားတော်မူဘီ။
မှန်ကန်ဟှယ် ဆိုဇာဟှို ဝိညာဉ်တော်အားဖြင့် ထန်ရှားစေတော်မူဘီ။5
ကောန်းဂန်တမန်လေဟှာ ကိုယ်တော့်ဟှို ရှုဗြင်ရဂေ့ဘီ။
လူမျိုးခြားလေဟှာ ဒန်းကောန်းကြေညာဇာဟှို ကြားဂေ့ရဘီ။
လောကသားလေဟှာ ကိုယ်တော့်ဟှို ယောင်ကြည်ဂေ့ဘီ။
ကိုယ်တော်ဟှာ ဖောင်းသရေတော်နတူးဒူ ကောန်းဂန်ဘောင်ဟှို ဆောန်ယူဟှူဇာဟှို ခံတော်မူဘီ။
Source notes (5)
- Cross-reference တိ ၁.၆–၉
- Footnote မယားတယော့‑က်ဘဲ့ ရှိရမယ်၊ အယ်မျိုးမှုဘဲနေဟှာ တခါဘဲ့ လတ်ထပ်ရမယ်။
- Footnote သူးနို့လေရဲ့ မယားလေဟှာ၊ အယ်မျိုးမှုဘဲနေဟှာ ကူညီမဇဟှူ မီးမလေ။
- Footnote မယား တယော့‑က်ဘဲ့ ရှိရမယ်၊ အယ်မျိုးမှုဘဲနေဟှာ တခါဘဲ့ လတ်ထပ်ဟှားဟှယ်။
- Footnote မှန်ကန်ဟှယ် ဆိုဇာဟှို ဝိညာဉ်တော်အားဖြင့် ထန်ရှားစေတော်မူဘီ၊ အယ်မျိုးမှုဘဲနေဟှာ ဝိညာဉ်ပေါင်ဇံထဲမာ မှန်ကန်ဟှယ် ဆိုဇာဟှို ထန်ရှားစေတော်မူဟှယ်။
ဓမ္မသစ်ကျမ်း ထားဝယ်ဘာသာစကား. Copyright © 2024 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.