Eastern Tamang Language Bible
नहे 8
परमेश्वसे मोशा पिन्बा ठिम एज्रासे पढब लसी थेःना लबा
ल निस तमा इस्राएलीगदे ह्राङ ह्राङला सहरगदेरी चिसी जिन्बा मुबा। थे लला शुरूला धिनकुनु जम्मान म्हिगदे क्युइ मूल म्रापला ङाच्छापट्टिला ख्राङ्गारी सेम गिकनोन तसी ह्रुप तजी। धर्मगुरु एज्रादा परमप्रभुसे मोशादा पिन्बा ठिमला किताब भउ भिसी थेनीगदेसे पाङ्जी। जमाहेन्से पूजाहारी एज्रासे म्हिगदे ह्रुप तबा ग्लारी ठिमला किताब भसी खजी। थेरी ह्रेम्फेबेदेन म्रिङ्म्हेमे ओच्छे पाङ्बा ताम घोखम्बा छामे भ्योनगदे जम्मान मुबा। ओच्छे क्युइ म्रापला ङाच्छापट्टिला ख्राङ्गापट्टि दोःसी एज्रासे थे ठिमला किताब स्य्होहेन्से धिनी गङ्सलधोना ह्रेम्फेबेदेन म्रिङ्म्हेमे ओच्छे पाङ्बा ताम घोखम्बा जम्मालान ओन्छाङ्री पढब लसी थेःना लजी। ओच्छे थेरी मुबा जम्मान म्हिगदेसे औदिन सेम लसी ङ्यन्जी।
चुह्रङ् लसी परमेश्वरला ठिम पढब लसी थेःना लबाला लागिरी थेरी सिङला नोबा ग्ला गिक स्होबा मुबा। थे सिङला नोबा ग्लारी धर्मगुरु एज्रा राप्सी चिबा मुबा। एज्राला दाहिने यापट्टि ङाम्रीन मत्तित्याह, शेमा, अनायाह, उरियाह, हिल्कियाहदेन मासेयाह राप्बा मुबा, ओच्छे देब्रेपट्टि चा पदायाह, मीशाएल, मल्कियाह, हाशूम, हशबदाना, जकरियादेन मशुल्लाम राप्बा मुबा। जमाहेन्से थेरी मुबा जम्मान म्हिगदेसे एज्रादा म्राङ्खम्जी। तिग्दा भिसम एज्रा थेनीगदे भन्दा नोबा ग्लारी राप्बा मुबा। ओच्छे एज्रासे ठिमला किताब ठोङ्माहेन्से थेरी मुबा जम्मान म्हिगदेएनोन ह्राङ ह्राङला ग्लारी राप्जी। एज्रासे “परमप्रभु जम्मान भन्दा घ्रेन परमेश्वरला जयजयकार लउ!” भिसी पाङ्जी। जमाहेन्से जम्मान म्हिगदेसे ह्राङ ह्राङला या थीसी “आमेन, आमेन” भिसी पाङ्जी। ओच्छे थेनीगदेसे पुइ जुसी परमप्रभुदा फ्या लजी।
जमाहेन्से थेरी मुबा जम्मान म्हिगदे ह्राङ ह्राङला ग्लारी राप्सी चिबा धुइरीन येशूअ, बानी, शरेबियाह, यामीन, अक्कूब, सब्बतै, होदियाह, मासेयाह, कलीता, अजर्याह, योजाबाद, हानान, पलयाह मिन लबा लेवीगदेसे चा परमेश्वरला ठिमला बारेरी थेनीगदेदा ज्यना लसी घोना लजी। थे लेवीगदेसे परमेश्वरला ठिमला किताब ज्यना लसी पढब लजी, ओच्छे ठिमला किताबरी भ्रिबा तामला अर्थ म्हिगदेसे घोखम्बा सजिलो ग्योइरी1 ज्यना लसी घोना लजी।
थेरी मुबा जम्मान म्हिगदे ठिमरी मुबा तामगदे थेःसी क्राबान मुबा। जमाहेन्से शासन लबा म्हि नहेम्याह, पूजाहारी धर्मगुरु एज्रा, ठिमरी मुबा तामगदे लोप्बान लबा लेवीगदेसे थेरी मुबा जम्मान म्हिगदेदा चुह्रङ् भिसी पाङ्जी, “तिनीला धिन चा परमप्रभु एनीगदेला परमेश्वरला लागिरी चोखो धिन हिन्ना। थेतबासेलमा सुर्दा आलउ, ओच्छे क्राबा क्रिङ्बा आलउ।” जमाहेन्से नहेम्याहसे थेनीगदेदा चुह्रङ् भिसी पाङ्जी, “दाहेन्से एनीगदे ह्राङ ह्राङला दिमरी निउ, ओच्छे ब्रोइ खबा चबा स्हेदेन ज्यबा ज्यबा अङ्गुरला निङ्गु चबा थुङ्बा लउ। ओच्छे ह्राङला लागिरी तोःबा चु जम्मान स्हे ठीक लबारी आखम्बागदेदाएनोन भो पुइगो। तिग्दा भिसम तिनीला धिन चा य्हाङला परमप्रभुला लागिरी चोखो धिन हिन्ना। थेतबासेलमा सुर्दा आलउ। तिग्दा भिसम परमप्रभुग्याम खबा ताङ्बा तामनोन एनीगदेला लागिरी भङ हिन्ना।”
लेवीगदेसे चुह्रङ् भिसी म्हिगदेला सेम सन्तोक तना लजी, “सुर्दा आलना कुटिसी चिउ, तिग्दा भिसम तिनीला धिन चोखो धिन हिन्ना।” जमाहेन्से जम्मान म्हिगदेसे ह्राङदेन छ्याम मुबा स्हेगदे आरेबागदेदाएनोन भो लसी पिन्बान चबा थुङ्बा लसी ताङ्सी ताङ्सी चाड धङ्बारी छ्याइजी। तिग्दा भिसम ठिम पढब लसी थेःना लबा जम्मान तामगदे थेनीगदेसे ज्यना लसी घोबा मुबा।
न्हङ्गरदाङ चा परमेश्वरसे मोशादा पिन्बा ठिम ज्यना लसी पढब लसी घोबाला लागिरी वंश वंशला मूल म्हिगदे, पूजाहारीगदेदेन लेवीगदे धर्मगुरु एज्रा मुबा ग्लारी ह्रुप तजी। ल निसरी धङ्बा चाडला धुइरी चा परमेश्वरसे मोशादा पिन्बा ठिम अन्छार छाप्रोरी चिसी चाड धङ्गो भिसी परमप्रभुसे मोशाग्याम कुल्बा ताम थेनीगदेसे था याङ्जी। जमाहेन्से यरूशलेमदेन अर्गु जम्मान सहरगदे नाङ्नोन चु ताम थेःना लतोःला भिसीएनोन थेनीगदेसे ठिमग्याम था याङ्जी, “गङ् गङ्री निसी व्हारारी सूबा जैतूनना हाँगा, ह्रि जैतूनना हाँगा, मेहदीला हाँगा, खजूरला हाँगादेन अर्गु दोङगदेला हाँगागदे भसी परमेश्वरसे मोशादा पिन्बा ठिम अन्छार छाप्रो स्होउ।”
थेतबासेलमा म्हिगदे निसी हाँगागदे भजी। ओच्छे जम्मासेन ह्राङ ह्राङला दिमथोरी, दिमला ख्राङ्गारी, परमेश्वरला मन्दिरला ख्राङ्गागदेरी, क्युइ म्रापला ङाच्छापट्टिला ख्राङ्गारीदेन एफ्राइम म्रापला ख्राङ्गारी ह्राङ ह्राङला लागिरी छाप्रो स्होजी। बेबिलोन य्हुल्साला तहग्याम फेसी खबा म्हिगदे जम्मासेन ह्राङ ह्राङला लागिरी छाप्रो स्होसी चिजी। नूनना झा यहोशूला धुइहेन्से तिनीला धिनकुनुधोना इस्राएलीगदेसे चुह्रङ् लसी ताङ्सी ताङ्सी चाड धङ्बा आरेमुबा। थेतबासेलमा म्हिगदे ल्हानान ताङ्बा मुबा। चाडला शुरूला धिनकुनुहेन्से चाड जिन्बा धिनकुनुधोनान एज्रासे धिन धिननोन परमेश्वरला ठिमला किताबग्याम भो गिक गिक पढब लजी। चुह्रङ् लसी थेनीगदेसे निसरेधोना चाड धङ्माहेन्से भ्रेरेकुनु चा ठिम अन्छार थेनीगदे जम्मान ग्ला गिकरी ह्रुप तसी घ्रेन भोज लजी।
Source notes (1)
- Footnote घोखम्बा सजिलो ग्योइरी बेबिलोनरी चिमा हिब्रू ग्योइ म्लेःबासेलमा आरामीक ग्योइरी घोना लबा मुबा।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.