Eastern Tamang Language Bible
उन्बा 6
लाहा छाप ठोङ्बा
जमाहेन्से ङाइ थे गोर निस लाहा छाप न्हङ्ला छाप गिक थार्बा पिन्बा ग्यु बोकोसे ठोङ्बा म्राङ्जी। थेनोन धुइरी थे गोर ब्लि छोन्बो जन्तुगदे न्हङ्ला गिकसे मु घुर्बा ह्रङ्बान काइरी “खउ” भिसी पाङ्बा ङाइ थेःजी। जमाहेन्से ङाइ तार ता गिक म्राङ्जी। थे ताथोरी मुबा म्हिसे म्यादली गिक थोबा मुबा। थेदा मुकुट गिक पिन्जी, ओच्छे थेसे ढासी दोःसी ढाबाला लागिरी थेग्याम भ्रजी।1
थार्बा पिन्बा ग्यु बोकोसे दोःसी न्हीरेमला लाहा छाप ठोङ्मा अर्गु जन्तु गिकसे “खउ” भिसी पाङ्बा ङाइ थेःजी। जमाहेन्से ङाइ वाला ता गिक म्राङ्जी। थे ताथोरी मुबा म्हिदा म्हिगदे न्हङ्री गिकसेम गिकदा साइगै भिसी जम्बुलिङग्याम शान्ति ब्यन्सी भोर्बा अधिकार पिन्जी। ओच्छे थेदा घ्रेन तरवार गिकएनोन पिन्जी।2
दोःसी थार्बा पिन्बा ग्यु बोकोसे सोमरेमला लाहा छाप ठोङ्जी। थे धुइरी ङाइ अर्गु जन्तुसे “खउ” भिसी पाङ्बा थेःजी। जमाहेन्से ङाइ म्लाङ्गै ता गिक म्राङ्जी। थे ताथोरी मुबा म्हिला यारी उमाल गिक मुबा। ङाइ थे गोर ब्लि छोन्बो जन्तुगदेला गुङ्ग्याम चुह्रङ् भिबा काइ थेःजी, “तिरेला ज्यालासे ग्वा ग्लुबा हिन्सम किलो नाङ् ओच्छे जौ ग्लुबा हिन्सम किलो सोम ग्लुबारी खम्ला। तर छ्युगुला दोङदेन अङ्गुरला दोङदा चा न्होङ्ना आलउ।”
ओच्छे थार्बा पिन्बा ग्यु बोकोसे ब्लिरेमला लाहा छाप ठोङ्जी। थे धुइरी ङाइ अर्गु जन्तुसे “खउ” भिसी पाङ्बा थेःजी। जमाहेन्से ङाइ उर ता गिक म्राङ्जी। थे ताथोरी क्रेःबा म्हिला मिन चा “काल” मुबा। ओच्छे थेला लिच्छा लिच्छा चा सिबा म्हिगदेला आत्मा चिबा ग्ला मुबा। थेनीगदेदा लडाइ, अनिकाल, देशानदेन जम्बुलिङला ह्रि जन्तुगदेग्याम जम्बुलिङला भो ब्लिरी भो गिकदा नाश लबा अधिकार पिन्बा मुबा।3
थेह्रङ् लसीन थार्बा पिन्बा ग्यु बोकोसे ङ्हारेमला लाहा छाप ठोङ्जी। थे धुइरी ङाइ धूप म्राबा ग्लाला धिरी परमेश्वरला बचनदेन परमेश्वरला बारेरी थेःना लबासेलमा स्य्हान्दोसे साइबा म्हिगदेला आत्मागदे म्राङ्जी। ओच्छे थेनीगदेसे घ्रेन काइरी क्रिङ्बान चुह्रङ् भिसी पाङ्जी, “जम्मान भन्दा घ्रेन ओच्छे जम्मान भन्दा चोखोदेन सत्य प्रभु, ह्राङसे ङन्दा साइबा जम्बुलिङरी मुबा म्हिगदेला ठीक निसाफ खाइमा लसी थेनीगदेदा सजाय पिन्ना?” थेनीगदे जम्मादान गोर गिक गिक तार क्वान पिन्जी। ओच्छे येशूदा तेन्बा एनीगदेला जम्मान ह्रोदेन ज्योज्यो आले नाना आङागदेदाएनोन एनीगदेदा ह्रङ् लसी आसाइदेधोना भ्रान्गो भिसी पाङ्जी।
जमाहेन्से ङाइ थार्बा पिन्बा ग्यु बोकोसे ढुरेमला लाहा छाप ठोङ्बा म्राङ्जी। थे धुइरी घ्रेन सङ्गुल खजी। ओच्छे धिनी म्लाङ्गै क्वान ह्रङ्बान धोपधोप तजी, लनी चा का ह्रङ्बान वाला तजी।4 लाबालुङ्सरसे अञ्जीरला दोङ य्होङ्मा आचिप्बा रोगदे ताइबा ह्रङ् लसी मुला सारगदे जम्बुलिङरी ताइजी।5 मु चा कागज ह्रङ्नोन रिल्बान म्हासी निजी। ओच्छे गङ्गदेदेन समुद्रला गुङ्री मुबा ग्लागदे चा ह्राङ ह्राङला ग्लाग्याम ल्हेजी।6 जमाहेन्से जम्बुलिङला ग्लेगदे, शासन लबागदे, सिपाहीला कप्तानगदे, फ्युक्पो म्हिगदे, अधिकार मुबा म्हिगदे, घ्याबागदेदेन अर्गु जम्मान म्हिगदे गङ् गङ्ला ऊगदेदेन पहरागदेरीक्यार लाजी।7 थेनीगदेसे गङ्देन पहरागदेदा चुह्रङ् भिसी पाङ्जी, “ठिरी धन्छ्याबादेन थार्बा पिन्बा ग्यु बोकोला बोमोग्याम ङन्दा छुम्सी जोगब लउ।8 तिग्दा भिसम ठिरी धन्छ्याबादेन थार्बा पिन्बा ग्यु बोकोसे निसाफ लसी घ्रेन सजाय पिन्बा धिन खसी जिन्बा मुला। थे धिनना दुख खाल्से नाखम्ला?”9
Source notes (9)
- Cross-reference जक १:८; ६:३,६
- Cross-reference जक १:८; ६:२
- Cross-reference इज १४:२१
- Cross-reference उन्बा ११:१३; १६:१८; यशै १३:१०; योए २:१०,३१; ३:१५; मत्ती २४:२९; मर्कू १३:२४-२५; लूका २१:२५
- Cross-reference यशै ३४:४
- Cross-reference उन्बा १६:२०
- Cross-reference यशै २:१९,२१
- Cross-reference होशे १०:८; लूका २३:३०
- Cross-reference योए २:११; मला ३:२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.