Eastern Tamang Language Bible
जक 5
म्हङ्री रिल्सी थान्बा किताब फ्याङ्बान लबा म्राङ्बा
ङाइ म्हङ्री च्यासी चिबा मुबा। थेनोन धुइरी रिल्सी थान्बा ढिला किताब गिक ङाइ ङाला ङाच्छापट्टि फ्याङ्बान लबा म्राङ्जी। स्वर्गदूतसे ङादा “एसे तिग म्राङ्बा मुला?” भिसी ङ्योइजी।
ङाइ थेदा चुह्रङ् भिसी जोहाब पिन्जी, “ङाइ बोगल गिक क्रू लम्बाइदेन क्रू च्युइ चौडाइला रिल्सी थान्बा ढिला किताब गिक फ्याङ्बान लबा म्राङ्बा मुला।”
ओच्छे स्वर्गदूतसे ङादा चुह्रङ् भिसी पाङ्जी, “थे रिल्सी थान्बा ढिला किताबरी जम्मान य्हुल्साथोरी खबारी छ्याइबा सरापला बारेरी भ्रिबा मुला। थे किताबला पट्टी गिकरी जम्मान य्होगदेदा य्हुल्साग्यामनोन ताप्ला भिसी भ्रिबा मुला, ओच्छे अर्गुपट्टि चा घ्रान चबान फट्टा ताम पाङ्बागदेदाएनोन य्हुल्साग्यामनोन ताप्ला भिसी भ्रिबा मुला। जम्मान भन्दा घ्रेन परमप्रभुसे चुह्रङ् भिसी सुङ्बा मुला, ‘ङाइ पुइखबा चु सराप चा य्होला दिमदेन ङाला मिन किन्सी घ्रान चबान फट्टा ताम पाङ्बागदे जम्मालान दिमरी वाङ्ला। ङाइ पुइखबा चु सरापसे थे दिमगदेदा नाश लला।’”
छाङ्री चिबा म्रिङ्म्हेमे गिकदा म्राङ्बा
ङादेन छ्याम ताम लबा थे स्वर्गदूत दोःसी ङाला ङाम्रीन खसी ङादा चुह्रङ् भिसी पाङ्जी, “च्यागो, थेग्याम दोःसी तिगै स्हे थोन्सी खबान मुला।”
जमाहेन्से ङाइ स्वर्गदूतदा “थे तिग हिन्ना?” भिसी ङ्योइजी।
थेसे ङादा “थे चा सिङला फुम्बा गिक हिन्ना, थे फुम्बासे चा जम्मान य्हुल्साला म्हिगदेसे लबा पापदा उन्मुला” भिसी पाङ्जी। थे फुम्बाला घब चा ल्हीबा मुबा। ङाइ च्याना च्यानान थे घब ठ्वाङ्जी, थे फुम्बा न्हङ्री चा म्रिङ्म्हेमे गिक मुबा। ओच्छे थे स्वर्गदूतसे “चु म्रिङ्म्हेमे चा नाइबा गेला चिनु हिन्ना” भिसी पाङ्जी। जमाहेन्से थे स्वर्गदूतसे थे म्रिङ्म्हेमेदा फुम्बा न्हङ्री आङ्सी फुम्बाला सुङ्री घब लजी।
जमाहेन्से ओस्सो च्यामा म्रिङ्म्हेमे न्ही फ्याङ्बान ङा मुबा ग्लारी खबान लबा ङाइ म्राङ्जी। थेनीगदेला भ्याप चा सारसला भ्याप ह्रङ्बान मुबा। थेनीगदेसे थे फुम्बादा थीसी मुरी भोर्जी।
जमाहेन्से ङाइ ङादेन छ्याम ताम लबान लबा स्वर्गदूतदा “चुगदेसे चु फुम्बा खानङ् भोर्बान मुला?” भिसी ङ्योइजी।
थे स्वर्गदूतसे ङादा चुह्रङ् भिसी पाङ्जी, “बेबिलोन य्हुल्सारी भोर्बान मुला। थेनीगदेसे थेला लागिरी थेरी दिम गिक स्होला। थे दिम स्होसी जिन्माहेन्से थे फुम्बादा तेन्बाला लागिरी थेनीगदेसे थेरीन थान्ना।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.