Eastern Tamang Language Bible
बुद्धि 20
अङ्गुरला निङ्गुसे खिसी लबा म्हि स्होमुला,
ओच्छे ङ्योइबा स्हेसे चा कल तना लमुला,
चुह्रङ्बा स्हेला अम्मलरी फसब तबागदेला बुद्धि आतमुला।
ग्लेला बोमोला झोक सिंह ङ्हार्बा ह्रङ्बान तमुला,
थेदा बोमो खना लबासे ह्राङलान ज्यान निना लमुला।
कल लबारी आम्हाइबा चा म्हिला लागिरी ज्यबा ताम हिन्ना,
तर जम्मान मूर्ख चा कल लबारी योना तमुला।
ब्लेगु म्हिसे ठीक धुइरी म्हे आमोइमुला,
थेतबासेलमा थेसे बाली मिन्बा धुइरी बाली दुइबारी म्हाइमुला,
तर थेसे तिगै आयाङ्मुला।
म्हिला सेमसे खेन्बा तामगदे नुप्बा क्युइ ह्रङ्बान हिन्ना,
तर घोखम्बा शक्ति मुबा म्हिसे थेदा छेङ्सी तोर तेःला।
खाइमै आजिन्बा माया लबा म्हि हिन्ना भिसी ल्हानान म्हिगदेसे ह्राङसे ह्राङदान पाङ्मुला,
तर विश्वास लखम्बा म्हि खानङ् स्याप्ला?
परमेश्वरसे कुल्बा अन्छार भ्रबा म्हि तिगै दोष आरेबा जुनी थोसी भ्रमुला,
थेला झा झामेगदे परमेश्वरग्याम मोलम याङ्बागदे हिन्ना।
निसाफ लबारी ग्ले ह्राङला ठिरी चिमाहेन्से
थेसे जम्मान आज्यबा तामगदे गिक गिक लसी म्हाइला।
खाल्से पाङ्बारी खम्ला, “ङाइ ङाला सेमदा चोखो थान्बा मुला,
ङा ज्यबा म्हि हिन्ना, ङाइ पाप लबा आरे?”
आढिक्बा अर्गुन ढकदेन उमालगदे
परमप्रभुदा सेम आनिमुला।
कोला गिकदाएनोन थेला बानीबेहोरग्यामनोन
थेला बानीबेहोर ठीक मुला की आरे भिसी था याङ्खम्मुला।
ङ्यन्बाला लागिरी नाब्यङ् ओच्छे च्याबाला लागिरी मी,
चु न्हीदान परमप्रभुसे स्होबा हिन्ना।
म्हेर्सी चिबारी जे आम्हाइगो, थेसे एदा झन प्राङ्बो दोना लला।
छोर्सी चिउ ओच्छे एदेन छ्याम सदन अन्न तला।
ग्लुबा म्हिसे चुह्रङ् भिसी पाङ्मुला,
“चु ज्यबा आरे, चु ज्यबा आरे!”
तर उदी क्यथाङ् दोमाहेन्से
थेसे ह्राङसे ग्लुबा स्हेरी धाक लमुला।
म्हारदेन मानिकगदे ल्हानान मुला,
तर ज्ञानना ताम पाङ्बा म्हि चा म्हाइसीन आयाङ्बा हीरा मोती हिन्ना।
ङोआसेबा म्हिला जमानी चिबा म्हिला क्वानएनोन ब्यन्गो,
चुदे थेसे जे लाई म्हन्बा थेनोन लसी भ्रबा म्रिङ्म्हेमेला लागिरी
थेह्रङ् लबा हिन्सम थेला क्वान बन्दकी थान्गो।
फट्टा ताम लसी चम्याङ्बा स्हे ब्रोइ खबा छोर्मुला,
तर लिच्छा निसी सुङ् नाङ्नोन गिट्टी युबा ह्रङ्नोन तमुला।
सल्लाह किन्सी जे गे लउ,
लडाइ लतोःबा मुसम सल्लाह किन्गो।
खालैदा पाङ्बारी आतबा ताम तामगन लसी भ्रबा म्हिदा पाङ्जी भिसम थेसे धोका पिन्मुला,
थेतबासेलमा ल्हानान ताम लसी भ्रबा म्हिग्याम थारेङ्नोन चिउ।
चुदे खालै म्हिसे ह्राङला आबा आमादा केःजी भिसम
धोपधोप तबा धुइरी थेला नाङ्सल साइला।
ङाच्छा हतार हतार लसी ह्राङला यारी सम्पत्ति किन्बा म्हिसे
लिच्छा निसी मोलम आयाङ्।
एसे “ङाइ आज्यबा लबादा नाङ फाला” भिसी आपाङ्गो।
परमप्रभुथोरी भर लउ, थेसेन एदा जोगब लला।
आढिक्बा ढकदेन उमाल परमप्रभुदा सेम आनिमुला,
ओच्छे जाल लसी स्होबा उमाल म्राङ्सी परमप्रभु आताङ्मुला।
म्हिदा भ्रबाला लागिरी परमप्रभुसेन ग्याम उन्मुला,
म्हिसे ह्राङ भ्रतोःबा ग्याम खाह्रङ् लसी था याङ्खम्ला?
होशियार आतना तिगै स्हे फुल्सी जिन्सी जे
ह्राङसे लबा भाकलला बारेरी खेन्बा म्हिला लागिरी ह्राङनोन फसब तबा वा दोला।
बुद्धि मुबा ग्लेसे नाइबा गे लबा म्हिगदेदा ताप्मुला,
थेसे थेनीगदेथोरी दाइँ लमुला।
परमप्रभुला नाङ्सलसे म्हिला आत्मादा म्हाइमुला,
परमप्रभुला नाङ्सलसे थेला सेमदा म्हाइसी तेःमुला।
खाइमै आजिन्बा मायादेन विश्वास लखम्बा तामसेन ग्लेदा जोगब लसी थान्मुला,
खाइमै आजिन्बा मायाग्यामनोन थेला ठि जोगब तमुला।
भ्योन म्हिगदेदा घ्रेन स्होबा स्हे चा थेनीगदेला भङ् हिन्ना,
सार्बा क्रा चा खेप्बा दोबा म्हिगदेला लागिरी मान हिन्ना।
तोबा ग्याङ्बा लमा नाइबा ताम म्हसी निमुला,
ओच्छे तहरी चिबा तामसे म्हिला सेम खारेब लमुला।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.