Eastern Tamang Language Bible
मर्कू 15
येशूदा पिलातसला ङाच्छापट्टि भोर्बा
मत्ती २७:१-२,११-२६; लूका २३:१-३,१८-२५; यूह १८:२८-४०; १९:१६
स्य्होरीन मूल पूजाहारीगदेदेन यहूदी गन्बागदे ओच्छे थेरी मुबा यहूदी धर्मगुरुगदेदेन छ्याम जम्मान म्हिगदेसे सल्लाह लजी। ओच्छे थेनीगदेसे येशूदा खीसी रोमी शासन लबा म्हि पिलातस मुबा ग्लारी भोर्सी जिम्मा पिन्जी।
जमाहेन्से पिलातससे येशूदा “तिग ए यहूदीगदेला ग्ले हिन्ना?” भिसी ङ्योइमा, येशूसे थेदा “थे मि ह्राङसेन सुङ्बा मुला” भिसी जोहाब पिन्जी। मूल पूजाहारीगदेसे येशूदा ल्हानान तामरी दोष लबाला लबान लजी। थेतबासेलमा पिलातससे येशूदा दोःसी चुह्रङ् भिसी ङ्योइजी, “एला तिगै जोहाब आरे? च्यागो, थेनीगदेसे एला बिरोध लसी एदा ल्हानान दोष लबान मुला।” तर येशूसे तिगै जोहाब आपिन्नी। चु म्राङ्सी पिलातस उदेक तजी।
मिश्र य्हुल्साग्याम फेसी खबा धिनदा ढन्सी धङ्बा चाडला धुइरी पिलातससे म्हिगदेसे धम्बा झ्याल्खानरी मुबा म्हि गिकदा पुइमुबा। थे धुइरी बारब्बा भिबा आज्यबा गे लबा म्हि गिक झ्याल्खानरी मुबा। थेसे आन्दोलनरी म्हि साइबा मुबा। ओच्छे म्हिला हुल खसी पिलातसदा चुह्रङ् भिसी पाङ्जी, “निबा दिङ्री ह्रङ् चु पाल्सेनोन झ्याल्खानरी मुबा म्हि गिकदा पुइसी पिन्गो।” म्हिगदेसे चुह्रङ् पाङ्माहेन्से पिलातससे चुह्रङ् भिसी ङ्योइजी, “ङाइ चु यहूदीगदेला ग्लेदा ख्लासी पिन्गै भिसी एनीगदेसे म्हन्बा मुला?” तिग्दा भिसम मूल पूजाहारीगदेसे डाह लसी येशूदा ह्राङ मुबा ग्लारी भबा हिन्ना भिबा ताम पिलातसदा था मुबा।
तर मूल पूजाहारीगदेसे स्य्हान्दो म्हिगदेदा थीसी “येशूदा आहिन, बारब्बादा ख्लासी पिन्गो!” भिसी पाङ्पुङ्जी। ओच्छे पिलातससे “चु यहूदीगदेला ग्ले भिबा म्हिदा ङाइ तिग लउ?” भिसी ङ्योइमा, “चुदा क्रूसरी टाँगब लसी साइगो!” भिसी यहूदीगदे क्रिङ्बारी छ्याइजी।
पिलातससे चुह्रङ् भिसी ङ्योइजी, “तिग्दा? चुसे थेह्रङ्बा आज्यबा गे तिग लबा मुला?”
तर थेनीगदेसे झन क्रिङ्बान, “चुदा क्रूसरी टाँगब लसी साइगो” भिसी पाङ्जी।
पिलातसदा थे म्हिला हुलदा ताङ्ना लबा सेम मुबा। थेतबासेलमा थेसे बारब्बादा पुइजी। तर येशूदा चा कोर्रासे तोसी क्रूसरी टाँगब लसी साइबाला लागिरी रोमी सिपाहीगदेदा जिम्मा पिन्जी।
सिपाहीगदेसे येशूदा खिसी लबा
मत्ती २७:२७-३१; यूह १९:२-३
जमाहेन्से सिपाहीगदेसे येशूदा सिपाहीगदेला हाकिम चिबा प्रेटोरियन भिबा दिम न्हङ्री भोर्जी। ओच्छे जम्मान सिपाहीगदेदा ङ्योइजी। ओच्छे थेनीगदेसे येशूदा ग्लेला ह्रङ्बान वालावाला पिङ्गै छोन्ना क्वान क्वान्सी पिन्जी। ओच्छे थेनीगदेसे पुजुला फेटा स्होसी येशूदा थोइसी पिन्जी। जमाहेन्से थेनीगदेसे येशूदा “लास्सो यहूदीगदेला ग्ले, फ्याफुल्ला” भिसी पाङ्बान सलाम लजी। ओच्छे थेनीगदेसे येशूदा थो स्वाबान माला कडीसे थोबोरी तोसी फ्या लजी। थेह्रङ् लसी येशूदा खिसी लमाहेन्से थेनीगदेसे थे वालावाला पिङ्गै छोन्ना क्वान स्युसी पिन्जी। ओच्छे येशूदा थेलान क्वान क्वान्सी क्रूसरी टाँगब लसी साइबारी भोर्जी।
येशूदा क्रूसरी टाँगब लबा
मत्ती २७:३२-४४; लूका २३:२६-४३; यूह १९:१७-२७
थेनीगदेसे येशूदा भोर्बान लबा धुइरी कुरेनी भिबा ग्लाला सिमोनदा नाम्साग्याम खबान लबा स्याप्जी। थे अलेक्जेन्डरदेन रूफसला आबा मुबा। जमाहेन्से सिपाहीगदेसे थेदा कर लसी येशूला क्रूस पुइपुङ्जी।1 ओच्छे थेनीगदेसे येशूदा गलगथा भिबा ग्लारी भोर्जी। गलगथाला अर्थ चा खप्परला ग्ला हिन्ना। गलगथारी दोमाहेन्से थेनीगदेसे येशूदा अङ्गुरला निङ्गुरी लठेब तबा मन2 युसी पिन्जी। तर येशूसे थे आसोल्नी। जमाहेन्से थेनीगदेसे येशूदा क्रूसरी टाँगब लजी। ओच्छे थेनीगदेसे येशूला क्वान भो लसी खाल्दा खजिबा परब तबा चिम भिसी ह्राङ ह्राङ न्हङ्री चिट्ठा युजी।3
येशूदा क्रूसरी टाँगब लबा धुइरी स्य्होला नौ बजब तबा मुबा। येशूदा दोष लबा तामरी “चु यहूदीगदेला ग्ले” भिसी भ्रिबा मुबा। थेनीगदेसे येशूदा क्रूसरी टाँगब लबा धुइरी य्हो न्हीदाएनोन गिकदा दाहिनेपट्टि, गिकदा देब्रेपट्टि क्रूसरी टाँगब लजी। परमेश्वरला बचनरी भ्रिबा ताम चुह्रङ् लसी पूरा तजी, “थेदा अपराधीगदेदा ह्रङ्नोन लजी।4”5
थेग्याम भ्रबा म्हिगदेसे थोबो य्होङ्बान चुह्रङ् भिसी येशूदा खिसी लजी, “लु, परमेश्वरला मन्दिर फुप्सी सोमरेरीन दोःसी स्होला भिसी पाङ्बा म्हि,6 दन्दे एसे ह्राङसे ह्राङदान जोगब लउ, ओच्छे क्रूसग्याम मार फाप्गो।” थेह्रङ् लसीन मूल पूजाहारीगदेदेन यहूदी धर्मगुरुगदेसेएनोन थेनीगदे ह्राङ ह्राङ न्हङ्री चुह्रङ् भिसी ठट्टा लजी, “चुसे स्य्हान्दोदा चा जोगब लखम्जी। तर ह्राङसे ह्राङदा चा जोगब लआखम्नी। चु इस्राएलीगदेला ग्ले थार्बा पिन्बा ख्रीष्ट क्रूसग्याम मार फाप्सी खगै, जमाहेन्से जे य्हाङसे थेदा विश्वास लला!” ओच्छे येशूदेन छ्याम क्रूसरी टाँगब लबा म्हिगदेसेनोन येशूदा खिसी लजी।
येशू सिबा
मत्ती २७:४५-५६; लूका २३:४४-४९; यूह १९:२८-३०
धिनना बाह्र बजेहेन्से तीन बजेधोना य्हुल्सा नाङ्नोन धोपधोप तजी। ङ्यसे तीन बजेरीक्यार येशूसे घ्रेन काइरी क्रिङ्बान चुह्रङ् भिसी सुङ्जी, “इलोइ इलोइ लामा सबखथनी?” चुला अर्थ चा “ङाला परमेश्वर, ङाला परमेश्वर, ह्राङसे ङादा तिग्दा ख्लाबा?” भिबा हिन्ना।7 चुह्रङ् लसी क्रिङ्बा म्राङ्सी थेरी राप्सी चिबागदे न्हङ्री कोइ कोइसे चुह्रङ् भिसी पाङ्जी, “च्यागो, चुसे मि एलियादा गा ङ्योइबा चिम।” ओच्छे थेनीगदे न्हङ्री गिकसे चा य्हार्सी निसी अङ्गुरला कम्बा निङ्गुरी क्वानगेन ब्लुम्सी माला कडीरी खीसी येशूदा ख्वाबान चुह्रङ् भिसी पाङ्जी, “दाहेन्से चुदा एलिया खसी क्रूसग्याम मार तेःला वा? च्यागे।”8
जमाहेन्से घ्रेन काइरी क्रिङ्सी येशूला सा निजी। थेनोन धुइरी परमेश्वरला मन्दिर न्हङ्री मुबा पर्दा ह्राङनोन तोरहेन्से मारधोना पाख्ले न्ही तसी ढेजी।9 चुह्रङ् लसी येशूला सा निबा म्राङ्सी थेरी क्रूसला ङाच्छापट्टि राप्सी चिबा रोमी कप्तानसे चुह्रङ् भिसी पाङ्जी, “चु मि साँच्चिन परमेश्वरला झानोन चिम।”
थेरी कोइ कोइ म्रिङ्म्हेमेगदेसे थारेङ्ग्याम च्यासी चिबा मुबा। थेनीगदे न्हङ्री मरियम मग्दलिनी, जजा याकूबदेन योसेफला आमा मरियम ओच्छे सलोमी मुबा। येशू गालीलरी मुबा धुइरी थेनीगदे येशूला लिच्छा लिच्छा भ्रसी येशूला सेवा लमुबा। ओच्छे थेरी यरूशलेमधोना येशूदेन छ्याम खबा ल्हानान म्रिङ्म्हेमेगदेएनोन मुबा।10
येशूदा धुर्सारी थान्बा
मत्ती २७:५७-६१; लूका २३:५०-५६; यूह १९:३८-४२
चु धिन ब्लप्बा न्हबा धिनना ङाच्छाकुनु मुबा। थे धिनकुनु ङ्यसे अरिमाथिया भिबा सहरला योसेफ आलोङ्नान पिलातस मुबा ग्लारी निसी येशूला लाश ह्रीजी। थे योसेफ यहूदी घ्रेन सभाला मूल सदस्या मुबा। थेएनोन परमेश्वरसे शासन लबा धुइ खला भिसी भ्रान्सी चिबा मुबा।
येशू सिजी भिबा ताम थेःसी पिलातस उदेक तजी। ओच्छे थेसे रोमी कप्तानदा ह्राङ मुबा ग्लारी ङ्योइसी येशू साँच्चिन सिबा हिन्ना कि आहिन भिसी ङ्योइबा छार्बा लजी। रोमी कप्तानसे येशू साँच्चिन सिबा हिन्ना भिसी पाङ्माहेन्से पिलातससे येशूला लाश योसेफदा भोर्बारी पिन्जी। योसेफसे ज्यबा खाल्ला सूतीला क्वान ग्लुसी भजी। ओच्छे येशूला लाश क्रूसग्याम मार तेःसी थे सूतीला क्वानरी रिल्जी। थेग्याम येशूला लाशदा भोर्सी युङ्बाला पहरारी ठ्वाइसी स्होबा धुर्सा न्हङ्री भोर्सी थान्जी। जमाहेन्से युङ्बा ब्लिङ्बान भसी धुर्साला म्रापरी थान्जी। मरियम मग्दलिनीदेन योसेफला आमा मरियमसे येशूला लाश थान्बा ग्ला च्यासी चिबा मुबा।
Source notes (10)
- Cross-reference रोमी १६:१३
- Footnote “लठेब तबा मन” ग्रीक बाइबलरी चुदा मूर्र भिसी भ्रिबा मुला।
- Cross-reference व्हाइ २२:१८
- Footnote चु पदला ताम ल्हानान ह्रङ्बा ग्रीक बाइबलरी भ्रिबा आरे।
- Cross-reference यशै ५३:१२
- Cross-reference व्हाइ २२:७; १०९:२५; मर्कू १४:५८; यूह २:१९
- Cross-reference व्हाइ २२:१
- Cross-reference व्हाइ ६९:२१
- Cross-reference थोन्बा २६:३१-३३
- Cross-reference लूका ८:२-३
Eastern Tamang Language Bible. Copyright © Wycliffe Bible Translators, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.