Eastern Tamang Language Bible
मीका 7:18
Verse 18 is marked below, with the whole chapter around it. Read from the start
इस्राएलीगदेसे नाबा दुख
ङाथोरी चु खाह्रङ्बा दुख खजी!
ङा चा चआम्याङ्बा फोइथाननोन भ्रबा म्हि ह्रङ्बान तबा मुला।
चबाला लागिरी अङ्गुरएनोन आरे,
ओच्छे अञ्जीरएनोन आरे।
ङा चा अङ्गुरदेन अञ्जीर थुसी जिन्बा व्हारारी शिलो म्हाइबा म्हि ह्रङ्बान तबा मुला।
होह्रङ् लसीन चु य्हुल्सारी सोझो म्हि गिकएनोन सोबा आरे,
ओच्छे परमेश्वरदा तेन्बा म्हिएनोन खालै आरे।
जम्मान म्हिगदे चा खाह्रङ् लसी अर्गुदा साइम्याङ्ला भिसी दाउ च्यासी चिमुला,
ओच्छे ह्राङलान ज्योज्यो आलेदा साइबारी वा जुसी चिमुला।
म्हिगदे नाइबा गे लबारी सिपालु मुला।
शासन लबा म्हिदेन निसाफ लबा म्हिसे घूस किन्बारी म्हाइमुला।
ओच्छे घ्रेन घ्रेन म्हिगदेसे ह्राङदा तिग लइ म्हन्जी थेनोन लमुला।
थेनीगदे जम्मान ढिक्सी आतोःबा जुक्ति तेःमुला।
थेनीगदे न्हङ्ला जम्मान भन्दा ज्यबादेन सोझो म्हिगदेएनोन पुजुला झाङ भन्दाएनोन आज्यबा मुला।
परमेश्वरसे ह्राङला म्हिगदेला निसाफ लबा धुइ खबारी छ्याइबा मुला।
चु तामला बारेरी परमेश्वरसे अगमवक्तागदेग्याम ङाच्छान होशियार तना लसी जिन्बा मुबा।
दाहेन्से थेनीगदेला सेम कालकोल तना लबा तामसे प्लिङ्बान मुला।
एनीगदेसे ह्राङला खिम्जेमदेन ह्रोथोरी भर आलउ।
ओच्छे ह्राङलान म्रिङ ह्रेम्बो न्हङ्रीनोन तिग ताम पाङ्तोःबा होशियार तसी पाङ्गो।
थे धुइरी ह्राङलान दिमला म्हिगदे शत्रु दोला।
तिग्दा भिसम झागदेसे ह्राङलान आबादा मान आल।
झामेगदेसे ह्राङलान आमाला बिरोध लला,
ओच्छे चाङ्गदेसे ह्राङलान स्युमीदेन छ्याम छेबा भङ्बा लला।
तर ङाइ चा परमप्रभुथोरी भर लसी परमप्रभुलान ग्याम च्यासी चिला।
थेसेन ङादा जोगब लला।
ङाला परमेश्वरसे ङाला बिन्ती सान्ना।
परमप्रभुसे इस्राएलदा जोगब लला
शत्रुगदे, ङनी ह्रिल्जी भिदेमा एनीगदे ताङ्बान ङन्दा च्यासी आचिउ।
दन्दे ङनी ह्रिल्बा मुला,
तर ङनी दोःसी रेःला।
दन्दे ङनी धोपधोपरी मुला,
तर परमप्रभु चा ङन्ना य्हाल दोला।
ङन्से परमप्रभुला बोमो नाला, तिग्दा भिसम ङन्से परमप्रभुला बिरोध लसी पाप लबा मुला।
तर ङनीपट्टि तसी ताम लबान परमप्रभुसे योनना ङन्ना निसाफ लला।
जमाहेन्से परमप्रभुसे ङन्दा धोपधोपग्याम तेःसी य्हाल य्हालरी भोर्ला, ओच्छे परमप्रभुसे लबा ठीक गे ङन्से म्राङ्ला।
थे म्राङ्सी य्हाङला शत्रुगदे पेःला।
थेनोन शत्रुगदेसे य्हाङदा “एनीगदेला परमप्रभु परमेश्वर खइ?” भिसी पाङ्मुबा।
दाहेन्से थेनीगदे ब्रेबा य्हाङसे च्याला,
जमाहेन्से थेनीगदेदा ग्यामरी क्यारला हिलोदा ह्रङ् लसीन नाङ्बाझ्याक्बा लला।
चु जम्मान ताम य्हाङसे य्हाङलान मीसे म्राङ्ला।
यरूशलेमला म्हिगदे, दोःसी एनीगदेला सहरला पर्खाल स्होबा धुइ खबान मुला।
थे धुइरी एनीगदेला य्हुल्साला साँधएनोन बढब तला।
थे धुइरी स्यारपट्टिला अश्शूर य्हुल्साग्याम, लोपट्टिला मिश्र य्हुल्साग्याम,
यूफ्रेटिस स्योङ् ङाम ङाम्ला ग्लागदेग्याम,
थारेङ् थारेङ्ला समुद्रदेन गङ्गदेग्याम म्हिगदे एनीगदे मुबा ग्लारी खला।
तर चु जम्बुलिङरी चिबा म्हिगदेसे लबा नाइबा गेसे लमा जम्बुलिङ तोङ्तोङ्बा ग्ला दोला।
परमप्रभुसे इस्राएलगदेदा दया लला
परमप्रभु, ह्राङसे धम्बा ह्राङला म्हिगदेदा गोठालोसे ह्रङ्नोन लसी वास्ता लबान ज्यना लसी थोगो।
हिन्बाम, थेनीगदे ह्राङग्याम थारेङ् तसी तोङ्तोङ्बा ग्लारी छुट्टोन चिबा मुला।
थेनीगदे चिबा ग्लाला क्यारक्युर चा ल्हानान ज्यबा ग्ला मुला।
थेनीगदे ओन्मा बाशानदेन गिलादरी पिङ्पिङ्बा छे मुबा चेरी ग्युगदे ढुक्क तसी चिबा ह्रङ्नोन लसी चबा थुङ्बा लसी चिगै।
परमप्रभुसे चुह्रङ् भिसी सुङ्जी,
“एनीगदे मिश्र य्हुल्साग्याम थोन्सी खबा धुइरी लबा ह्रङ्नोन लसी ङाइ उदेकला गे लसी य्हुल य्हुल्ला म्हिगदेदा उन्ना।”
य्हुल य्हुल्ला म्हिगदे भङ्बा मुसैनोन परमप्रभुसे लबा उदेकला गे म्राङ्सी पेःला।
ओच्छे आत्यब तबान थेनीगदेसे ह्राङला सुङ्देन नाब्यङ् यासे घप्ला।
पुख्रीदेन सरी सुल्सी भ्रबा जन्तुसे ह्रङ्नोन लसी थेनीगदेसे साप्रा ल्हेम्ला।
ओच्छे लोङ्सी फितफित धर्बान थेनीगदे ह्राङ ह्राङला ऊग्याम मङ्ग्यार थोन्ना।
ओच्छे परमप्रभु य्हाङला परमेश्वरदेन छ्याम लोङ्सी थेनीगदे परमप्रभु मुबा ग्लारी खला।
थेनीगदे एनीगदेदेन छ्यामएनोन लोङ्ला।
ह्राङ ह्रङ्बा परमेश्वर अर्गु खालैनोन आरे।
ह्राङ सोसी चिबा ह्राङला म्हिगदेला पाप माफ लबा परमेश्वर हिन्ना।
ह्राङ सदन बोमो खबा परमेश्वर आहिन।
तर ह्राङ ङन्दा खाइमै आजिन्बा माया लसी ताङ्बा परमेश्वर हिन्ना।
परमप्रभु, ह्राङसे ङन्दा दोःसीनोन दया लला।
ओच्छे ङन्से लबा पापदा ह्राङसे ह्राङला स्य्हाबसे नाङ्सी समुद्रला नुप्बा ग्लारी भ्याङ्ला।
ह्राङसे ल्हानान धुइ ङाच्छा ङन्ना आखेम्हेमे याकूब, अब्राहामदेन छ्याम कबुल लबा मुबा।
थे कबुल अन्छार ह्राङसे याकूबदेन अब्राहामला सन्तानगदेदा ह्राङला खाइमै आजिन्बा माया उन्ना।
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.