Eastern Tamang Language Bible
झ्याबा 15
बलि लबा ठिमगदे
परमप्रभुसे मोशादा चुह्रङ् भिसी सुङ्जी, “इस्राएलीगदेदा चुह्रङ् भिसी पाङ्गो, ‘एनीगदे चिबाला लागिरी ङाइ एनीगदेदा पिन्बारी छ्याइबा य्हुल्सारी दोमाहेन्से एनीगदेसे म्हे बहर गिक, ग्यु बोको गिकदेन ग्यु गिक अथवा रा गिक परमप्रभुला लागिरी फेसी थान्बा मेरी ख्राङ्सी फुल्बा बलि तसै, भाकलला बलि तसै, ताङ्सी ताङ्सी फुल्बा बलि तसै ठिम अन्छार खबा चाडला बलि तसै परमप्रभुदा सेम निबा बास्ना खबा बलि फुल्गो। जमाहेन्से चु बलि फुल्बा म्हिसे ओस्पन फाम गङ्सल ज्यबा भ्रा ओस्पन लिटर नाङ् जैतूनना छ्युगुरी झ्योप्सी परमप्रभुला लागिरी अन्नबलि फुल्गै। बलि जे तसै, मेरी ख्राङ्सी फुल्बा बलिला ग्यु बोको तसै, थे बलिदेन छ्यामनोन अङ्गुरला निङ्गु फुल्बाला लागिरी एसे ओस्पन लिटर नाङ् अङ्गुरला निङ्गुएनोन ठीक लउ।
“‘चिप्बा ग्यु बोको बलि फुल्बा धुइरी छ्यामनोन अन्नबलि फुल्बाला लागिरी चा ओस्पन फाम गङ्सल ज्यबा भ्रा ओस्पन लिटर नाङ्से गङ्सल जैतूनना छ्युगुरी झ्योप्गै। ओच्छे अङ्गुरला निङ्गु फुल्बाला लागिरी एसे लिटर नाङ्से गङ्सल अङ्गुरला निङ्गु ठीक लउ। थे बलि चा परमप्रभुदा सेम निबा बास्ना खबा बलि तगै।
“‘परमप्रभुदेन छ्याम लबा भाकलला बलि तसै, ढिक्ना लबा बलि तसै, एसे मेरी ख्राङ्सी फुल्बा बलिला लागिरी म्हे बहर ठीक लमा, एसे थे म्हे बहर बलि फुल्मा ओस्पन फाम नाङ्से गङ्सल ज्यबा भ्रा ओस्पन लिटर न्ही जैतूनना छ्युगुरी झ्योप्सी थे बलिदेन छ्यामनोन अन्नबलिएनोन फुल्गो। ओच्छे अङ्गुरला निङ्गु फुल्बाला लागिरी एसे ओस्पन लिटर न्ही अङ्गुरला निङ्गु भउ। थे चा परमप्रभुला लागिरी फेसी थान्बा परमप्रभुदा सेम निबा बास्ना खबा बलि तला। म्हे बहर तसै, चिप्बा ग्यु बोको तसै, ग्यु बोको तसै, रा योमो तसै चु जम्मान बलि फुल्बा धुइरी एसे चुह्रङ्नोन लसी फुल्गो। एनीगदेसे बलि फुल्बारी ठीक लबा जन्तुगदे गादे मुला, थे अन्छार अर्गु स्हेगदेएनोन छ्यामनोन फुल्गो।
“‘परमप्रभुला लागिरी फेसी थान्बा परमप्रभुदा सेम निबा बास्ना खबा बलि फुल्बा धुइरी इस्राएलीगदे जम्मासेन चुनोन ठिम अन्छार बलि फुल्गै। ओच्छे एनीगदेला गुङ्री तिगै धिनना लागिरी कोर्बारी खबा परदेशीगदे अथवा एनीगदेला सन्तानगदेदेन छ्याम चिबारी खबा परदेशीगदे न्हङ्ला खालै म्हिसे परमप्रभुला लागिरी फेसी थान्बा परमप्रभुदा सेम निबा बास्ना खबा बलि फुल्जी भिसम थेसेनोन एनीगदेसे ह्रङ्नोन लसी फुल्गै। ठिम चा एनीगदेदेन एनीगदेला गुङ्री चिबा परदेशीगदे जम्मालान लागिरी गिकनोन तगै। चु ठिम चा एनीगदेदेन एनीगदेला सन्तानगदेला लागिरी जुकजुकधोनान चिबा ठिम तगै। परमप्रभुला ओन्छाङ्री परदेशीगदेएनोन एनीगदे ह्रङ्बान तगै। एनीगदेदेन एनीगदेला गुङ्री चिबा परदेशीगदेला लागिरी ठिम चा गिकनोन तगै।’”1
परमप्रभुसे मोशादा चुह्रङ् भिसी सुङ्जी, “इस्राएलीगदेदा चुह्रङ् भिसी पाङ्गो, ‘ङाइ एनीगदेदा भोर्बारी छ्याइबा य्हुल्सारी एनीगदे दोमाहेन्से थे य्हुल्साला भु व्हारारी रोबा अन्न चबा धुइरी एनीगदेसे थे अन्नग्याम परमप्रभुला लागिरी तिगै भेटी फेसी फुल्गो। एनीगदेसे शुरूरी स्याङ्बा भ्राग्याम शुरूरी ख्राङ्बा गेङ चा खलाग्याम भबा छार अन्नला बलि फुल्बा ह्रङ्नोन लसी फुल्गो। एनीगदेसे शुरूरी स्याङ्बा भ्राग्याम पुस्ता पुस्ताधोनान परमप्रभुला लागिरी बलि फुल्गै।
“‘चुदे आसेना आघोना एनीगदे परमप्रभुसे मोशादा कुल्बा चु तामगदे न्हङ्ला खजिबै ताम गिक अन्छार आभ्रनी भिसम ओच्छे परमप्रभुसे शुरूहेन्से मोशाग्याम एनीगदेदा कुल्बा तामगदे न्हङ्ला खजिबै ताम गिक अन्छार एनीगदेदेन एनीगदेला सन्तान आभ्रनी भिसम ओच्छे आसेना आघोना थे गे खालैसेन था आयाङ्ना लबा चिम भिसम जम्मान इस्राएलीगदेसे मेरी ख्राङ्सी फुल्बा परमप्रभुदा सेम निबा बास्ना खबा बलि फुल्बाला लागिरी म्हे बहर गिक, अन्नबलिदेन अङ्गुरला निङ्गु ठिम अन्छार छ्यामनोन फुल्गो। होह्रङ् लसीन पापबलिला लागिरी बोको गिकएनोन बलि फुल्गो। चुह्रङ् लसी पूजाहारीसे जम्मान इस्राएलीगदेदा परमप्रभुदेन छ्याम ढिक्ना लगै। जमाहेन्से थेनीगदेला पाप माफ तला। तिग्दा भिसम थे गे चा आसेना आघोना लबा मुबा। ओच्छे थेनीगदेसे ह्राङसे लबा नाइबा गेला लागिरी परमप्रभुला लागिरी फेसी थान्बा पापबलि परमप्रभुदा फुल्बा मुला। चुह्रङ् लसी जम्मान इस्राएलीगदेदेन थेनीगदेला गुङ्री चिबा जम्मान विदेशीगदेसेनोन माफ याङ्ला। तिग्दा भिसम जम्मान म्हिगदेसे आसेना आघोना गल्ती लबा मुबा।
“‘चुदे आसेना आघोना खालै म्हि गिकसे पाप लजी भिसम थेसे पापबलिला लागिरी तिदिङ् तबा रा योमो गिक बलि फुल्गै।2 आसेना आघोना पाप लबा थे म्हिदा परमप्रभुदेन छ्याम ढिक्ना लबाला लागिरी पूजाहारीसे ठिम अन्छार परमप्रभुला ओन्छाङ्री लतोःबा जम्मान गे लगै। जमाहेन्से थेला पाप माफ तला। इस्राएलीगदेसे आसेना आघोना पाप लसै इस्राएलीगदेला गुङ्री चिबा विदेशीगदेसे आसेना आघोना पाप लसै एनीगदे जम्मालान लागिरी ठिम गिकनोन हिन्ना।
“‘तर जुन म्हिसे सेसी घोसी पाप लला, थे म्हि चा इस्राएली हिन्सै, विदेशी हिन्सै थेसे परमप्रभुदा बिरोध लबा हिन्ना। थेतबासेलमा थे म्हिदा थेला ह्राङलान म्हिगदेला गुङ्ग्याम तेःगै। तिग्दा भिसम थे परमप्रभुसे कुल्बा अन्छार आभ्रनी। ओच्छे परमप्रभुला बचनदाएनोन वास्ता आलनी। थेतबासेलमा थे म्हिदा थेला ह्राङलान म्हिगदेला गुङ्ग्याम तेःनोन तेःगै। ओच्छे थेसे ह्राङसे लबा पापला सजाय नागै।’”
ब्लप्बा न्हबा धिनना ठिम अन्छार आभ्रबा म्हि
तोङ्तोङ्बा ग्लारी मुबा धुइरीन ब्लप्बा न्हबा धिनकुनु इस्राएलीगदेसे सिङ म्हाइबान लबा म्हि गिकदा स्याप्जी। थेनीगदेसे थे म्हिदा चुङ्सी मोशा, हारूनदेन जम्मान इस्राएलीगदेला गुङ्री भजी। थे म्हिदा खाह्रङ्बा सजाय पिन्तोःला भिसी था आरेबासेलमा थेनीगदेसे थे म्हिदा च्युप्सी थान्जी। जमाहेन्से परमप्रभुसे मोशादा चुह्रङ् भिसी सुङ्जी, “थे म्हिदा साइनोन तोःला। थेदा पालगदे फ्रेङ्सी चिबा ग्लाग्याम मङ्ग्यार भोर्सी जम्मासेन युङ्बासे तोसी साइगै।” जमाहेन्से परमप्रभुसे मोशादा कुल्बा अन्छार थे म्हिदा पालगदे फ्रेङ्सी चिबा ग्लाग्याम मङ्ग्यार भोर्जी। ओच्छे थेदा जम्मासेन युङ्बासे तोसी साइजी।
क्वानरी फुर्का कार्बा ठिम
परमप्रभुसे मोशादा दोःसी चुह्रङ् भिसी सुङ्जी, “इस्राएलीगदेदा चुह्रङ् भिसी पाङ्गो, ‘थेनीगदेसे पुस्ता पुस्ताधोनान ह्राङ ह्राङला क्वानना जोला कुनी ब्लिरी हापिङ छोन्ना फुर्का कार्गै।3 थे फुर्कादा म्राङ्मै छ्याम परमप्रभुसे कुल्बा जम्मान तामगदेदा एनीगदेसे ढन्ना। जमाहेन्से परमप्रभुसे कुल्बा थे तामगदे अन्छार एनीगदे भ्रखम्ला। ओच्छे एनीगदेदा ह्राङला सेमदेन मीग्याम खबा लोभला लिच्छा भ्रसी आज्यबा ग्यामरी भ्रआपुङ्। ङाइ कुल्बा जम्मान तामगदे अन्छार भ्रबाला लागिरी एनीगदेदा थेनोन फुर्कासे ढन्ना लला। ओच्छे एनीगदे ङालान म्हि दोला। परमप्रभु एनीगदेला परमेश्वर ङानोन हिन्ना। एनीगदेला परमेश्वर दोबाला लागिरी एनीगदेदा मिश्र य्हुल्साग्याम ङाइनोन तेःसी भबा हिन्ना। परमप्रभु एनीगदेला परमेश्वर ङानोन हिन्ना।’”
Source notes (3)
- Cross-reference लेवी २४:२२
- Cross-reference लेवी ४:२७-३१
- Cross-reference ठिम २२:१२
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.