Eastern Tamang Language Bible
झ्याबा 6
नाजिरीगदेला लागिरी ठिम
परमप्रभुसे मोशादा चुह्रङ् भिसी सुङ्जी, “इस्राएलीगदेदा चुह्रङ् भिसी पाङ्गो, ‘खालै ह्रेम्बोकोला अथवा म्रिङ्कोलासे ह्राङसे ह्राङदान परमप्रभुला लागिरी फेसी नाजिरी1 दोसी चिबारी भाकल लबा सेम लजी भिसम अङ्गुरला निङ्गुदेन अर्गु खाल्ला ङ्य्होइना लबा स्हेग्याम थे थारेङ्नोन चिगै। ओच्छे थेह्रङ्बा स्हे थेसे थुङ्नोन आथुङ्गै। थेसे अङ्गुरला खुगु आथुङ्गै, ओच्छे थेसे खार्बा अङ्गुर तसै, भर्खर थुबा अङ्गुर तसै आचगै। जुन धिनधोना थे नाजिरी दोसी चिला थे धुइधोना थेसे अङ्गुर, अङ्गुरला गेडादेन फि तिगैनोन आचगै।
“‘खाइमाधोना थेसे नाजिरी दोसी चिबारी भाकल लला थे धिनधोना थेसे ह्राङला क्रा आथागै। तर थेसे ह्राङला क्रा ह्रेङ्ना लगै। ओच्छे नाजिरी दोसी चिबारी भाकल लबा धुइ पूरा आतदेधोना थेसे ह्राङसे ह्राङदान शुद्ध थान्गै। खाइमाधोना थे नाजिरी दोसी चिला, थे धिनधोना थे खालैलान लाशला ङाम्रीनोन आनिगै। थेला ह्राङलान आबा आमा, ज्योज्यो आले, नाना आङा सिसैनोन थेनीगदेला लाशला ङाम्री निसी थेसे ह्राङसे ह्राङदान अशुद्ध आस्होगै। तिग्दा भिसम थेसे ह्राङला परमप्रभुला लागिरी फेसी चिबारी भाकल लबाला चिनु थेला थोबोरी मुला। जुन धिनधोना थे नाजिरी दोसी चिला, थे धिनधोना थे परमप्रभुला लागिरी चोखो तला।
“‘तिगै लसी तिख्खुरीन थेला ङाम्री खालै म्हि सिजी, ओच्छे नाजिरी दोबा धिनुकुनुहेन्सेन आथाना थान्बा क्रा अशुद्ध तजी भिसम थेसे निसरेधोना भ्रन्गै। ओच्छे निसरेकुनु थेसे ठिम अन्छार ह्राङला क्रा भ्रेमाहेन्से थे शुद्ध तला। जमाहेन्से भ्रेरेकुनु थेसे जोर गिक ढुकुर अथवा जोर गिक बुर्गन ह्रुप तबा पालरी भसी पूजाहारीदा पिन्गै। लाशला ङाम्री तबासेलमा थे अशुद्ध तबा मुला। थेतबासेलमा पूजाहारीसे थेदा परमप्रभुदेन छ्याम ढिक्ना लबाला लागिरी गिक चा पापबलि फुल्गै। ओच्छे अर्गु गिक चा मेरी ख्राङ्सी फुल्बा बलि फुल्गै। ओच्छे थेनोन धिनकुनु थेसे दोःसी ह्राङला क्रा परमप्रभुला छ्यारी अर्पण लगै थेसे दोषबलि फुल्बाला लागिरी तिदिङ् तबा ग्यु बोको गिक भगै। ओच्छे नाजिरी दोसी चिबारी भाकल लबा धुइ पूरा आतदेधोनाला लागिरी थेसे दोःसी ह्राङसे ह्राङदान परमप्रभुला छ्यारी अर्पण लगै। तिग्दा भिसम थे अशुद्ध तबासेलमा ङाच्छा नाजिरी दोसी चिबा खजिबै धिन आझ्या।
“‘नाजिरी दोसी चिबारी भाकल लबा धुइ पूरा तमाहेन्से थे नाजिरीदा ह्रुप तबा पालला म्रापरी भगै। थेरी परमप्रभुला लागिरी थेसे मेरी ख्राङ्सी फुल्बा बलिला लागिरी तिदिङ् तबा ग्यु बोको गिक, पापबलिला लागिरी तिदिङ् तबा ग्यु योमो गिक ओच्छे ढिक्ना लबा बलिला लागिरी चिप्बा ग्यु बोको गिक बलि फुल्तोःला। होह्रङ् लसीन थेसे जैतूनना छ्युगुरी झ्योप्बा खमिर आयुबा ज्यबा भ्राला रूङ्बा रूङ्बा गेङदेन छ्युगु फोर्सी ख्राङ्बा खमिर आयुबा पाबा पाबा गेङ डालो नाङ्, अन्नबलिदेन अङ्गुरला निङ्गु फुल्तोःला।
“‘जमाहेन्से पूजाहारीसे थेला लागिरी परमप्रभुला ङाच्छापट्टि पापबलिदेन मेरी ख्राङ्सी फुल्बा बलि फुल्गै। होह्रङ् लसीन थेसे ढिक्ना लबा बलिला रुपरी ग्यु बलि फुल्गै, ओच्छे खमिर आयुबा डालोरी मुबा गेङ, अन्नबलिदेन अङ्गुरला निङ्गुएनोन परमप्रभुदा फुल्गै। जमाहेन्से परमप्रभुला लागिरी फेसी चिबारी भाकल लबाला चिनुला रुपरी क्रा आथाना चिबा थे नाजिरीसे ह्रुप तबा पालला म्रापरी ह्राङला क्रा भ्रेगै। ओच्छे थेसे थे क्रा दुइसी ढिक्ना लबा बलि भन्दा धिरी थान्सी बलि फुल्बा ग्लारी लुङ्सी चिबा मेरी युगै।
“‘जमाहेन्से पूजाहारीसे ग्यु बोकोला ब्लोबा भम, खमिर आयुबा डालोरी मुबा पाबा गेङ गिकदेन खमिर आयुबा रूङ्बा गेङ गिक तेःसी थे नाजिरीला यारी पिन्गै। ओच्छे पूजाहारीसे थे जम्मान स्हे परमप्रभुला ओन्छाङ्री यारी थीबान थीबान फुल्गै। चु जम्मान स्हेदेन यारी थीबान थीबान फुल्बा कुला स्या ओच्छे काङ्स्हुला स्या पूजाहारीला लागिरी चोखो स्हे हिन्ना। थे चा पूजाहारीला भो हिन्ना। जमाहेन्से थे नाजिरीसे अङ्गुरला निङ्गु थुङ्सै तला।
“‘नाजिरीसे लबा भाकलला ठिम चा चुनोन हिन्ना। तर नाजिरीसे भाकलला ठिम अन्छार भन्दा ल्हानान भेटी फुल्बा सेम लजी भिसम थेसे फुल्खाम्ला। नाजिरीला ठिम अन्छार थेसे भाकल लबा जम्मान ताम पूरा लतोःला।’”
पूजाहारीसे पिन्बा मोलम
परमप्रभुसे मोशादा चुह्रङ् भिसी सुङ्जी, “हारूनदेन थेला झागदेदा एसे चुह्रङ् भिसी पाङ्गो, ‘एनीगदेसे इस्राएलीगदेदा चुह्रङ् भिसी मोलम पिन्गो।
“‘परमप्रभुसे एनीगदेदा मोलम पिन्गै,
ओच्छे परमप्रभुसे एनीगदेदा जोगब लगै।
परमप्रभुसे एनीगदेला ली य्हाल य्हाल तना लगै,
ओच्छे परमप्रभुसे एनीगदेदा दयामाया लगै।
परमप्रभुला स्य्हाल सदन एनीगदेथोरी तगै,
ओच्छे परमप्रभुसे एनीगदेदा शान्ति पिन्गै।’
“चुह्रङ् लसी एनीगदेसे इस्राएलीगदेदा मोलम पिन्मा ङाला मिन किन्जी भिसम ङाइ एनीगदेदा मोलम पिन्ना।”
Source notes (1)
- Footnote नाजिरी छिक चा हिब्रू ग्योइला नाजिर भिबा छिकग्याम खबा हिन्ना। चुला अर्थ चा परमेश्वरला लागिरी फेबा हिन्ना ( १ शमू १:११; निसाफ १३:५-७)।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.