Eastern Tamang Language Bible
मत्ती 24
परमेश्वरला मन्दिर नाश तला
मर्कू १३:१-२; लूका २१:५-६
जमाहेन्से येशू परमेश्वरला मन्दिरग्याम थोन्सी फेप्बारी छ्याइमा येशूला चेलागदे परमेश्वरला मन्दिरला दिमगदे उन्बारी भिसी येशूला ङाम्री खजी। तर येशूसे थेनीगदेदा चुह्रङ् भिसी सुङ्जी, “एनीगदेसे चु जम्मान म्राङ्बा मुला आहिन? च्यागो, एनीगदेसे ङाला ताम ङ्यन्गो, चु मन्दिरला युङ्बा गिकनोन बाँकी आचिना जम्मान फुप्ला।”
जम्बुलिङ नाश तबा धुइला चिनुगदे
मर्कू १३:३-१३; लूका २१:७-१९
येशू जैतून गङ्री धन्छ्याबा धुइरी येशूला चेलागदे सुटुक्क खसी चुह्रङ् भिसी पाङ्जी, “ह्राङसे सुङ्बा चु तामगदे खाइमा तला? ओच्छे ह्राङ फेप्खबा धुइदेन परमेश्वरसे जम्बुलिङला जम्मान म्हिगदेला निसाफ लबा धुइरी खाह्रङ्बा चिनु म्राङ्ला? ङन्दा सुङ्गो।”
येशूसे थेनीगदेदा चुह्रङ् भिसी सुङ्जी, “एनीगदे होशियार तसी चिउ, एनीगदेदा खालैसेन झुक्याब आलगै। तिग्दा भिसम ल्हानान म्हिगदे ङाला मिन किन्सी ‘ङानोन थार्बा पिन्बा ख्रीष्ट हिन्ना’ भिसी खला। ओच्छे ल्हानान म्हिदा झुक्याब लला। एनीगदेसे लडाइदेन लडाइला हल्लागदे थेःला। तसैनोन एनीगदे आलोङ्गो, तिग्दा भिसम चु तनोन तोःबा हिन्ना। तर थेनोन धुइरी चा चु जम्बुलिङ नाश आत। तिग्दा भिसम म्हि य्हुल्ला बिरोधरी म्हि य्हुलनोन ओच्छे य्हुल्साला बिरोधरी य्हुल्सा रेःला। चुह्रङ् तसी ग्ला ग्लारी अनिकाल तबादेन सङ्गुल निला। चु जम्मान ताम मि कोला न्हसेला म्रिङ्म्हेमेदा बेथासे थुर्बा ह्रङ्बा जे हिन्ना।
“थे धुइरी एनीगदेदा म्हिगदेसे चुङ्सी दुख पिन्सी साइला। ओच्छे ङादा विश्वास लबासेलमा एनीगदेदा जम्मान य्हुल्ला म्हिगदेसे हेला लला। थे धुइरी ल्हानान म्हिगदेसे ङादा विश्वास लबा ख्लाला। ओच्छे गिकसे स्य्हान्दोदा चुङ्सी म्हिगदेला यारी जिम्मा पिन्बादेन हेला लला। थे धुइरी ल्हानान फट्टा अगमवक्तागदे थोन्सी ल्हानान म्हिगदेदा झुक्याब लला। थेह्रङ् लसीन पाप गे ल्हानान तसी निबासेलमा ल्हानान म्हिसे स्य्हान्दोदा माया लबा ख्लाबान निला। तर जस्तोन दुख तसैनोन जुन म्हिसे ह्राङ आसिदेधोना ङादा विश्वास लसीन चिला, थेसे थार्बा याङ्ला।1 ओच्छे जम्बुलिङला जम्मान य्हुल्ला म्हिगदेसे परमेश्वरला य्हुल्साला समाचार थेःसी जिन्माहेन्से जे नाश तबा धुइ खला।
लोङ्बा खबा धुइ
मर्कू १३:१४-२३; लूका २१:२०-२४
“थेतबासेलमा दानिएल अगमवक्तासे पाङ्बा ह्रङ्नोन एनीगदेसे परमेश्वरला मन्दिरला चोखो ग्लारी नाश लबा नाइबा खबा स्हे म्राङ्ला।” चुला अर्थ पढब लबा म्हिसे घोगै।2 “थे धुइरी यहूदिया अञ्चलरी मुबा म्हिगदे गङ्रीक्यार य्हार्गै।3 ओच्छे कौसीरी मुबा म्हिगदे ह्राङला सामान किन्बारी मार फाप्सी दिम न्हङ्री आवाङ्गो। भु व्हारारी मुबागदे ह्राङला घ किन्बारी दोःसी दिमरी आनिउ।4 थे धुइरी जीउ न्हीला म्रिङ्म्हेमेदेन कोलादा ङ्हे ख्वाबा आमागदेदा झन गादे ल्हानान दुख तला! थेतबासेलमा खाङ्बा लदेन ब्लप्बा न्हबा धिनकुनु य्हार्आतोःगै भिसी एनीगदेसे प्रार्थना लउ। तिग्दा भिसम थे धुइरी तबा घ्रेन दुख जम्बुलिङ छ्यामाहेन्से दन्देधोना तबा आरे, ओच्छे लिच्छाएनोन खाइमै तसेला आरे।5 थेह्रङ्बा दुखला धिन परमेश्वरसे तुन्ना आलबा हिन्सम खालैसेन थार्बा आयाङ्सेला मुबा। तर परमेश्वरसे ह्राङसे धम्बा म्हिगदेला लागिरी थे धिन तुन्ना लसी पिन्ना।
“खालैसे एनीगदेदा ‘च्यागो, थार्बा पिन्बा ख्रीष्ट चुरी मुला,’ अथवा ‘थेरी मुला,’ भिसी पाङ्जी भिसम थेनीगदेला ताम विश्वास आलउ। तिग्दा भिसम फट्टा ख्रीष्टगदेदेन फट्टा अगमवक्तागदे थोन्ना। ओच्छे थेनीगदेसे खम्देधोना परमेश्वरसे धम्बा म्हिगदेदा झुक्याब लबाला लागिरी उदेकला घ्रेन चिनुगदेदेन उदेकला गेगदे लसी उन्ना। च्यागो, चु ताम ङाइ एनीगदेदा ङाच्छाहेन्सेन पाङ्सी पिन्बा मुला।
“थेतबासेलमा म्हिगदेसे एनीगदेदा ‘येशू तोङ्तोङ्बा ग्लारी मुला’ भिसी पाङ्जी भिसम एनीगदे थेरी आनिउ। ओच्छे ‘च्यागो, येशू मि कोठा न्हङ्री मुला’ भिसी पाङ्जी भिसैनोन एनीगदेसे थेनीगदेला ताम विश्वास आलउ। तिग्दा भिसम स्यारपट्टि तिप्लीङ् खमा न्हुपधोना य्हाल तबा ह्रङ् लसी परमेश्वरसे पुइखबा म्हिएनोन थेह्रङ् लसीन खला।6
“जुन ग्लारी सिबा जन्तु मुला, थेरी गिद्धागदे पोप तमुला। 7
परमेश्वरसे पुइखबा म्हि फेप्खबा धुइ
मर्कू १३:२४-२७; लूका २१:२५-२८
“थेह्रङ्बा दुखला धिन खमैछ्याम,
“‘धिनीसे य्हाल पिन्बा ख्लाला
ओच्छे लनीला य्हाल म्हला।
जमाहेन्से मुला शक्तिगदे य्हाङ्य्होङ् तसी
सुक्र सार जम्मान ताइला।’ 8
चुह्रङ् तमाहेन्से मुरी परमेश्वरसे पुइखबा म्हि खबान लबा चिनु गिक म्राङ्ला। ओच्छे परमेश्वरसे पुइखबा म्हिदा स्वर्गला खसुरी शक्तिदेन घ्रेन य्हाल य्हालरी खबा म्राङ्सी जम्बुलिङरी मुबा जम्मान य्हुल्ला म्हिगदे क्राबा क्रिङ्बा लला। 9 बिगुलला घ्रेन काइदेन छ्याम थेसे स्वर्गदूतगदेदा जम्बुलिङदेन मुला जम्मान ग्लारी पुइला। जमाहेन्से थे स्वर्गदूतगदेसे परमेश्वरसे धम्बा जम्मान म्हिगदेदा ग्ला गिकरी पोप लला।
अञ्जीरला दोङ च्यासी लोप्तोःबा ताम
मर्कू १३:२८-३१; लूका २१:२९-३३
“एनीगदेसे अञ्जीरला दोङदा च्यासी थेग्याम तिगै ताम लोप्गो। थेला हाँगागदेरी भा भुमैछ्याम छेप्बा छबा ल वाङ्जी भिसी एनीगदेसे था याङ्मुला। थेह्रङ् लसीन ङाइ पाङ्बा जम्मान तामगदे तबा म्राङ्माहेन्से परमेश्वरसे पुइखबा म्हि खबा धिन खसी जिन्जी भिबा ताम एनीगदेसे था याङ्गो। च्यागो, एनीगदेसे ङाला ताम ङ्यन्गो, चु जम्मान ताम पूरा आतदेधोना दन्देला म्हिगदे आसि। मुदेन जम्बुलिङ म्हासी निसैनोन ङाला बचन खाइमै आम्हा।
सदन होशियार तसी चिउ
मर्कू १३:३२-३५; लूका १७:२६-२७,३४-३५
“थे दुखला धिनदेन धुइ खाइमा खला भिसी स्वर्गदूतदाएनोन था आरे, ओच्छे परमेश्वरला झादाएनोन था आरे। थे ताम परमेश्वर आबादा जे था मुला। ओन्मा नोआला धुइरी तबा ह्रङ्नोन परमेश्वरसे पुइखबा म्हि दोःसी खबा धुइरीनोन तला।10 तिग्दा भिसम नाम खसी भाल बाढी खबा भन्दा ङाच्छा नोआ पानी जहाजरी वाङ्बा धिनकुनुधोना म्हिगदे चबा थुङ्बादेन ब्याह लबान मुबा। ओच्छे नाम खसी भाल बाढीसे आभोर्देधोना थेनीगदेसे तिग तला भिसी था आयाङ्नी। परमेश्वरसे पुइखबा म्हि खमाएनोन थेह्रङ्नोन तला।11 थे धुइरी भु व्हारारी गे लसी चिबा म्हि न्ही न्हङ्री गिकदा भोर्ला, गिकदा थेरीन ख्लाला। थेह्रङ् लसीन ह्रान्दारी भ्रा स्याङ्सी चिबा म्रिङ्म्हेमे न्ही न्हङ्री गिकदा भोर्ला, गिकदा थेरी ख्लाला।
“थेतबासेलमा एनीगदे होशियार तसी छोर्सी चिउ। तिग्दा भिसम एनीगदेला प्रभु खाइमा फेप्खला भिबा ताम एनीगदेदा था आरे। तर एनीगदेसे चु तामएनोन था याङ्गो, दिमला म्हिसे य्हो खबा धुइ था याङ्सम थे छोर्सी चिला, ओच्छे थेसे ह्राङला दिम न्हङ्री य्हो वाङ्आपुङ्। थेतबासेलमा एनीगदेएनोन होशियार तसी छोर्सी चिउ। तिग्दा भिसम परमेश्वरसे पुइखबा म्हिएनोन एनीगदेसे आम्हन्बा धुइरी खला।12
ज्यबा गे लबा नोकरदेन नाइबा गे लबा नोकर
लूका १२:४२-४६
“दिमरी गे लबा बुद्धि मुबादेन भर्तुप्पा म्हि खाला हिन्ना? मालिकसे दिमला स्य्हान्दो नोकरगदेदा ठीक ठीक धुइरी चबा थुङ्बा ढिक्ना लसी पिन्बारी जिम्मा पिन्थान्जी। मालिक दोःसी खबा धुइरीनोन थेसे मालिकसे कुल्सी थान्बा ह्रङ् लसी गे लबा म्राङ्जी भिसम इनाम याङ्बा नोकर थेनोन हिन्ना। च्यागो, एनीगदेसे ङाला ताम ङ्यन्गो, मालिकसे थेह्रङ्बा नोकरदा ह्राङला जम्मान धन सम्पत्ति जिम्मा पिन्ना। तर थे नाइबा गे लबा नोकरसे ‘ङाला मालिक योनान आख’ भिसी म्हन्सी ङ्य्होइबा म्हिगदेदेन छ्याम चिसी चबा थुङ्बा लसी ह्राङदेन छ्यामनोन गे लबा नोकरगदेदा तोबा ग्याङ्बा लजी भिसम थेला मालिक थेसे आम्हन्बा धिनदेन धुइरी दोखला। जमाहेन्से मालिकसे थेदा ल्हानान सजाय पिन्सी कप्टी म्हिगदे मुबा ग्लारी भ्याङ्ला। थेरी चा जम्मान म्हिगदे स्वा क्रेसी क्रेसी क्राबा क्रिङ्बा लसी चिला।”
Source notes (12)
- Cross-reference मत्ती १०:२२
- Cross-reference दानि ९:२७; ११:३१; १२:११
- Footnote ईस्वी संवत् ७० सालरी रोमी सिपाहीगदेसे यरूशलेम सहर ह्राङला यारी किन्बा भन्दा ङाच्छा ल्हानान ख्रीष्टियानगदेदा येशूसे होशियार तना लबारी चु ताम सुङ्बा हिन्ना। थे धुइरी ल्हानान म्हिगदे यर्दन स्योङ्ला स्यार झ्याङ्पट्टिला डेकापोलिस अञ्चलरी य्हार्जी।
- Cross-reference लूका १७:३१
- Cross-reference दानि १२:१; उन्बा ७:१४
- Cross-reference लूका १७:२३-२४
- Cross-reference लूका १७:३७
- Cross-reference यशै १३:१०; ३४:४; इज ३२:७; योए २:१०-३१; ३:१५; उन्बा ६:१२-१३
- Cross-reference दानि ७:१३; जक १२:१०-१४; उन्बा १:७
- Cross-reference ठुङ् ६:५-८
- Cross-reference ठुङ् ७:६-२४
- Cross-reference लूका १२:३९-४०
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.