Eastern Tamang Language Bible
जक 11
नाङ्बाझ्याक्बा लबागदे नाश तबा
लेबनान, एला म्रापगदे ठोङ्गो, तिग्दा भिसम एला स्युक्पाला दोङगदे मेसे नाश लगै। थाङ्सिङला दोङ, क्राबा क्रिङ्बा लउ, तिग्दा भिसम स्युक्पाला दोङ घुर्बा मुला, ओच्छे नोबादेन जेःबा दोङगदे नाश तबा मुला। बाशानना सुल्सिङला दोङगदे, क्राबा क्रिङ्बा लउ, तिग्दा भिसम घ्रेन ह्रि फ्यासी जिन्बा मुला। दुखसेलमा गोठालोगदेसे क्राबा क्रिङ्बा लबा मुला, थेनीगदेला ग्युगदे छबा ज्यबा ग्लागदे नाश तबा मुला। सिंहगदे ङार्बा मुला। तिग्दा भिसम यर्दन स्योङ् कुनीला घ्रेन ह्रि नाश तबा मुला।
गोठालो न्ही
परमप्रभु ङाला परमेश्वरसे चुह्रङ् भिसी सुङ्बा मुला, “साइबाला लागिरी ठीक लबा ग्युगदेदा छउ। थे ग्युदा ग्लुसी भोर्बा म्हिगदेसे थे ग्युदा साइमुला, तसैनोन थेनीगदेसे सजाय आयाङ्मुला। थे ग्युला स्या चूङ्बा म्हिगदेसे चुह्रङ् भिसी पाङ्मुला, ‘परमप्रभुला जयजयकार तगै। तिग्दा भिसम य्हाङ फ्युक्पो दोबा मुला।’ थेनीगदेदा सयार लबा ह्राङलान गोठालोगदेसेनोन थेनीगदेदा दया आलमुला।” परमप्रभुसे चुह्रङ् भिसी सुङ्बा मुला, “चु य्हुल्साला म्हिगदे खालैदान ङाइ दया आल। ङाइ जम्मान म्हिगदेदा थेनीगदेलान खिम्जेमगदेदेन ग्लेला यारी जिम्मा पिन्ना। थेनोन ग्लेगदेसे य्हुल्सादा नाश लला। थे धुइरी ङाइ चु य्हुल्सादा थेनीगदेला याग्याम जोगब आल।”
ग्यु व्यापारीगदेसे ङादा गोठालो स्होजी। जमाहेन्से ङा साइबारी भोर्बा थे ग्युगदेला गोठालो दोजी। ङाइ ङाला यारी गोर न्ही कडी थोजी। जमाहेन्से ङाइ कडी गिकला मिन “दयामाया” थान्जी, ओच्छे अर्गु कडीला मिन चा “गिक तबा” थान्जी। ओच्छे ङाइ ग्युगदेला बथानदा छजी। ङाइ ल गिक न्हङ्रीन गोर सोम गोठालोदा तेःजी। तिग्दा भिसम थेनीगदे म्राङ्मा ङादा दिक्क तबा मुबा, ओच्छे थेनीगदेसेनोन ङादा हेला लजी। ङाइ थे ग्यु व्यापारीगदेदा चुह्रङ् भिसी पाङ्जी, “दाहेन्से ङा एनीगदेला गोठालो आदो। सिबारी म्हाइबागदे सिगै, नाश तबारी म्हाइबागदे नाश तगै, ओच्छे सोबागदेसे चा गिकसेम गिकला स्या चगै।” जमाहेन्से ङाइ “दयामाया” मिनना कडीदा क्युइसी परमप्रभुसे जम्मान य्हुल य्हुल्ला म्हिगदेदेन छ्याम लबा कबुल भ्याङ्जी। थे धिनकुनु थेह्रङ् लसी कबुल भ्याङ्मा ग्यु व्यापारीगदेसे ङादा च्यासी चिबा मुबा। ङाइ लबा गे म्राङ्सी चु मि परमप्रभुला बचन चिम भिसी थेनीगदेसे था याङ्जी। जमाहेन्से ङाइ थेनीगदेदा चुह्रङ् भिसी पाङ्जी, “एनीगदेदा ज्यबा छोर्सम ङादा ङाला ज्याला भउ, आहिन भिसम पिन्आतोः।” थेतबासेलमा ङादा थेनीगदेसे बोगल गिकसे च्युइ म्हुइला टोगोल पिन्जी।
परमप्रभुसे ङादा चुह्रङ् भिसी सुङ्जी, “एदा पिन्बा थे ज्याला कुमालेला लागिरी भ्याङ्सी पिन्गो।” जमाहेन्से ङाइ थे बोगल गिकसे च्युइ म्हुइला टोगोल भोर्सी परमप्रभुला मन्दिरला ढुकुटीरी कुमालेला लागिरी भ्याङ्सी पिन्जी। जमाहेन्से ङाइ “गिक तबा” मिनना कडी क्युइसी यहूदादेन इस्राएलला गुङ्री मुबा ज्योज्यो आलेला नाता टाङ्ना लजी।
जमाहेन्से ङादा परमप्रभुसे चुह्रङ् भिसी सुङ्जी, “दोःसी तिरेम एसे मूर्ख गोठालोसे लबा ह्रङ्बा गे लउ। ङाइ चु ग्युगदेला लागिरी गोठालो गिक पुइखला। थे गोठालोसे नाश तबारी छ्याइबा ग्युगदेला सयार आल, थेसे म्हबागदेदाएनोन आम्हाइ, चोट तबागदेदाएनोन मन आल, ओच्छे ज्यबा ज्यबा ग्युगदेदाएनोन छे मुबा ग्लारी भोर्सी आछ। बरू थेसे मि छोबा छोबा ग्युला खुर ढेसी स्या चला। बथानदा ख्लासी निबासेलमा थे गेआखेल्बा गोठालो नाश तला! थेला मुदेबान भङ् लडाइ लना लनान नाश तला। थेला पाखुरा पूरन खार्सी निला, ओच्छे थेला दाहिने मी पूरन काना तला।”
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.