Eastern Tamang Language Bible
बुद्धि 8
बुद्धिसे ङ्योइबा
तिग बुद्धिसे घ्रेन काइ लसी आङ्योइ मुला?
तिग घोखम्बा शक्तिसे घ्रेन काइ आतेःमुला?1
थे ग्यामला नोबा नोबा ग्लागदेरी,
ओच्छे थे दोबाटो ब्लिरी राप्मुला,
सहरपट्टि निबा मूल म्रापला ङाम्री,
सहर न्हङ्री वाङ्बा म्रापरी घ्रेन काइ तेःसी थे चुह्रङ् भिसी क्रिङ्मुला,
“म्हिगदे, ङाइ एनीगदेदा ङ्योइबा मुला,
ङाइ जम्मान म्हि य्हुल्दा ङाला काइ थेःना लला।
बुद्धि आरेबा म्हिगदे, बुद्धि किन्गो,
मूर्ख म्हिगदे, घोखम्बा शक्ति किन्गो।
ङ्यन्गो, एनीगदेदा पाङ्तोःबा ज्यबा ताम ङादेन छ्याम मुला,
ठीक ताम पाङ्बाला लागिरी ङाइ ङाला सुङ् ओर्ला।
ङाला सुङ्से सत्य ताम पाङ्ला,
तिग्दा भिसम ङाला सुङ्से आज्यबा तामदा हेला लमुला।
ङाइ पाङ्बा जम्मान बचनगदे सत्य मुला,
थे बचनगदे न्हङ्री आतोःबा ताम गिकनोन आरे।
घोखम्बा म्हिला लागिरी थे जम्मान बचन ठीक मुला,
ज्ञान मुबा म्हिला लागिरी थे जम्मान खालैसेन दोष लबारी आखम्बा खाल्ला मुला।
म्हुइला साटोरी ङाला अर्ती किन्गो,
नम्बरी म्हार भन्दा बरू ज्ञान धम्गो।
तिग्दा भिसम बुद्धि मानिक भन्दा ल्हानान महङ्गो मुला,
ओच्छे एसे म्हन्बा खजिबै स्हे थेदेन छ्याम दाँजब लबारी आखम।
ङा बुद्धि हिन्ना, ङाइ ठीक निसाफ लमुला,
ङादेन छ्याम ज्ञानदेन घोखम्बा शक्ति मुला।
परमप्रभुदा मान लबा चा नाइबा तामदा हेला लबा हिन्ना,
घमण्ड लबा, ङा ह्रङ्बा खालै आरे भिसी भ्रबा, नाइबा बानीबेहोरदेन न्होङ्ना लबा तामगदेदा ङाइ हेला लमुला।
ङाग्यामसेन सल्लाहदेन ठीक निसाफ तमुला,
ङादेन छ्याम घोखम्बा शक्तिदेन भङ् मुला।
ग्लेगदेसे ङाग्यामनोन शासन लमुला,
ओच्छे शासन लबागदेसे ठीक ठिम स्होमुला।
ग्लेला झागदेसे ङाग्यामनोन य्हुल्साला ठिम चलब लमुला,
ओच्छे जम्मान भन्दा घ्रेन अधिकार मुबा म्हिगदेसे जम्बुलिङ नाङ्नोन शासन लमुला।
ङादा माया लबागदेदा ङाइ माया लला,
ङादा म्हाइबागदेसे ङादा स्याप्ला।
ङादेन छ्याम धन सम्पत्तिदेन मान मुला,
ओच्छे सदन टुबा धन सम्पत्तिदेन फलिफाप मुला।
ङाग्याम याङ्बा स्हे नम्बरी म्हार भन्दा ज्यबा मुला।
ङाइ जुन स्हे पिन्ना, थेसे जम्मान भन्दा ज्यबा म्हुइदाएनोन ढाला।
ङा परमेश्वरदा सेम निबा ग्यामदेन
ठीक ग्यामरी भ्रमुला।
ङादा माया लबागदेदा ङाइ धन सम्पत्तिसे प्लिङ्ना लला,
ओच्छे ङाइ थेनीगदेला भकारी प्लिङ्ना लला।
परमप्रभुसे जम्बुलिङ स्होबा धुइला शुरूरीन ङादा स्होजी,
थेसे ओन्मा लबा जम्मान गेगदे भन्दाएनोन ङाच्छा ङादा स्होजी।
जुकजुकहेन्सेन ङादा धम्बा मुबा,
जम्बुलिङ स्होबा भन्दा ङाच्छान ङादा धम्बा मुबा।
समुद्रगदे आरेमन ङा न्हसी जिन्बा मुबा,
स्योङ्गदे भन्दा ङाच्छान ङा न्हबा मुबा।
घ्रेन घ्रेन गङ्गदे ह्राङ ह्राङला ग्लारी छ्याबा भन्दा ङाच्छान,
जम्मान गङ्गदे भन्दा ङाच्छान ङा न्हबा मुबा।
परमप्रभुसे जम्बुलिङ, सदेन
मसिनो धुलु स्होबा भन्दा ङाच्छान ङादा स्होबा मुबा।
परमप्रभुसे मुदा थेला ग्लारी छ्याना लबा धुइरी
ओच्छे घ्रेन घ्रेन समुद्रदा क्षितिजसे क्युर्सी थान्बा धुइरी
ङा थेरी मुबा।
परमप्रभुसे मुरी खसु थान्बा धुइरी,
ओच्छे घ्रेन घ्रेन समुद्रला मूलगदेदा थेनीगदेलान ग्लारी कोङ्ना लसी थान्बा धुइरी,
परमप्रभुसे तोगब लबा ग्ला वाइसी आनिगै भिसी
समुद्रला साँध थान्बा धुइरी
ओच्छे थेसे जम्बुलिङला जग थान्बा धुइरी,
ङा गे लबा म्हि गिक ह्रङ् लसी थेला ङाम्री चिमुबा।
ङा धिनहुँनोन ताङ्सी फुरफुर तमुबा,
थेला ङाच्छापट्टि ङा सदन ताङ्सी चिमुबा।
थेसे स्होबा जम्बुलिङ नाङ्नोन ताङ्बान
ङा म्हि य्हुलदेन छ्याम ताङ्सी ताङ्सी चिमुबा।
ङाला झा, दाहेन्से ङाला ताम ङ्यन्गो,
जुन म्हि ङाइ उन्बा ग्यामगदेरी भ्रला,
थेनीगदे परमेश्वरग्याम मोलम याङ्बा म्हि हिन्ना।
ङाला अर्ती ङ्यन्सी बुद्धि मुबा म्हि दोगो,
ङाइ पिन्बा अर्तीदा हेला आलउ।
जुन म्हिसे ङाला बचन ङ्यन्मुला,
जुन म्हिसे धिनहुँनोन ङाला म्रापरी ज्यना लसी च्याबान
ङाला म्राप ङाम्री ख्रुङ्सी चिला,
थे चा मोलम याङ्बा म्हि हिन्ना।
तिग्दा भिसम जुन म्हिसे ङादा स्याप्ला, थेसे जुनी याङ्ला,
ओच्छे परमप्रभुग्याम दया याङ्ला।
तर जुन म्हिसे ङादा स्याप्बारी आखम,
थेसे ह्राङसे ह्राङदान नोक्सान तना लमुला।
ङादा हेला लबागदे जम्मासेन कालदेन छ्याम माया लमुला।”
Source notes (1)
- Cross-reference बुद्धि १:२०-२१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.