Eastern Tamang Language Bible
रोमी 6:23
Verse 23 is marked below, with the whole chapter around it. Read from the start
पापग्याम सिला, ख्रीष्टग्याम सोला
दाहेन्से य्हाङसे तिग पाङ्से? तिग परमेश्वरग्याम ल्हानान दयामाया याङ्गै भिसी अझ य्हाङ पापनोन लसी चिसे? आहिन, खाइमै चुह्रङ् लबारी आत। चुदे य्हाङ पापला शक्तिग्याम फेसी जिन्जी भिसम तिग्दा य्हाङ दोःसी पापला तहरी चिबा सेम लबा? य्हाङ ख्रीष्ट येशूदेन छ्याम गिक तबारी बप्तिस्मा किन्जी। य्हाङसे किन्बा बप्तिस्मा चा ख्रीष्टदेन छ्याम गिक तसी सिबाला चिनु हिन्ना भिबा ताम एनीगदेदा थानोन मुला। थेतबासेलमा य्हाङएनोन ख्रीष्टदेन छ्यामनोन बप्तिस्माग्याम सिसी ल्हुजी। ओच्छे य्हाङ छार बानीबेहोर थोसी भ्रबाला लागिरी शक्तिशाली परमेश्वर आबासे ह्राङला शक्तिग्याम येशू ख्रीष्टदा सिबाग्याम सोना लजी।1
चुदे य्हाङ ख्रीष्टदेन छ्याम गिक तसी सिजी भिसम य्हाङएनोन थे ह्रङ् लसीन सिबाग्याम सोला। य्हाङला पापसे प्लिङ्बा ल्हुइ नाश तगै भिसी ङाच्छाला बानीबेहोरदा ख्रीष्टदेन छ्यामनोन क्रूसरी साइबा मुला। चुह्रङ् लबा चा दाहेन्से य्हाङ पापला तहरी चिआतोःगै भिसी हिन्ना भिबा ताम य्हाङदा थानोन मुला। तिग्दा भिसम जुन म्हि सिबा मुला थे म्हि थेला पापला सजायग्याम पूरन फेसी जिन्बा मुला।
ख्रीष्टदेन छ्याम सिजी भिसम ख्रीष्टदेन छ्यामनोन सोला भिसी य्हाङसे विश्वास लबा मुला। तिग्दा भिसम य्हाङदा थानोन मुला, ख्रीष्ट सिसीनोन सोसी जिन्बा मुला। दाहेन्से थे खाइमै आसि, ओच्छे थेदा कालला शक्तिसेनोन तिगै लबारी आखम। पापला शक्तिदा ब्रेना लबाला लागिरी ख्रीष्ट तिरेम सिसी जिन्बा मुला, ओच्छे परमेश्वरला लागिरी थे सदनना लागिरी सोबा मुला। थेह्रङ् लसीन एनीगदेएनोन ह्राङ ह्राङला पापला शक्तिला लागिरी सिजी भिसी म्हन्तोःमुला। तर ख्रीष्ट येशूग्याम परमेश्वरला लागिरी सोबा मुला भिसी म्हन्तोःमुला।
थेतबासेलमा एनीगदेला पापी सेमसे जुन लइ म्हन्बा थे अन्छार लआतोःगै भिसी एनीगदेसे ह्राङला सिसी निबा ल्हुइ पापदा शासन लबारी आपिन्गो। ओच्छे आज्यबा गे लबारी ह्राङला या काङ पापदा जिम्मा आपिन्गो। तर सिबाग्याम सोबा म्हिगदेसे ह्रङ् लसी ह्राङला पूरन ल्हुइ परमेश्वरदा पिन्गो, ओच्छे परमेश्वरदा सेम निबा गे लबाला लागिरी ह्राङला या काङ परमेश्वरदान जिम्मा लसी पिन्गो। पाप एनीगदेथोरी शासन लबा एनीगदेला मालिक आहिन, तिग्दा भिसम एनीगदे ठिमला तहरी आरे, तर परमेश्वरला दयामायाला तहरी मुला।
परमेश्वरदा सेम निबा गे लबा म्हि
य्हाङ ठिमला तहरी आरे, तर परमेश्वरला दयामायाला तहरी मुला भिदेमा तिग य्हाङ पापनोन लसी चिसे? आहिन, चुह्रङ् खाइमै लबारी आत। जुन्ना ताम ङ्यन्सी गे लबा सेम लला एनीगदे थेलान घ्याबा दोला। चुदे पापला घ्याबा दोःसी थेसे कुल्बा अन्छार भ्रजी भिसम ए सिला, तर परमेश्वरसे कुल्बा अन्छार भ्रजी भिसम ए थेदा सेम निबा म्हि दोला। ङाच्छा एनीगदे पापला घ्याबा दोबा मुबा। तर दन्दे एनीगदेसे सेमहेन्सेन परमेश्वरला बारेरी लोप्बा ताम अन्छार भ्रबा मुला। चुला लागिरी परमेश्वरदा धन्यवाद तगै। एनीगदे पापग्याम फेबा मुला, ओच्छे परमेश्वरदा सेम निबा म्हि दोबा मुला।
घोबारी आखम्बा एनीगदेला बानीबेहोरसे लमान ङाइ एनीगदेसे घोबारी खम्बा ग्योइरी पाङ्बान मुला। तिरेम आज्यबा सेम थोसी पापथोरी पाप लबाला लागिरी एनीगदेसे ह्राङला ल्हुइ पापदा जिम्मा पिन्बा मुबा। दाहेन्से परमेश्वरदा सेम निबा म्हि दोबारी एनीगदेसे ह्राङला ल्हुइ परमेश्वरदा जिम्मा पिन्गो। पापला घ्याबा दोबा धुइरी एनीगदे परमेश्वरसे म्हन्बा अन्छार भ्रआतोःमुबा। थे धुइरी लबा गेगदे ढन्सी एनीगदे दन्दे पेःमुला, थेह्रङ्बा गेग्याम एनीगदेसे तिग याङ्जी? थे जम्मान आज्यबा गेसे चा म्हिदा सिना लमुला। दाहेन्से एनीगदेसे पापग्याम थार्बा याङ्बा मुला, ओच्छे परमेश्वरदा तेन्सी तिगै दोष आरेबा म्हि दोबा मुला। चुग्याम एनीगदेसे जुकजुकधोनाला जुनी याङ्ला। तिग्दा भिसम पापसे पिन्बा ज्याला चा काल हिन्ना। तर परमेश्वरसे होह्रङ्नोन पिन्बा मोलम चा य्हाङला प्रभु येशू ख्रीष्टग्याम याङ्बा जुकजुकधोनाला जुनी हिन्ना।
Source notes (1)
- Cross-reference कल २:१२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.