Eastern Tamang Language Bible
झ्याबा 1
वंश वंशला म्हिगदे झ्याबा
इस्राएलीगदे मिश्र य्हुल्साग्याम थोन्सी खबा न्ही दिङ्री वाङ्बा मुबा। थेनोन दिङ्ला ल न्हीला शुरूला धिनकुनु सीनै गङ्ला तोङ्तोङ्बा ग्लारी परमप्रभुसे मोशादेन छ्याम ह्रुप तबा पालरी चुह्रङ् भिसी सुङ्जी,1 “एदेन हारूनसे इस्राएलीगदेला मिन भ्रिबान जम्मान ह्रेम्फेबेगदे झ्यागो। थेनीगदेदा झ्यामा वंश वंशदेन म्हेमे म्हेमे अन्छार मिन भ्रिबान झ्यागो। बोगल गिक दिङ् तबादेन थे भन्दा तोरला लडाइ लबारी निखम्बा जम्मान ह्रेम्फेबेगदेदा समूह समूह स्होसी झ्यागो। एनीगदेदा ह्रो लबाला लागिरी जम्मान वंशग्याम मूल म्हि गिक गिक धम्गो।” हारूनदेन मोशादा ह्रो लबाला लागिरी वंश वंशग्याम धम्बा मूल म्हिगदेला मिन चुनोन हिन्ना,
“रूबेनना वंशग्याम शदेऊरला झा एलीसूर मुबा।
शिमियोनना वंशग्याम सूरीशद्दैला झा शलूमीएल मुबा।
यहूदाला वंशग्याम अम्मीनादाबला झा नहशोन मुबा।
इस्साखारला वंशग्याम सूआरला झा नतनेल मुबा।
जबूलूनना वंशग्याम हेलोनना झा एलीआब मुबा।
“योसेफला सन्तानग्याम धम्बा मूल म्हिगदे चुगदेन हिन्ना,
एफ्राइमला वंशग्याम अम्मीहूदला झा एलीशामा मुबा।
मनश्शेला वंशग्याम पदासूरला झा गमलिएल मुबा।
बेन्यामीनना वंशग्याम गिदेओनीला झा अबीदान मुबा।
दानना वंशग्याम अम्मीशद्दैला झा अहीएजेर मुबा।
आशेरला वंशग्याम ओक्रानना झा पगीएल मुबा।
गादला वंशग्याम दूएलला झा एल्यासाप मुबा।
नप्तालीला वंशग्याम एनानना झा अहीरा मुबा।”
इस्राएली न्हङ्ग्याम ह्राङ ह्राङला वंश अन्छार धम्बा मूल म्हिगदे चुगदेन मुबा।
मोशादेन हारूनसे ह्राङदा ह्रो लबाला लागिरी चुथोरी मिन मुबा म्हिगदेदा किन्जी। थेनोन म्हिगदेदेन छ्याम ह्रो किन्सी ल न्हीला शुरूला धिनकुनु जम्मान म्हिगदेदा ग्ला गिकरी ह्रुप लजी। ओच्छे जम्मालान वंश वंशदेन म्हेमे म्हेमे अन्छार बोगल गिक दिङ् तबा ह्रेम्बोकोलादेन थे भन्दा तोरला ह्रेम्बोकोलागदेलाएनोन मिन भ्रिजी। परमप्रभुसे कुल्बा अन्छार मोशासे सीनै गङ्ला तोङ्तोङ्बा ग्लारी जम्मान इस्राएलीगदेदा झ्याजी।
इस्राएलला थेबा झा रूबेनना सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा रूबेनना वंशग्याम ४६,५०० जना मुबा।
शिमियोनना सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुहङ् लसी मिन भ्रिमा शिमियोनना वंशग्याम ५९,३०० जना मुबा।
गादला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा गादला वंशग्याम ४५,६५० जना मुबा।
यहूदाला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा यहूदाला वंशग्याम ७४,६०० जना मुबा।
इस्साखारला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा इस्साखारला वंशग्याम ५४,४०० जना मुबा।
जबूलूनना सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा जबूलूनना वंशग्याम ५७,४०० जना मुबा।
योसेफला झा एफ्राइमला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा एफ्राइमला वंशग्याम ४०,५०० जना मुबा।
योसेफला झा मनश्शेला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा मनश्शेला वंशग्याम ३२,२०० जना मुबा।
बेन्यामीनना सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा बेन्यामीनना वंशग्याम ३५,४०० जना मुबा।
दानना सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा दानना वंशग्याम ६२,७०० जना मुबा।
आशेरला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा आशेरला वंशग्याम ४१,५०० जना मुबा।
नप्तालीला सन्ताननाएनोन बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेला मिन भ्रिजी। थेनीगदेला मिन भ्रिमा थेनीगदेला वंशदेन म्हेमे अन्छार मिन भ्रिबा मुबा।
चुह्रङ् लसी मिन भ्रिमा नप्तालीला वंशग्याम ५३,४०० जना मुबा।
मोशा, हारूनदेन इस्राएलला च्युक न्ही वंशला मूल म्हिगदेसे ह्राङ ह्राङला म्हेमे अन्छार झ्याबा जम्मान म्हिगदे चुगदेन हिन्ना। थेनीगदेसे ह्राङ ह्राङला म्हेमे अन्छार बोगल गिक दिङ् तबादेन थे भन्दा तोरला लडाइ लबारी खम्बा जम्मान ह्रेम्फेबेगदेदा झ्याबा मुबा। चुह्रङ् लसी झ्यामा थेनीगदे ६,०३,५५० जना तबा मुबा।
लेवी वंशला म्हिगदेदा चा अर्गु वंशला म्हिगदेदेन छ्याम आझ्यानी। तिग्दा भिसम परमप्रभुसे मोशादा चुह्रङ् भिसी सुङ्बा मुबा, “एसे इस्राएलीगदेदा झ्यामा लेवी वंशला म्हिगदेदा चा आझ्यागो। तर एसे लेवीगदेदा ङा चिबा चोखो पालदेन थेला जम्मान सामानगदे च्याबारी जिम्मा पिन्गो। ङा चिबा चोखो पालदेन थेला सामान थेनीगदेसेन पुइला। ओच्छे थेरी लतोःबा जम्मान गे थेनीगदेसेन लला। ओच्छे थेनीगदेसे ह्राङ चिबा पालएनोन ङा चिबा चोखो पालला क्यारक्युरनोन फ्रेङ्सी चिगै। एनीगदेसे ङा चिबा चोखो पाल अर्गु ग्लारी ल्हेमा लेवीगदेसेन ल्हेगै। ओच्छे अर्गु ग्लारीनोन लेवीगदेसेन फ्रेङ्गै। ङा चिबा चोखो पालला ङाम्री लेवीगदे बाहेक अर्गु खालै म्हि खजी भिसम थे म्हिदा साइगै। अर्गु इस्राएलीगदे चा ह्राङ ह्राङला वंशदेन छ्यामनोन चिगै। ओच्छे थेनीगदेसे ह्राङ ह्राङलान वंशला झण्डाला क्यारक्युर पाल फ्रेङ्सी चिगै। तर लेवीगदेसे चा ङा चिबा पालला क्यारक्युरनोन पाल फ्रेङ्सी चिगै। तिग्दा भिसम इस्राएलीगदे ङाला बोमोरी परब आतगै। ओच्छे ङा चिबा चोखो पालला जम्मान गे लेवीगदेसेन लगै।”
इस्राएलीगदेसेनोन परमप्रभुसे मोशादा कुल्बा जम्मान ताम अन्छार लजी।
Source notes (1)
- Cross-reference झ्याबा २६:१-५१
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.