Eastern Tamang Language Bible
फिलि 2
तिग ख्रीष्टदेन छ्याम गिक तबासेलमा एनीगदेसे आँट याङ्बा मुला? ओच्छे तिग थेला मायासे एनीगदेसे ह्रो याङ्बा मुला? तिग पवित्र आत्मादेन छ्याम संगती लबा मुला? तिग एनीगदेसे ह्राङ ह्राङ न्हङ्री सेमहेन्सेन दयादेन माया लबा मुला? थेह्रङ् भिसम एनीगदे जम्मान सेम गिक तसी ह्राङ ह्राङ न्हङ्री माया लउ, ओच्छे ढिक्सी छ्याम छ्यामनोन गे लसी ङादा ताङ्ना लउ। ओच्छे ह्राङला जे ग्याम च्यासी गे लबादेन ह्राङ जे घ्रेन भिसी आम्हन्गो। तर ह्राङ भन्दा स्य्हान्दोदा घ्रेन म्हन्सी सोझो तसी चिउ। एनीगदे जम्मासेन ह्राङदा जे ज्यबा तगै भिसी आम्हन्गो। तर स्य्हान्दोदाएनोन ज्यबा तगै भिसी म्हन्गो।
एनीगदेसे ख्रीष्ट येशूला ह्रङ्बान सेम थोगो।
येशू ख्रीष्ट ङाच्छाहेन्सेन परमेश्वर मुबा।
तसैनोन थे परमेश्वर दोबारी आम्हाइनी।
बरू स्वर्गरी मुबा ह्राङला जम्मान स्हे ख्लासी
म्हि दोसी जम्बुलिङरी केजी।
ओच्छे नोकर ह्रङ्बान दोजी।
थे ह्राङनोन म्हि दोसी फेप्खसैनोन सोझो तसी
परमेश्वरसे कुल्बा ताम ङ्यन्सी
क्रूसरी सिबारीनोन तयार तजी।
थेतबासेलमा परमेश्वरसे थेदा जम्मान भन्दा घ्रेन स्होसी
जम्मान स्हेगदेला भन्दा घ्रेन मिन थान्जी।
थेतबासेलमा स्वर्गदेन जम्बुलिङ ओच्छे जम्बुलिङ धिरी मुबा
जम्मासेन येशूदा मान लबारी पुइ जूनोन तोःला।
थेह्रङ् लसीन परमेश्वर आबाला मानदेन जयजयकार लबाला लागिरी
जम्मासेन येशू ख्रीष्टनोन प्रभु हिन्ना भिसी पाङ्नोन तोःला।1
नाङ्सलसे ह्रङ् लसी य्हाल तना लउ
ङाला सेम निबा ह्रोगदे, ङा एनीगदेदेन छ्याम मुबा धुइरी एनीगदेसे ङाइ पाङ्बा ताम ङ्यन्मुबा। दन्दे ङा एनीगदेदेन छ्याम आरेमा झन ङाइ पाङ्बा ताम ङ्यन्बा चा घ्रेन ताम हिन्ना। परमेश्वर म्राङ्सी लोङ्गो ओच्छे थेदा मान लसी एनीगदेसे याङ्बा थार्बा अन्छारला गे लउ। तिग्दा भिसम परमेश्वरसे एनीगदेदा थेसे कुल्बा ताम ङ्यन्बा सेमदेन थेदा ताङ्ना लबा शक्ति पिन्सी एनीगदेला गुङ्री गे लबान मुला।
थेतबासेलमा गनगनदेन कल आलना जम्मान गे ढिक्सी लउ। थेह्रङ् लजी भिसम एनीगदे पापीदेन न्होङ्बा म्हिगदेला गुङ्री चोखोदेन तिगै दोष आरेबा म्हि तसी परमेश्वरला सन्तान दोला। ओच्छे सारसे मुरी य्हाल तना लबा ह्रङ् लसी एनीगदेसे जम्बुलिङरी य्हाल य्हाल तना लला।2 एनीगदेसे थेनीगदेदा थार्बा पिन्बा ख्रीष्टला समाचार थेःना लजी भिसम ख्रीष्ट फेप्खबा धुइरी ङाइ दुख लसी लबा गे खेरोरी आनिनी भिसी ङा ल्हानान ताङ्म्याङ्ला। ओच्छे एनीगदेला विश्वासग्याम लबा गे चा परमेश्वरदा फुल्बा बलि ह्रङ्बान दोबा मुला। थे गे पूरा लबाला लागिरी ङा बलि ततोःसैनोन एनीगदे जम्मानदेन छ्याम ङा सेमहेन्सेन ताङ्ला। थेह्रङ् लसीन एनीगदे ताङ्गो, ओच्छे ङादाएनोन ताङ्ना लउ।
तिमोथीदेन इपाफ्रोडिटस
ङाइ तिमोथीदा एनीगदे मुबा ग्लारी योनान पुइखला भिसी प्रभु येशूथोरी आश लबा मुला, चुह्रङ् लसी थेग्याम एनीगदेला बारेरी था याङ्सी ङा ताङ्म्याङ्ला। तिमोथीसे ह्रङ् लसी एनीगदेदा सेमहेन्सेन वास्ता लबा म्हि ङादेन छ्याम स्य्हान्दो खालै आरे। तिग्दा भिसम स्य्हान्दोगदेसे चा येशू ख्रीष्टला तामदा तिगै वास्ता आलना ह्राङला जे ग्याम च्यासी भ्रमुला। तर तिमोथी खाह्रङ्बा म्हि हिन्ना भिबा ताम एनीगदेदा थानोन मुला। तिग्दा भिसम झासे आबादा खाह्रङ् लसी ह्रो लमुला, थेह्रङ् लसीन थेसे ङादा थार्बा पिन्बा समाचार थेःना लबारी ह्रो लबा मुला। थेतबासेलमा ङादा तिग तबा चिम, थे ताम था याङ्मैछ्याम थेदा एनीगदे मुबा ग्लारी पुइखबा ङाला सेम मुला। ओच्छे ङाएनोन योनान खम्याङ्ला भिसी प्रभुथोरीन भर लबा मुला।
एनीगदेसे ङादा ह्रो लबाला लागिरी पुइखबा प्रभुरी ङाला आले, ङादेन छ्याम ढिक्सी प्रभुला गे लबा ओच्छे ङादा ह्रो लबा ख्रीष्टला सिपाही इपाफ्रोडिटसदा एनीगदे मुबा ग्लारी पुइखनोन तोःला भिसी ङाइ म्हन्बा मुला। तिग्दा भिसम थेसेनोन एनीगदे जम्मानदेन छ्याम ह्रुप तबारी ल्हानान सेम लबा मुला। थे आखम्बा मुला भिबा ताम एनीगदेसे थेःबासेलमा थेदा ल्हानान सुर्दा तबा मुला। हिन्ना, थे ल्हानान आखम्ना सिबारीन छ्याइमुबा, तर परमेश्वरसे थेदा दया लजी। थेदा जे आहिन, ङादाएनोन दुखथोरी झन दुख आतगै भिसी परमेश्वरसे दया लजी। थेतबासेलमा थेदा एनीगदे मुबा ग्लारी पुइखबारी ङाइ ल्हानान सेम लबा मुला। तिग्दा भिसम थेदा दोःसी म्राङ्माहेन्से एनीगदे ताङ्ला ओच्छे ङाला सुर्दाएनोन म्हला। एनीगदेसे थेदा प्रभुरी आले ह्रङ्बान म्हन्सी सेमहेन्सेन ताङ्सी माया लउ। चुह्रङ्बा म्हिगदेदा चा मान लनोन तोःला। तिग्दा भिसम एनीगदेसे ङादा लतोःबा ह्रो लबाला लागिरी थेसे ह्राङला ज्यानना तिगै वास्ता आलना ख्रीष्टला गे लबाला लागिरी थे सिबारीन तयार तजी।
Source notes (2)
- Cross-reference यशै ४५:२३
- Cross-reference ठिम ३२:५
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.