Eastern Tamang Language Bible
रूथ 2
रूथ शिलो म्हाइबारी निबा
नाओमीला ह्रेम्बो एलीमेलेकला वंशपट्टिला फ्युक्पो म्हि गिक मुबा। थेला मिन बोअज मुबा। मोआबी रूथसे नाओमीदा चुह्रङ् भिसी पाङ्जी, “तिग ङा भुरी निसी जुन म्हिसे ङादा दया लला थे म्हिला लिच्छा लिच्छा सिलो म्हाइबारी निउ?”1
नाओमीसे थेदा “तला, ङाला झामे निउ” भिसी पाङ्जी।
थेतबासेलमा रूथ बाली खान्बा म्हिगदेला लिच्छा लिच्छा सिलो म्हाइबारी निजी। ओच्छे थे एलीमेलेकला ह्राङलान म्हि बोअजला भुरी दोजी।
ओच्छे बोअजएनोन बेथलेहेमग्याम थेरी दोखबा मुबा। थेसे गे लबागदेदा लास्सो भिबान “परमप्रभु एनीगदेदेन छ्याम तगै” भिसी पाङ्जी।
ओच्छे थेनीगदेसेनोन “परमप्रभुसे ह्राङदा मोलम पिन्गै” भिसी पाङ्जी।
जमाहेन्से थेसे गे लबागदेदा च्याबारी थान्बा नोकरदा “चु म्रिङ्कोला खला हिन्ना?” भिसी ङ्योइजी।
थे नोकरसे चुह्रङ् भिसी जोहाब पिन्जी, “मोआब य्हुल्साग्याम नाओमीदेन छ्याम खबा मोआबी म्रिङ्म्हेमे हिन्ना। थेसे ङादा बाली खान्बागदेला लिच्छा लिच्छा मुठागदेला गुङ् गुङ्री सिलो म्हाइबारी पिन्गो भिसी पाङ्जी। थे स्य्होरीन खसी दन्देधोना गे लबाला लबान मुला। थेसे छिन्नङ् जे ब्लप्बा न्हबा मुला।”
जमाहेन्से बोअजसे रूथदा चुह्रङ् भिसी पाङ्जी, “माइ, ङ्यन्गो, ए सिलो म्हाइबारी स्य्हान्दो म्हिला भुरी आनिउ, ओच्छे थारेङ्एनोन आनिउ, तर चुरी क्यारनोन ङाला गे लबा म्रिङ्म्हेमेगदेदेन छ्याम म्हाइगो। ह्रेम्बोकोलागदेसे बाली खान्बा ग्लारी च्यागो, ओच्छे सिलो म्हाइबा म्रिङ्कोलागदेदेन छ्याम छ्याम भ्रउ। एदा आङोगो भिसी ङाइ थे ह्रेम्बोकोलागदेदा पाङ्बा मुला। एदा क्युइ फुइजी भिसम थेनीगदेसे भसी थान्बा दर्बुङला क्युइ तेःसी थुङ्गो।”
जमाहेन्से रूथसे बोअजदा फ्या लबान चुह्रङ् भिसी पाङ्जी, “ङा विदेशी हिन्ना भिबा ताम था याङ्सीनोन तिग्दा ह्राङसे ङादा चुदे ल्हाना दया लबा?”
बोअजसे थेदा चुह्रङ् भिसी पाङ्जी, “ह्राङला ह्रेम्बो सिसैनोन एसे ह्राङला आबा आमादेन ह्राङला य्हुल्सा ख्लासी ङोआसेबा म्हिगदे मुबा ग्लारी खसी स्युमीदा लतोःबा वास्ता लबा मुला भिसी म्हिगदेसे ङादा पाङ्बा मुला। परमप्रभुसे एदा एसे लबा गेला इनाम पिन्गै। ए जोगब तबाला लागिरी जुन परमप्रभुला कुरी खबा मुला, थेनोन परमप्रभु इस्राएलला परमेश्वरसे एदा ल्हानान उपहार पिन्गै।”
ओच्छे रूथसे चुह्रङ् भिसी पाङ्जी, “ङा ह्राङला गे लबा म्रिङ्म्हेमे आहिन्सै दयाला ताम लसी ह्राङसे ङादा आँट पिन्बा मुला। ङाइ ह्राङग्याम सदन दया याङ्खम्गै।”
दिगु चबा धुइ तमाहेन्से बोअजसे रूथदा चुह्रङ् भिसी पाङ्जी, “चुरी खसी तिगै चबा स्हे चउ, ओच्छे गेङ अङ्गुरला क्युङ्बा निङ्गुरी ब्लुम्सी चउ।” जमाहेन्से थे बाली खान्बागदेदेन छ्यामनोन चिजी, ओच्छे बोअजसे थेदा ह्रोबा तिगै चबा स्हे पिन्जी। थेसे म्रेन्ना चसीनोन लेङ्ना लजी। ओच्छे थे दोःसी सिलो म्हाइबारी रेःजी, जमाहेन्से बोअजसे ह्राङला गे लबा म्हिगदेदा चुह्रङ् भिसी कुल्जी, “थेदा बोन्ना गुङ् गुङ्रीनोन सिलो म्हाइबारी पिन्गो। थेदा आबङ्गो। बरू एनीगदेसे खिबा बोनग्याम उदिदि ख्लासी थान्गो, ओच्छे आबङ्ना थेदा दुइबारी पिन्गो।”
थेतबासेलमा रूथ ङ्यसेधोनान भुरी सिलो म्हाइसी चिजी, ओच्छे थेसे म्हाइबा सिलो न्हाइमा ओस्पन फाम ङ्हा ते तजी। ओच्छे रूथ थे जौ पुइसी सहररी खजी, ओच्छे थेसे ल्हानान सिलो म्हाइसी भबा थेला स्युमीसे म्राङ्जी। जमाहेन्से ह्राङसे चसी लेङ्बा चबा स्हेनोन रूथसे ह्राङला स्युमीदा पिन्जी।
रूथदा स्युमीसे चुह्रङ् भिसी ङ्योइजी, “तिनी एसे खानङ् सिलो म्हाइजी? एसे खानङ् गे लजी? एदा दया लसी वास्ता लबा थे म्हिदा परमेश्वरसे मोलम पिन्गै।”
थेतबासेलमा रूथसे ह्राङला स्युमीदा ह्राङसे खानङ् गे लजी भिबा ताम पाङ्जी। थेसे “तिनी ङा सिलो म्हाइबारी निबा म्राङ बोअजला चिम” भिसी पाङ्जी।
जमाहेन्से नाओमीसे चुह्रङ् भिसी पाङ्जी, “परमप्रभुसे बोअजदा मोलम पिन्गै, परमप्रभुसे सिबागदेदेन सोबागदेथोरी खाइमै आजिन्बा माया लबारी ख्लाबा आरे। तिग्दा भिसम य्हाङदा दुखरी ह्रो लतोःबा य्हाङला ह्राङलान म्हि चा थेनोन हिन्ना।”
जमाहेन्से मोआबी रूथसे चुह्रङ् भिसी पाङ्जी, “होत्ते जे आहिन, थेसे ङादा बाली खान्सी आजिन्देधोना थेला गे लबा म्हिगदेदेन छ्याम भ्रउ भिसीनोन सुङ्बा मुला।”
नाओमीसे ह्राङला चाङदा चुह्रङ् भिसी पाङ्जी, “ङाला झामे, थेला गे लबा म्रिङ्म्हेमेगदेदेन छ्याम निबा एदा ज्यबा तला, तिग्दा भिसम स्य्हान्दो म्हिला भुरी निमा एदा आज्यबा तखम्ला।”
थेतबासेलमा जौदेन ग्वा खान्सी आजिन्देधोना रूथ बोअजला गे लबा म्रिङ्म्हेमेगदेदेन छ्यामनोन सिलो म्हाइबारी निजी। तर थे ह्राङला स्युमीदेन छ्यामनोन चिमुबा।
Source notes (1)
- Cross-reference लेवी १९:९-१०; ठिम २४:१९
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.