Eastern Tamang Language Bible
सप 2
ह्राङ ह्राङला पाप ख्लासी परमेश्वरपट्टि दोःगो
पेःबा आखबा य्हुल्ला म्हिगदे, एनीगदे ग्ला गिकरी ह्रुप तउ। परमप्रभुसे तोगब लबा धुइ खबा भन्दा ङाच्छान, एनीगदेदा लाबासे पोलवादा भोर्बा ह्रङ् लसी भोर्बा भन्दा ङाच्छान, परमप्रभुसे ह्राङला बोमो एनीगदेथोरी ल्हुबा भन्दा ङाच्छान, ओच्छे परमप्रभुसे बोमोला झोकरी एनीगदेदा सजाय पिन्बा भन्दा ङाच्छान एनीगदे ग्ला गिकरी ह्रुप तउ। परमप्रभुसे कुल्बा अन्छार भ्रबा चु य्हुल्साला सोझो म्हिगदे, एनीगदेसे परमप्रभुदा म्हाइगो, परमप्रभुदा सेम निबा गे लबारी म्हाइगो, ओच्छे एनीगदे सोझो म्हि दोःबारी म्हाइगो। जमाहेन्से परमप्रभुसे पिन्बा सजायग्याम एनीगदे जोगब तखम्ला।
इस्राएलला खिम्जेम य्हुल्सागदे नाश तला
गाजा सहर चा खालै म्हि आचिबा तोङ्तोङ्बा ग्ला दोला। ओच्छे अश्कलोन सहरएनोन तोङ्तोङ्बा ग्ला दोला। अश्दोद सहरला म्हिगदेदा धिनी गुङ्धोनारी ताप्सी जिन्ना। ओच्छे एक्रोन सहरला म्हिगदेदाएनोन थेनीगदेला सहरग्याम तेःला।1 समुद्रला कुनीरी चिबा पलिश्तीगदे, एनीगदे नाश तनोन तला। परमप्रभुसे एनीगदेदा पिन्तोःबा सजाय तोगब लसी जिन्बा मुला। परमप्रभुसे एनीगदेला य्हुल्सादा पूरन नाश लला, ओच्छे एनीगदे खालैदान आख्ला। समुद्रला कुनीरी चिबा पलिश्तीगदे, एनीगदेला य्हुल्सा चा गोठालोगदे चिबा ग्लादेन ग्युगदे छबा ग्ला दोला। एनीगदेला य्हुल्सा चा यहूदारी बाँकी मुबा म्हिगदेसे ह्राङला यारी किन्ना। ओच्छे थेनीगदेसे थेरीन ह्राङला ग्युगदे छला। म्हुनाङ् चा थेनीगदे अश्कलोन सहररी मुबा दिमगदेरी निसी म्हेर्ला। थेरी परमप्रभु थेनीगदेला परमेश्वर थेनीगदेदेन छ्यामनोन तला। ओच्छे परमप्रभुसे थेनीगदेदा दोःसी फलिफाप तना लला।
जम्मान भन्दा घ्रेन परमप्रभु परमेश्वरसे चुह्रङ् भिसी सुङ्बा मुला, “मोआबीदेन अम्मोनीगदेसे ङाला म्हिगदेदा खिसी लबान बेइज्जत लबा ङाइ म्राङ्बा मुला। ओच्छे ङाला म्हिगदेला य्हुल्सा ह्राङला यारी किन्ना भिसी थेनीगदेसे धाक उन्बान लबा ङाइ थेःबा मुला।2 च्यागो, ङा छोन्बो परमप्रभु हिन्ना। मोआबदेन अम्मोन य्हुल्सा चा सदोमदेन गमोरा सहर ह्रङ्नोन लसी नाश तला। मोआबदेन अम्मोन य्हुल्सा चा म्रानोन म्रासे प्लिङ्ला, ओच्छे चजान चजा मुबा ग्ला दोला। थे य्हुल्साला भु व्हारारी चा खाइमै तिगै अन्न बाली आत। बाँकी मुबा ङाला म्हिगदेसे थेनीगदेला य्हुल्सा ह्राङला यारी किन्सी थेनीगदेला जम्मान धन सम्पत्तिएनोन ब्यन्ना।”3
मोआबदेन अम्मोन य्हुल्साला म्हिगदेसे घमण्ड लबान जम्मान भन्दा घ्रेन परमप्रभुला म्हिगदेदा खिसी लसी बेइज्जत लबासेलमा थेनीगेदसे याङ्बा सजाय चा थेनोन हिन्ना। परमप्रभुसे थेनीगदेदा ल्हानान लोङ्ना लला। ओच्छे परमप्रभुसे जम्बुलिङ नाङ्लान ला लुगदेदा तिगै गेआखेल्बा स्हे दोना लला। जमाहेन्से य्हुल य्हुल्ला जम्मान म्हिगदेसे ह्राङ ह्राङलान य्हुल्सारी चिसी परमप्रभुला जयजयकार लला।
कूश य्हुल्साला म्हिगदे, एनीगदेदाएनोन परमप्रभुला तरवारसे साइला।4
परमप्रभुसे ह्राङला छ्यासे झ्याङ्पट्टिला अश्शूर य्हुल्सादाएनोन नाश लला। ओच्छे परमप्रभुसे निनवे सहरदाएनोन नाश लसी सोङ्सोङ् खर्बा तोङ्तोङ्बा ग्ला स्होला।5 थे ग्ला चा ग्युगदेदेन म्हेमुइला बथानगदे ओच्छे थरीथरीला जन्तुगदे चिबा ग्ला दोला। फुप्सी छ्याकछिक निबा थे ग्लाला दिमगदेरी कुलुलुगदे बास चिला, ओच्छे झ्याल झ्यालरी चिसी ङ्याला। ओच्छे म्राप म्रापरी गिट्टीदेन युङ्बान युङ्बा तला, ओच्छे दिम दिमरी कार्बा स्युक्बाला दलिनगदे जे म्राङ्ला। थे सहरला म्हिगदेसे घमण्ड लबान ह्राङसे ह्राङदान जोगब तसी चिबा, “ङनी ह्रङ्बा शक्तिशाली अर्गु खालैनोन आरे” भिसी म्हन्मुबा। तर थेनीगदेला सहर चा नाश तसी तोङ्तोङ्बा ग्ला दोबा मुला। थेनीगदेला सहर चा ह्रि जन्तुगदे चिबा ग्ला दोबा मुला। थेनीगदेला सहरला ङाम्ग्याम निबा म्हिगदेसे थेनीगदेदा या ल्हिप्सी खुच्चिङ् राप्बान खिसी लला।
Source notes (5)
- Cross-reference यशै १४:२९-३१; यर्मि ४७:१-७; इज २५:१५-१७; योए ३:४-८; आमो १:६-८; जक ९:५-७
- Cross-reference यशै १५:१-१६:१४; २५:१०-१२; यर्मि ४८:१-४९:६; इज २१:२८-३२; २५:१-११; आमो १:१३-१५
- Cross-reference ठुङ् १९:२४
- Cross-reference यशै १८:१-७
- Cross-reference यशै १०:५-३४; १४:२४-२७; नहे १:१-३:१९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.